«Նորաձևության ոլորտում պետք է միշտ նորովի ներկայանալ». Լիլիթ Մարգարյան

Կրթվել, ձգտել, ստեղծել նորը և առաջ շարժվել. ահա այս հատկանիշներով է դիզայներ Լիլիթ Մարգարյանն արդեն 20 տարի և ավելի աշխատում նորաձևության ոլորտում։ Նա այսօր ունի դպրոց, որտեղ կարողանում է տալ սաներին այն, ինչ նա տարիների ընթացքում սովորել է։ Tert.am Life–ի հետ զրույցում դիզայները նշեց, որ նկարիչ–մոդելավորողը պետք է, անպայման, շատ գիտելիքներ ունենա։ Նա նկատեց, որ այսօր կանանց հետաքրքրությունը նորաձևության վերաբերյալ գնալով շատանում է, իսկ դրա համար պետք են որակյալ մասնագետներ։

«Հայ կինը բոլոր ժամանակներում նորաձև է եղել։ Գուցե մեր ավանդույթները թույլ չեն տվել նորաձևության ոլորտում լինել ավելի համարձակ, բայց այն, որ հայ կինն ամենախնամվածն է աշխարհում ես միշտ ասել եմ և համոզվել եմ, երբ սկսեցի շրջագայել և համեմատել հայ կնոջը մյուսների հետ։ Նկատելի է, որ մեր օրերում նորաձևությամբ սկսել են ավելի շատ կանայք հետաքրքրվել։ Այսօր չկա մի կին, որը երազած չլինի դառնալ հագուստի մոդելավորող։ Եթե առաջ հագուստի մոդելավորումը դիտում էին որպես հոբբի, ապա հիմա այն լուրջ մասնագիտություն է, որի համար ես շատ ուրախ եմ։ Հագուստ ստեղծելու համար շատ երկար ճանապարհ պետք է անցնել և շատ գիտելիքներ ունենալ։ Ավելի քան 20 տարի է այս ոլորտում եմ, բայց միևնույն է միշտ ձգտում եմ նորը սովորել, հետևել մեծերի աշխատանքներին, հիանալ դրանցով և միշտ կրթվել։ Դրա համար բացեցի նորաձևության դպրոցը, որպեսզի սաներին տամ այն, ինչ գիտեմ։ Չեմ բացառի, որ դասերի ընթացքում ոչ միայն տալիս եմ, այլև ստանում։ Այս ոլորտն է այդպիսին։ Միշտ կարելի է նոր բան սովորել։ Իմ սաներին միշտ ասում եմ, որ պետք է լինել նպատակասլաց, ձգտող։ Պետք է չզլանալ և անընդհատ սովորել և ջանասիրաբար աշխատել։ Այն ինչ տալիս ես հետո հետ ես ստանում»,– ասաց Լիլիթը։

Վերջերս կայացավ «Լիլիթ» նորաձևության դպրոցի շրջանավարտները աշխատանքների ցուցահանդեսը։ Լիլիթը սաների հետ ներկաներին նորությամբ է ներկայացել և առաջին անգամ Հայաստանում ցուցադրել էսքիզների ցուցահանես։ «Մենք առաջին անգամ Հայաստանում ներկայացրեցինք նորաձևության էսքիզների ցուցահանդես, որը միջազգային տերմինով ավելի հայտնի է fashion illustration։ Որոշել եմ ամեն անգամ իմ սաների ավարտական ցուցահանդեսին նորությամբ ներկայանալ։ Այս անգամ սա էր։ Հայաստանում fashion illustration դեռ ոչ ոք չէր արել։ Արձագանքները շատ դրական էին։ Անկեղծ ասած չէի սպասում, քանի որ սա նոր բան էր և հնարավոր էր մարդիկ չհասկանային։ Բայց այնքան գեղեցիկ էր ամեն ինչ, որ միայն լավ խոսքեր եմ լսել»,– հավելեց նկարիչ–մոդելավորողը։

Վերջինիս խոսքով` նա շատ տաղանդավոր մարդկանց է տեսնում։ «Դպրոցը հնարավորություն է ընձեռում մարդկանց ինքնաբացահայտվել և ցույց տալ այն տաղանդը, որը թաքնված է ներսում։ Իմ սաների աշխատանքներից ես շատ գոհ էի։ Առաջին հայացքից հեշտ թվացող էսքիզներն այդքան էլ հեշտ չէ ստանալ։ Անկեղծ կասեմ, երբ որոշեցի այսկերպ ցուցահանդես անել, մի փոքր մտավախություն ունեի, բայց ամեն ինչ հիանալի էր»,–նշեց նա։

Լիլիթն ասաց, որ օգոստոսին սկսվելու է ընդունելությունը։ «Սեպտեմբերից սկսվելու են դասերը։ Դեռ չեմ մտածել այս անգամ  ինչ նորությամբ կներկայանանք,  բայց դա պարտադիր կլինի»,– եզրափակեց դիզայները։