«500 երեխայից ընտրվել է 15–ը». «Նվագախմբի երեխաները» մյուզիքլի համահեղինակը` նախագծի քասթինգի և նկարահանումների մասին

Ucom ցանցում գործող «Արմենիա Պրեմիումի» եթերում շուտով կցուցադրվի «Նվագախմբի երեխաները» մյուզիքլը։ 12 մասից բաղկացած մյուզիքլի գլխավոր պրոդյուսերը Գրիգոր Նազարյանն է, բեմադրող ռեժիսորը՝ Գրիգոր Վահրամյանը, երաժշտական պրոդյուսերը՝ Գրիգոր Կյոկչյանը։ Մոտ երկու ամիս տևած նկարահանումներն օրեր առաջ ավարտվել են։ Tert.am Life–ի հետ զրույցում նախագծի կրեատիվ պրոդյուսեր և սցենարի համահեղինակ Ջեյմս Նազարյանը պատմեց, որ մյուզիքլի գաղափարը վաղուց է ծնվել, դեռ այն ժամանակ, երբ մեկ այլ նախագծի վրա էին աշխատում։

«Նախագծի վերաբերյալ ավելի լավ պատկերացում կազմելու համար այդ ժամանակ գրեցինք նախագծի սինոփսիսը ու մի քանի սերիա, սակայն ինչ–ինչ պատճառներով այն եթերում չհայտնվեց։ Միշտ հավատացել եմ, որ այս մյուզիքլը մի օր, անպայման, կցուցադրվի։ Անցած տարի նախագծի մասին հայտնեցինք Գրիգոր Նազարյանին, որի համաձայնությունը ստանալուց հետո սկսվեցին բանակցությունները հեռուստաընկերության և Ucom ընկերության հետ։ Մի քանի տարի առաջ գրված սցենարի վրա մի շարք փոփոխություններ ենք արել։ Պահպանելով հիմնական գաղափարը` նոր սցենար ենք գրել։ Երևանի երաժշտական տարբեր դպրոցներում մի քանի փուլով քասթինգ ենք անցկացրել։ Մյուզիքլում նկարահանվելու համար մոտ 500 երեխայից ընտրվել են հիմնական 15  և երկրորդային կերպար մարմնավորող շուրջ 50 երեխա։ Քասթինքն անցկացրել ենք տեսախցիկի առաջ, բոլորին տվել ենք նույն հանձնարարությունը։ Իրենց լավագույնս դրսևորած և դերին համապատասխան մասնակիցներն անցել են։ Ինչ վերաբերվում է հայտնի մարդկանց երեխաներին` նրանք նույնպես անցել են քասթինգ։ Նրանց ընտրությունը միտումնավոր չի եղել, պարզապես համընկել է։ Նրանց կերպարները շատ համապատասխան են իրենց դերին»,– պատմեց Ջեյմսը։

Վերջինս նշեց, որ մյուզիքլը ճանաչողական բնույթի է։ «Որքան էլ մյուզիքլը ժամանցային է, իր մեջ ունի ճանաչողական, ուսուցողական և, ինչու ոչ, դաստիարակչական տարրեր։ Պատանի հեռուստադիտողը շատ բան կարող է սովորել այս նախագծից։ Հիմնական սյուժեն կառուցվում է նրա շուրջ, որ մի շարք երեխաներ ցանկանում են մասնակցել երաժշտական փառատոնի և հանուն իրենց երազանքի հայտնվում են փորձությունների մեջ։ Հումորային հատվածները ոչ միայն ծիծաղելի են, այլև ինֆորմացիոն։ Օրինակ`վստահ եմ, կլինեն տարիքային խմբեր, որոնք չգիտեն`ով է Մոցարտը կամ Բեթհովենը։ Երկխոսությունների միջոցով երեխաները կտեղեկանան նաև նրանց մասին և ոչ միայն»,– նշեց նա։

Մյուզիքլի համար տասնյակից ավելի երգեր են գրվել։ «Այնպիսի հիթային երգեր են գրվել, որոնք հեռուստադիտողները կսիրեն։ Հնարավոր է` այս նախագծից հետո այդ երգերն ունենան տեսահոլովակներ։ Երգեր կան, որոնք հատուկ իրավիճակի համար են գրվել։ Ի դեպ, նախքան նկարահանվելը երեխաները գնացել են պարի և վոկալի դասերի»,– հավելեց սցենարիստը։