Անահիտ Կիրակոսյանը` «Անուղղելիները» հեռուստասերիալում նկարահանվելու և ազդեցիկ կնոջ կերպարում ներկայանալու մասին

19:58 • 01.08.17

Շոուբիզնես

«Վերվարածները» 10 տարի անց վերադառնում են «Անուղղելիները» նոր հեռուստասերիալում։ Հայկական առաջին հեռուստասերիալի դերասանական կազմը նոր դերասանների համալրումով նկարահանվում են «Անուղղելիները» հեռուստասերիալում, որը եթերում կլինի սեպտեմբերի 18-ից։ Բազմասերիանոց հեռուստասերիալում նկարահանվում է նաև դերասանուհի Անահիտ Կիրակոսյանը։ Tert.am Life–ի հետ զրույցում Անահիտը պատմեց իր կերպարի մանրամասների մասին և ոչ միայն։

«Նախկինում այս նախագծում չեմ եղել։ Երբ առաջարկը ստացա, ինձ համար բավականին հետաքրքիր էր։ Բացի հիմնական կերպարներից մի քանի նոր կերպարներ էլ կան։ Ես այդ նոր կերպարներից մեկն եմ մարմնավորում։ Շատ ուրախացա, երբ իմացա, որ խաղընկերս Գրիշա Աղախանյանն է։ Ֆիլմում մենք ամուսիններ ենք և ունենք երկու երեխա` տղա և աղջիկ։ Գրիշայի հետ մենք առաջին անգամ ենք ֆիլմում նկարահանվում, բայց մինչ այդ մենք միասին վարել ենք առավոտյան ծրագիրը։ Նրա հետ աշխատելը շատ հեշտ է»,–ասաց Անահիտը։

Անահիտի խոսքով` հեռուստադիտողն իրեն նոր կերպարով է տեսնելու։ «Մարմնավորում եմ մի կնոջ, որը միշտ սիրում է իրեն հետևել և ներկայանալի տեսք ունենալ։ Կայացած կին է և ընտանիքի անդամների վրա մեծ ազդեցություն ունի։ Շատ չեմ ուզում բացել փակագծերը, որ հեռուստադիտողի համար ավելի հետաքրքիր լինի։ Այս կերպարը տարբերվում է Սուսիկի, Հայարփիի կամ Իզայի կերպարներից։ Հեռուստադիտողն ինձ նորովի է տեսնելու։ Վստահ եմ, որ «Անուղղելիները» հեռուստասերիալը լինելու է շատ հետաքրքիր, յուրատեսակ, նոր բան ասող։ Այն կուրախացնի թե՛ իր նախկին կերպարներով, որոնք արդեն սիրված են, թե՛ նոր խաղընկերների շնորհիվ կդառնա էլ ավելի հետաքրքիր։ Ինքս նկարահանման ընթացքից նկատել եմ, որ հետաքրքիր հումորներով է համեմված սցենարը»,– հավելեց դերասանուհին։

Նշենք, որ այս ընթացքում շարունակվում են նկարահանումները։