«Չխնամված աղջիկների չեմ սիրում». աղջկա 5 տեսակ, որ չի սիրում Գրիգոր Կյոկչյանը

Ինչպես տղաների, այնպես էլ աղջիկների մոտ կան բնավորության ընդգծված գծեր, որոնք տանել չեն կարողանում տղամարդիկ։ Tert.am Life–ի հետ զրույցում երգիչ Գրիգոր Կյոկչյանը ընդգծեց աղջիկների 5 տեսակ, որը տանել չի կարողանում։

   –Սիրում եմ օրիգինալ աղջիկների, հետևաբար չեմ սիրում այն աղջիկներին, որոնք իրենց դիմագծերը փորձում են վերափոխել և նմանվել մերօրյա կարծրացած նորաձև տեսակին։ Արհեստական ոչինչ չեմ սիրում։ Ավելի լավ է մի քանի թերություններով, բայց բնական լինի աղջիկը, քան արհեստական շուրթերով, այտերով և այլ բարեմասնություններով։ Ես դեմ չեմ պլաստիկ վիրահատությունների, բայց պետք է անել չափի մեջ, որպեսզի ակնհայտ չերևա։ Մի քանի աղջիկների գիտեմ, որոնց հաճախ եմ շփոթում, չնայած երկար ժամանակ է ճանաչում եմ իրենց։ Վիրահատությունների պատճառով աղջիկը կորցնում է իր օրիգինալությունն ու հետաքրքրությունը։  

   –Չեմ սիրում ռաբիս երևույթը իր բոլոր դրսևորումներով։ Վատագույն այն է, երբ աղջիկը ռաբիս է լինում. խոսքից սկսած և վերջացրած հագուկապով։ Չեմ սիրում, երբ աղջիկը գռեհիկ ու փողոցային բառապաշարով է խոսում։

   –Չեմ սիրում տղամարդ–աղջիկ տեսակը։ Կարիերիստ աղջիկներ կան, որոնք հաջողություններ ունենալով և ինքնահաստատվելով աշխատանքում, փորձում են անձնականում էլ արտացոլել իրենց տեսակը և ուժեղ համարել իրենց։ Իհարկե, շատ եմ սիրում խելացի, դիվանագետ աղջիկների, երբ նրանք կարողանում  են իրենց ճիշտ դրսևորել տարբեր իրավիճակներում։ Եթե նա շատ ուժեղ տեսակ է, պետք է խելացի լինի և ինքնանպատակ չդրսևորի իրեն։ Շատ կարևոր է, որ աղջիկները հասկանան` իրենց ամուսիններին ճիշտ ներկայացնողն իրենք են։ Ամուսնու բրենդը կինն է։ Ուժեղ կինը իր ամուսնուն վեր կբարձրացնի, այլ ոչ թե կփորձի ինքնահաստատվել տղամարդու հաշվին։

   –Չեմ սիրում չխնամված աղջիկների։ Սիրում եմ խնամված աղջիկների, որոնք մոտ են բնականին։ Օրինակ` ինձ վանում է շատ մուգ ստվերաներկով դիմահարդարված, ոչ ճիշտ գույնի շրթներկ ընտրած, ոտքերի եղունգները չխնամված աղջիկները։

   –Ընտանիքի մայր լինելը աղջկա սրբազան պարտականություն է։ Շատ աղջիկներ կան, որոնք այդպես չեն համարում։ Եթե նա որոշակի հաջողություններ ունի կարիերայում, պետք է առաջնայինն իր ընտանիքին ու երեխային նվիրվի։ Աղջկա գեր նպատակը պետք է լինի ընտանիքի մայր լինելը։ Ես այն տղամարդկանցից չեմ, որ իմ ընտրյալը պետք է չաշխատի և նստի տանը և խոհանոցում անցկացնի օրվա մեծ մասը։ Ինքս սիրում եմ, երբ աղջիկը աշխատում է, ունի իր սեփական կարծիքը։ Բայց այդ ամենը պետք է չխանգարի իրեն և չմոռանա, որ ինքը մայր է։ Առաջնային իր երեխայի դաստիարակությունն է և նվիրումը ընտանիքին։ Այս ամենը չգիտակցող աղջիկների չեմ սիրում։