Աիդա Սարգսյանը` դստեր և նախկին ամուսնու հանդիպման ու նոր բիզնեսի մասին

Աիդա Սարգսյանը դստեր` Լանայի հետ օրեր առաջ է վերադարձել Երևան։ Նրանք Հայաստանում վայելում են իրենց ամառային հանգիստը։ Երգչուհին Tert.am Life–ի հետ զրույցում ասաց, որ շատ էր կարոտել Հայաստանը։

«Մենք այստեղ մեզ շատ լավ ենք զգում։ Հատկապես, աղջիկս, քանի որ նա շատ ընկերասեր ու շփվող է։ ԱՄՆ–ում երեխաների հետ նա չէր կարողանում ազատ շփվել, քանի որ այնտեղ մի փոքր այլ է։ Երևանում նա ազատ է և ընկերների հետ է անցկացնում իր ժամանցը»,– ասաց երգչուհին։

Ավելի վաղ մեզ հետ զրույցում Աիդան ասել էր, որ Երևանյան այցի ժամանակ Լանան հանդիպելու է իր հայրիկին։ «Նրանք, գրեթե, ամեն օր միասին են անցկացնում ու այցելում տարբեր ժամանցային վայրեր։ Իր հայրիկը նաև օդանավակայան էր եկել` մեզ դիմավորելու։ Լանան իրեն շատ երջանիկ է զգում այստեղ»,– նշեց երգչուհին։

Երգչուհուց հետաքրքրվեցինք` ում է առավել շատ կարոտել Հայաստանում. «Այստեղ շատ բարեկամներ ու հարազատներ ունեմ, որոնց տարածության մեջ միշտ հիշում եմ ու կարոտում։ Բայց հիմա շատ բան է փոխվել։ Եթե առաջ մեկնում էի ճանապարհորդության, առաջինը մայրիկիս էի կարոտում, ուզում էի անհապաղ տեսնել ու գրկել իրեն։ Բայց հիմա, երբ մայրս մեզ հետ չէ, արտառոց կարոտ չեմ զգացել։ Այստեղ ամեն ինչ նրան է հիշեցնում։ Ես զգում եմ նրա բացակայությունը ու ամեն տեղ փնտրում իրեն»։ 

Աիդայի խոսքով` երկու շաբաթ նրանք կմնան Երևանում։ «Այս ընթացքում, կարծում եմ, տարբեր վայրեր կգնանք, որպեսզի կարողանանք մեր օրն ավելի հետաքրքիր անցկացնել։ Մի քանի անգամ մենք Սևան գնացինք։ Ես այնտեղ լողափ ունեմ և հանգստիս զուգահեռ որոշեցի որոշ աշխատանքներ նախաձեռնել։ Որոշել եմ հանգստի գոտի բացել։ Տա Աստված, մինչև մյուս տարի այն պատրաստ կլինի։ Շատ հետաքրքիր և տարբերվող նախագիծ եմ մտածել, որի մասին դեռ չեմ ուզում նախապես խոսել»,– ասաց Աիդան։

Բացի հանգստից, երգչուհին այս ընթացքում նաև նոր երգեր է պատրաստվում թողարկել։ «Այնպես ստացվեց, որ այս օրերին հանգիստս աշխատանքի հետ եմ համատեղում։ Պատրաստվում եմ նոր երգեր թողարկել։ Կարծում եմ` եկել է ժամանակը երգացանկուս նոր երգերով համալրեմ։ Եթե կարողանանք աշխատանքներն այստեղ արագ իրականացնել, հենց Երևանում կձայնագրվեմ։ Եթե չստացվի, մնացած աշխատանքները ԱՄՆ–ում կանեմ։ Այս ընթացքում նաև մասնակցել եմ իմ երգերի հեղինակ Մարինե Թագակչյանի հեղինակային երեկոյին, որը նախատեսված չէր։ Երգեցի «Գոյ» թատրոնի բեմում։ Իսկապես, ինձ համար հուզումնալից էր և շատ ուրախալի, որ այսպես ստացվեց։ Հայ հանդիսատեսին շատ էի  կարոտել»,– հավելեց Աիդան։

Երգչուհին նշեց, որ հնարավորության դեպքում հաճախա կգա Հայաստան։ «Եթե միայն իմ գործերը լիներ, ես ավելի հաճախ կվերադառնայի Հայաստան, բայց քանի որ երեխաս այնտեղ դպրոց է գնում, պետք է մեր գալը հարմարեցնեմ իր արձակուրդներին։ Կարծում եմ` կկարողանանք այնպես անել, որ ավելի շատ ժամանակ անցկացնենք Երևանում, ոչ թե Ամերիկայում»,– եզրափակեց Աիդան։