«Շոկի մեջ էի». Մարիաննա Հակոբյանի սիրելիի ամուսնության անակնկալ առաջարկությունը

ATV հեռուստաընկերության «Այսօր» լրատվականի մեկնաբան Մարիաննա Հակոբյանի սիրելին` Հրաչը, անակնկալ ձևով ամուսնության առաջարկություն է արել հաղորդավարուհուն։ Tert.am Life–ի հետ զրույցում լրագրողուհին նշեց, որ այդ քայլը իր համար անսպասելի էր։

«6 տարի է` մենք ընկերություն ենք անում, բայց ոչ մի լուսանկար չեմ հրապարակել, գրառում չեմ արել։ Հանրային դեմք լինելով հանդերձ միշտ փակ եմ պահել անձնական կյանքս։ Այս տարիներն այնքան ռոմանտիկ են անցել, որ վախեցել եմ անգամ բարձրաձայնել երջանկությանս մասին։ Երեկվանից ինձ մոտ այնպիսի շոկային վիճակ էր, որ մինչև հիմա դողէրոցքի մեջ եմ։ Ես, ընդհանրապես, չէի սպասում նման առաջարկի, քանի որ կիրակի օրը Հրաչն իր ընտանիքի հետ պետք է մեր տուն գար։ Պետք է նշանադրության արարողություն լիներ։ Մտքովս անգամ չէր անցնում, որ մինչև այդ Հրաչն անակնկալ կանի։ Ամեն մանրուք այնպես էր մտածել, որ ոչինչ չեմ կռահել։ Նա զանգեր էր ստանում, իրեն տարօրինակ էր պահում, իսկ ես հարցախեղդ էի անում իրեն, ինչպես բնորոշ է լրագրողին։ Նա իրար հակասող պատասխաներ էր տալիս, բայց գլխի չէի ընկնում, թե ինչ է կատարվում»,– պատմեց Մարիաննան։

Սովորաբար, երկարատև հարաբերությունները բերում են նաև վեճերի, խնդիրների, որոնք խանգարում են զույգի բնականոն հարաբերություններին։ Մարիաննան նշեց, որ իրենց մոտ էլ են եղել վեճեր, բայց, ի վերջո, սերը հաղթել  է։ «Կատարյալ հարաբերություններ չկան։ Միշտ պետք է  պատրաստ լինես ամեն բանի, շատ դժվար է պահպանել երկարատև հարաբերությունները, չսպառել իրար։ Իհարկե, վեճեր, կոնֆլիկտներ, հակասություններ  լինում են, դադարներ նույնպես պետք են։  Անկեղծ ասած, միշտ վախեցել եմ և, անգամ, ֆոբիա եմ ունեցել ամուսնությունից, որովհետև կենցաղային հարցերը հաճախ գերի են դարձնում, սահմանափակում միմյանց ազատությունը։  Հրաչը օգնել է հաղթահարել շատ վախեր, նա այնքան կայացած տղամարդ է, որ երբեք չի փորձել փոխել ինձ կամ սահմանափակել ինչ-ինչ հարցերում. ինձ ընդունել է այնպիսին, ինչպիսին կամ, ավելին ես չեմ էլ ուզում»,– նշեց մեկնաբանը։

Մարիաննան ամուսնության առաջարկությունն ընդունել է հենց այդ պայմանով` չսահմանափակել իրեն։ «Ամուսնության առաջարկությունը ընդունեցի միայն մի պայմանով, որի մասին մենք միշտ խոսել ենք ու քննարկել։ Չդառնալ կենցաղային հարցերի գերի ու շարունակել ամեն նոր օր սպանել իրար՝ մեր սիրով։ Ես համարում եմ, որ ամեն մարդ պետք է ունենա իր անձնական դաշտը։ ԴԵթե թույլ չես տալիս մտնել այդ անձնական դաշտ, չի նշանակում`չես սիրում դիմացինիդ։ Պարզապես, դա հարաբերությունները պահպանելու, միմյանց հարգելու լավագույն տարբերակն է»,– հավելեց նա։

Մարիաննան նշեց, որ դեռ չեն որոշել, թե երբ են օրինականացնելու իրենց հարաբերությունները։ «Նշանադրությանս օրը պարզ կլինի, թե երբ կամուսնանանք»,– եզրափակեց նա։