Գոհար Հարությունյան. «Ինձ մոտ խնդիր եղավ, ինչից հետո բժիշկներն արգելեցին հղիության ընթացքում ինքնաթիռ նստել»

«Միսս Հայաստան 1998», «Միսս ԱՊՀ 1999» և «Միսիս գլոբ 2009» Գոհար Հարությունյանի նախաձեռնությամբ ստեղծված «Միսս Արմենիա» մրցույթի համար այս օրերին ընտրվում են 24 գեղեցկուհիները։ Ինչպես և Գոհարը խոստացել էր, նախընտրական փուլը փակ է անցնում։

Tert.am Life–ի հետ զրույցում Գոհարը պատմեց, որ մրցույթի մասնակցության հայտ ներկայացրած աղջիկների թիվn օր օրի աճել է։  Այս ընթացքում կազմակերպիչները 200 մասնակցից արդեն ընտրել են 15–ին։ Առաջին փուլը հաղթահարած աղջիկներից 10–ը Հայաստանից են, 5–ը` Սփյուռքից։ Գոհարի խոսքով` կան նաև աղջիկներ, որոնք անցել են նախընտրական երկրորդ փուլ։ Նրանցից լավագույնները կընտրվել լրացուցչ փուլի ժամանակ։ Մինչ այդ, վաղը կազմակերպիչները կընդունեն ևս 80 աղջկա, որոնցից կընտրեն արժանիներին` այսպիսով եզրափակելով նախընտրական առաջին փուլը։

«Նախընտրական փուլում ուղղակի զրուցում ենք աղջիկների հետ, հարցեր ենք տալիս իրենց մասին։ Ինտելեկտուալ հարցեր չենք տալիս, քանի որ գեղեցիկ խոսելաձևն արդեն իսկ բավարար է մրցույթին մասնակցելու համար։ Իհարկե, առաջնահերթ ուշադրություն ենք դարձնում արտաքին տվյալներին, քանի որ սա գեղեցկության մրցույթ է, սակայն կարևոր է, որ մրցույթին ներկայացված աղջիկը կարողանա նաև գեղեցիկ ներկայանալ։ Տարբեր մարդիկ են գալիս` շատ ինտելեկտուալ և ոչ այնքան»,– ասաց Գոհարը։

Նա նշեց, որ աղջիկները շատ են շփոթվում, ինչը, երբեմն, խանգարող հանգամանք է դառնում։ «Երբեմն աղջիկներն իրենց անհանգստությունից կարող են ոչ ադեկվատ շարժումներ անել։ Ունենք դիմորդներ, որոնք սովոր են բեմին, կան նաև աղջիկներ, որոնք ասում են` մենք եկել ենք իրականացնելու մեր մանկության երազանքը»,– պատմեց Գոհարը։

Գեղեցկուհին նշեց, որ այս ընթացքում եղել են դժգոհություններ նախընտրական փուլը չանցած աղջիկների կողմից, սակայն իրենք պատրաստ էին դրան։ «Մեզ գրում են` կարծում էինք արդար է, սակայն նման բաներ միշտ լինում են։ Եզրափակչից հետո էլ կլինեն նման խոսակցություններ։ Բոլորը գալիս են հաղթելու, սակայն մենք կողքի աչքով ավելի լավ ենք տեսնում` ով կարող է մասնակցել, ով` ոչ»,– նկատեց նա։

Ի դեպ, այժմ հղիության 7–րդ ամսում գտնվող Գոհարն ամառային հանգստի մեկնել չի պատրաստվում, քանի որ բժիշկները թույլ չեն տալիս։ «Ինձ մոտ խնդիր եղավ, ինչից հետո բժիշկներն արգելեցին հղիության ընթացքում ինքնաթիռ նստել, չեն ուզում ռիսկի դիմել։ Հայաստանում 2-3 օրով ինչ-որ տեղ գնում ենք, բայց ինձ լավ չեմ զգում։ Մեր տանը կիսակուրորտային վիճակ է, նախընտրում եմ տանը լինել։ Միայն ափսոսում եմ, որ երեխաներս այս տարի չհանգստացան»,– ասաց գեղեցկուհին, ով արդեն պարզել է չորրորդ երեխայի սեռը, սակայն չի հրապարակում։ Ասում է` ուզում է անակնկալ մատուցել մտերիմներին։ Երեխայի անվան ընտրության հարցում էլ Գոհարն ու ամուսնինը դեռևս չեն կողմնորոշվել։