«Սիրանկյունի» սիթքոմի բյուջեն 3 անգամ գերազանցում է մյուս նախագծերի բյուջեն. նոր սիթքոմն արդեն «Շանթ»-ի եթերում է

17:02 • 21.11.24

Հրանտ Հովսեփյանի, Իրինա Այվազյանի, Մարինկա Խաչատրյանի, Մարգարիտա Խաչատրյանի, Իշխան Ղարիբյանի, Վիկտորյա Սահակյանի, Հայկ Պետրոսյանի, Կարեն Ճաղարյանի և այլոց մասնակցությամբ «Սիրանկյունի» նոր սիթքոմն արդեն Շանթ հեռուստաընկերության եթերում է:

Օրերս կայացավ սիթքոմի առաջին սերիայի փակ դիտումը՝ դերասանների ու ստեղծագործական թիմի մասնակցությամբ:

Նախագծի պրոդյուսերը Հարություն Մովսեսյանն է, ռեժիսորը՝ Արթուր Սարիբեկյանը: Սիթքոմի սաունդթրեքն այս անգամ վստահվել է «Ազգային երգիչ 2» նախագծի հաղթող Սամվել Մալոյանին ու նախագծի ֆինալիստ Անի Խառատյանին:

Դերասանուհի Իրինա Այվազյանը Tert.am Life-ի հետ զրույցում նշեց, որ այս նախագծում առաջին հերթին իրեն գրավեց անձնակազմը:

«Հետո արդեն կերպարս ու դերասանական կազմը: Առանց մտածելու առաջարկն ընդունել եմ: Կերպարս էլ շատ վառ կերպար է ու, հուսով եմ, կսիրվի հեռուստադիտողի կողմից»,- ասաց դերասանուհին:

Դերասան Հրանտ Հովսեփյանն էլ նշեց, որ նախագիծն իրեն գրավել է թեթևությամբ ու սիրով, որը փոխանցվում է բոլոր կերպարներին:

«Կան նաև հումորային տարրեր, որոնք շատ մոտ են իրական կյանքին:

Իմ կերպարը ՝ Մարկը բավականին զվարճալի և պարզ, բայց միաժամանակ խորամանկ տղա է, ով հաճախ հայտնվում է անհարմար իրավիճակներում: Սակայն, նրա նման կերպարները միշտ ունեն իրենց գեղեցիկ ու տխուր կողմերը»,- անկեղծացավ դերասանը:

««Սիրանկյունի» սիթքոմն իր յուրահատկությամբ անմիջապես գրավեց ինձ:

Յուրաքանչյուր սերիա պատմում է իրական ու ճանաչելի իրավիճակների մասին, որոնք մոտ են հանդիսատեսին»,- պատմեց դերասանուհի Մարինկա Խաչատրյանը:

Նրա համար նախագծում ամենագրավիչն այն էր, որ այն ոչ միայն ծիծաղեցնում է, այլև՝ ցույց է տալիս տարբեր կերպարների զարգացումն ու նրանց հարաբերությունների դինամիկան։

«Սա այն սիթքոմն է, որը չես կարող բաց թողնել»,- վստահեցրեց Մարինկա Խաչատրյանը։

Նախագծի գաղափարը՝ սպորտը համադրել սիրո և առողջ ապրելակերպի հետ, նախագծի պրոդյուսեր Հարություն Մովսիսյանինն էր:

«Փորձել եմ այդ 3-ը համադրել: Հանդիպել եմ սցենարիստ Սարգիս Կալպակյանի և ռեժիսոր Արթուր Սարիբեկյանի հետ, քննարկել ենք գաղափարը, հետո քասթինգն ենք իրականացրել:

Ինձ համար ամենակարևորն այն չէ, որ նկարենք միայն հայտնի դերասանների, որպեսզի բարձր վարկանիշ ունենանք: Սիթքոմ նկարելու համար միայն որակն ու գույները բավարար չեն, կարևոր է, որ դերասանը համապատասխանի իր կերպարին:

Կուզեի, որ դաշտում մրցակցություն լիներ: 4-5 դերասանով հայտնի սիթքոմներ կան, որոնք արվում են փոքր բյուջեով: Մենք բյուջեն չենք սահմանափակել և նախագծում 20-25 դերասան է ընդգրկված:

Համեմատած դաշտում մյուս նախագծերի հետ, մոտ 3 անգամ ավելի շատ գումար ենք ծախսել մեր սիթքոմի համար»,- նշեց Հարություն Մովսեսյանը:

«Սիթքոմը նախկին մարզիկ Մարկ Ավետիսյանի մասին է, ով վնասվածքի պատճառով թողել է կարիերան և հիմա աշխատանքի է տեղավորվել ֆիթնես ակումբում, որտեղ պատահաբար հանդիպել է ակումբի գլխավոր մարզիչին և մենեջերին, ով եղել է իր նշանածը: Ամբողջ սիրանկյունու դրամատուգիան կառուցված է հենց այս 2-ի հարաբերությունների վրա»,- Tert.am Life-ի հետ զրույցում նշեց ռեժիսոր Արթուր Սարիբեկյանը:

Նրա խոսքով՝ պրոդյուսեր Հարություն Մովսիսյանը հատուկ ուշադրություն է դարձել դրամատուրգիային և ռեժիսորի քմահաճույքներին՝ ապահովելով ստեղծագործական այն միջավայրը, որի մասին կերազեր ցանկացած ռեժիսոր:

«Պատմությունը սկսվում և ավարտվում է ջիմի շուրջ ծավալվող գործողություններով, բայց դրան հարակից պատմությունները ծավալվում են այլ միջավայրում, ինչը մեզ թույլ է տալիս ասել, որ սիթքոմը տարբերվում է մյուսներից»,- նշեց Արթուր Սարիբեկյանը:

Ռեժիսորի խոսքով՝ սիթքոմը կգրավի հեռուստադիտողին. «Մենք հաճախ ենք թերագնահատում մեր հեռուստադիտողին, ասելով, որ ավելի շատ սիրում է նայել հեշտ մարսվող պատմություններ:

Մենք դա չենք շեշտադրել, մենք շեշտը դրել ենք որակով դրամատուրգիայի վրա: Ուզում եմ շնորհակալություն ասել մեր սցենարիստ Սարգիս Կալպակյանին և դերասանական անձնակազմին, որոնց շնորհիվ վստահ կարող եմ ասել, որ նախագիծը կսիրվի ու կգրավենք դիտողի ուշադրությունը»,- ամփոփեց ռեժիսորը: