Արման Նշանյանը` իր տարեդարձի առթիվ կնոջ անակնկալի և իրենց ամուսնության 1–ամյակի մասին

17:00 • 12.08.17

Շոուբիզնես

Դերասան Արման Նշանյանն այսօր տոնում է իր 39–ամյակը։ Դերասանը ինչպես ամեն տարի, այս տարի նույնպես ավանդույթ դարձած մեկնել է Տաթև։ Ter.am Life–ի հետ զրույցում Արմանը նշեց, որ ավանդույթները չխախտելով կնոջ հետ մեկնել է մի քանի տեսարժան վայրեր շրջագայելու։

«Սովորաբար, ամեն տարի օգոստոսի 11–ին Նավասարդի տոնին ես մեկնում եմ Տաթև մասնակցելու պատարագին։ Այս տարի ևս կնոջս հետ որոշեցինք գնալ այնտեղ, հետո շրջագայել գեղեցիկ և հոգևոր վայրերում։ Ինձ համար մեծ անակնկալ էր Շաքիի ջրվեժ, որ երբևիցե չէի տեսել։ Դա ինձ համար նոր բացահայտում էր։ Հայաստանն իսկապես շատ գեղատեսիլ վայրեր ունի և ամեն անգամ նոր բացահայտումներ կարող ես անել»,– ասաց Արմանը։

Վերջինս նշեց, որ հասցրել է արդեն բազում շնորհավորանքներ ստանալ։ «Առաջինը կինս է շնորհավորել։ Նա ինձ հետաքրքիր ապարանջան է նվիրել, որն ինձ շատ է դուր եկել։ Սովորաբար սիրում եմ ստանալ այնպիսի անտիկվարիատներ, որոնք ինչ–որ բան են խորհրդանշում։ Իրականում ինձ հեշտ է անակնկալի բերել, երբ հոգևոր և խորհրդանշող ինչ–որ բա են նվիրում և այն մտածված է լինում։ Ես ինքս էլ մարդկանց չեմ սիրում նվիրել սովորական ինչ–որ իր»,– ասաց Արմանը։

Ի դեպ, երեկ Արման Նշանյան ու իր կինը` Վիկան տոնել են իրեն ամուսնության 1–ամյակը։ Դերասանը նշեց, որ շատ գեղեցիկ անակնկալ էր պատրաստել։ «Չեմ ուզում խոսել, թե ինչ նվեր եմ մատուցել կնոջս, քանի որ այն գաղտնիք է։ Կարևորն այն է, որ մենք այդ պահին իրար հետ էինք ու ռոմանտիկ միջավայրում վայելում էինք այդ օրը»,– հավելեց Արմանը։

Դերասանը խոսքով`իրեն շատ երջանիկ է համարում։ «Այս մեկ տարվա ընթացքում կնոջս մեջ ինչ–որ հատուկ բան չեմ բացահայտել, բայց ինչքան անցնում է ժամանակը, ես ավելի շատ եմ սիրում նրան։ Օր օրի ես հասկանում եմ, թե ինչպիսի անձնավորության հետ եմ կապել կյանքս։ Եվ դա ինձ երջանկացնում է, քանի որ վստահ եմ` այսպես էլ կապրեմ իմ կյանքի վերջ»,– հավելեց նա։

Արմանը խոսելով ընտանիքում նոր համալրման մասին, ասաց. «Կարծում եմ շատ չի ուշանա և մեր ընտանիքում նոր անդամով կհամալրվի։ Այս պահին նորություն չկա, բայց երկուսս էլ շատ ենք ուզում փոքրիկ ունենալ»։