Կայացավ «Սիմֆոնիկ հայ ֆիլմ» խորագրով համերգը՝ նվիրված 44-oրյայում կյանքից զրկված Վահե Մելիքսեթյանի ծննդյան 36-ամյակին. հասույթի մի մասը կուղղվի «2020-ի հրեշտակները» ֆիլմի ստեղծմանը

«Հին օրերի երգը», «Մեր մանկության տանգոն», «Ճերմակ անուրջներ», «Առաջին սիրո երգը», «Կտոր մը երկինք», «Վերջին բնակիչը» և այլ հայտնի սիրված կինոմեղեդիներ հնչեցին Արամ Խաչատրյանի անվան համերգասրահում...

Հայաստանի պետական սիմֆոնիկ նվագախումբը, «Վահե Մելիքսեթյան» կրթաբժշկական հիմնադրամն ու «C-squared» ընկերությունն իրականացրեցին «Սիմֆոնիկ հայ ֆիլմ» խորագրով բարեգործական համերգը՝ նվիրված արցախյան 44-օրյա պատերազմում զոհված Վահե Մելիքսեթյանի ծննդյան 36-ամյակին: 

Տոմսերի վաճառքից ստացված հասույթի 10 տոկոսը կուղղվի Ջիվան Ավետիսյանի «2020-ի հրեշտակները» ֆիլմի ստեղծման աշխատանքներին, իսկ մյուս մասը՝ «Վահե Մելիքսեթյան» հիմնադրամին՝ Հայաստանում կլինիկական դեղագիտությունը զարգացնելու նպատակով:

«Հայաստանի պետական սիմֆոնիկ նվագախմբի հետ մեր 2-րդ համերգն է, նախորդ տարի նոյեմբերի 5-ին ևս բարեգործական համերգ ունեցանք «Սիմֆոնիկ Մանսուրյան» խորագրով: Այս տարի «Սիմֆոնիկ հայ ֆիլմ» խորագրով» բարեգործական համերգը նվիրված է եղբորս՝ Վահեի տարեդարձին»,- Tert.am Life-ի հետ զրույցում նշեց Սարգիս Մելիքսեթյանը:

Երեկոյի ընթացքում հնչեցին հայկական սիրված ֆիլմերի կինոմեղեդիները՝  Հայաստանի պետական սիմֆոնիկ նվագախմբի կատարմամբ (դիրիժոր՝ Հարություն Արզումանյան):

«Համերգի ընթացքում գեղեցիկ վիզուալները կազմակերպել է «C-squared» ընկերությունը: Նպատակ ունենք համերգի ընթացքում գեներացրած գումարը տրամադրել մեր կրթաբժշկական ծրագրերին, ինչպես նաև հասույթի 10 տոկոսը տրամադրել Ջիվան Ավետիսյանի «2020-ի հրեշտակները» ֆիլմի ստեղծման աշխատանքներին»,- նշեց մեր զրուցակիցը:

«2020-ի հրեշտակները» մի քանի տասնյակ բժիշկների վկայությունների պատմությունների հիման վրա ստեղծված գեղարվեստական ֆիլմ է՝ իրական փաստերի վրա հիմնված:

Սարգիս Մելիքսեթյանը կարծում է, որ պատերազմի բժիշկները շատ թերագնահատված են:

«Իրենք ևս շատ հզոր են գտնվել, շատ հերոսություններ են արել թե՛ մարտի դաշտում, թե՛ վիրահատարանում, և կարիք կա դրա մասին ֆիլմերի լեզվով պատմելու: Շատ շնորհակալ եմ Ջիվան Ավետիսյանին հավակնոտ ծրագրի համար, բավական մեծ բյուժեով ու լավ մտածված ֆիլմ է լինելու:

Հուսամ մեր ներդումը ևս կնպաստի ֆիլմի շուտափույթ ստեղծմանը: Մեր գլխավոր հովանավորն է «Մարտին Սթար» ընկերությունը, համերգի գործընկերներն են Tomsarkgh.am-ն ու Հայաստանի Կինոյի հիմնադրամը, իսկ մեր տեղեկատվական գործընկերն է Tert.am-ը, որը շուրջ 3 տարի մեզ օգնում է մեր կատարած աշխատանքները լուսաբանելու հարցում»,- նշեց Սարգիս Մելիքսեթյանը:

Նրա խոսքով՝ հիմնադրամը ստեղծվել է Վահեի մասնագիտական երազանքները կյանքի կոչելու նպատակով:

«Եղբայրս մասնագիտությամբ կլինիկական դեղագետ է եղել, այս մասնագիտությունն ԱՄՆ-ում շատ մեծ հարգանք ու պահանջարկ  է վայելում, մեզ մոտ ցավոք, մասնագետները քչաթիվ են և աշխատատեղեր չկան: Մեր հիմնադրամը հանձնառություն է վերցրել մի կողմից խթանելու պահանջարկը, մյուս կողմից՝ առաջարկը:

Վահեն շատ էր սիրում իր մասնագիտությունը, ինքն էլ պայքարող տեսակ էր ո՛չ միայն մարտի դաշտում, այլ նաև՝ կյանքում: Ցավոք, նրա կյանքը չբավարարեց, որպեսզի ինքն իր երազանքը կյանքի կոչի:

Շնորհակալ եմ բոլոր այն մարդկանց, ովքեր մեզ այս կարևոր գործում աճակցում են և՛ ֆինանսապես, և՛ ցանկացած այլ հարցով: Մեր թիմին ևս շնորհակալ եմ, մենք փոքր թիմ ենք, բայց շատ մեծ նվիրումով»,- մեզ հետ զրույցում պատմեց Սարգիս Մելիքսեթյանը:

Երեկոյին ներկա էր նաև ռեժիսոր Ջիվան Ավետիսյանն, ում խոսքով՝ իր նպատակն է ֆիլմի միջոցով եղելությունը պատմել ամբողջ աշխարհին:

Ռեժիսորը նշեց, որ որ Ֆիլմը պատմում է պատերազմի մասնակից բժիշկների աշխատանքի ու անձնվիրության մասին: Այն մեկ բժշկի մասին չէ, ֆիլմում բոլոր կերպարները հավաքական են, ֆիլմը պատմություն է հիմնված 50-ից ավելի բժիշկների վկայությունների վրա:

«Շնորհակալություն բոլոր այն բուժաշխատողներին, ովքեր որևէ կերպ մասնակցություն են ունեցել 2020 թվականի պատերազմին: Ուզում եմ առանձնակի շնորհակալություն հայտնել լուսահոգի Վահե Մելիքսեթյանին՝ իր ամենաթանկ նվիրման համար»,- նշեց ռեժիսոր Ջիվան Ավետիսյանը:Լուսանկարները՝ Վերոնիկա Բադալյանի