«Հեռուստադիտողն ինձ նոր կերպարով է տեսնելու». Յուլիա Ֆինկը` «Դեպի երազանք» հեռուստանովելում իր կերպարի մասին

Դերասանուհի Յուլիա Ֆինկը «Դեպի երազանք» 25 մասանոց հեռուստանովելում մարմնավորում է Նելլի կերպարը։ Վերջինս ֆիլմի գլխավոր հերոսի մայրն է։ Tert.am Life–ի հետ զրույցում Յուլիան բացահայտեց իր կերպարի մասին։

«Նելլին սառը, դաժան կերպար է։ Նա ունի ներքին խնդիրներ, որն էլ իրեն այդպիսին է դարձրել։ Իր բացասական արարքները ինչ–որ տեղ ես արդարացնում եմ, քանի որ ոչ մի մայր էլ չի ցանկանա իր որդուն տեսնել խաբված։ Նա ամեն գնով պայքարում է դրա համար։ Չնայած նրա, որ Նելլին բացասական կերպար է, կրթված ու շատ դաստիարակված է մեծացրել իր երեխաներին»,– ասաց Յուլիան։

Դերասանուհին նշեց, որ այս դերն իր համար նորություն էր։ «Ես շատ դերեր եմ մարմնավորել, բայց այս կերպարն մյուսներից տարբերվում է։ Հեռուստադիտողն ինձ նոր կերպարով է տեսնելու։ Այդքան էլ հեշտ չէր խաղալ բացասական կերպար»,– հավելեց նա։

Յուլիան նկատեց, որ ինքը կյանքում հետևողական է և միշտ ուշադիր է եղել մարդկանց նիստուկացին, բնավորության գծերին։ «Ես միշտ ասել եմ, որ պետք ուշադիր լինել և հետևել մարդկանց և տեսնել` ով, ինչ տեսակի է։ Իմ կերպարը` Նելլին,  տարբեր կանանց խառնուրդ է։ Ամեն մի կնոջից ինչ–որ մի բան վերցրել եմ։ Նա այն կանանցից է, որը խնամված է ու պահանջկոտ»,– նշեց դերասանուհին։

Յուլիան ֆիլմում ոճային կտրուկ փոփոխության չի դիմել, սակայն հետևողական է եղել և իր կերպարին համահունչ է ներկայացել։ «Փորձել եմ ամեն կերպ համապատասխան լինել հարուստ կնոջ կերպարի»,– ասաց նա։

Դերասանուհու խոսքով` իր բոլոր խաղընկերները նոր են։ «Շատ գոհ ու շնորհակալ եմ բոլորից։ Առաջին իսկ նկարահանման օրվանից հասկացել ենք  իրար և հաճելի աշխատանք ենք ունեցել։  Առանձնահատուկ շնորհակալ եմ իմ ամենափոքր խաղընկերոջը` Մարիային, որի ձայնը թեկուզ մի անգամ չենք լսել։ Նա միշտ պատրաստակամ է եղել և երբեք չի տրտնջացել, թե հոգնած է։ Շատ տաղանդավոր երեխա է։ Միանգամից ընկալում էր այն, ինչ իրենից պահանջում էին։ Ի դեպ, նշեմ` եղել են տեսարաններ, որ Քրիստինայի և Մարիայի հետ շատ սառն եմ եղել։ Երբ նկարահանումն ավարտվել է, ինձ վատ եմ զգացել` նրանց հետ շատ սառը խաղալու համար»,–ավելացրեց Յուլիան։

Հիշեցնենք, որ «Դեպի երազանք» հեռուստանովելը կցուցադրվի հուլիսի 31–ից Ucom ցանցում գործող «Արմենիա Պրեմիում» հեռուստաալիքի եթերում։