Ալլա Լևոնյանը 2 տարի է` պայքարում է իրեն սպառնացողների դեմ. իրավաբանը մանրամասներ է ներկայացնում

14:32 • 15.08.17

Շոուբիզնես

Tert.am Life–ն իր ընթերցողներին հայտնել է, որ երգչուհի Ալլա Լևոնյանը հաղորդում է տվել ոստիկանություն, ըստ որի` Գայանե Մանուկյան անվամբ ֆեյսբուքյան օգտատերը սպառնում է իր կյանքին և առողջությանը։

Երգչուհին զերծ է մնում այս թեմայով հարցազրույց տալուց, սակայն Tert.am Life–ի համար բացառություն է արել։ Նրա իրավաբան Էմիլ Մարկոսյանը մեզ հետ զրույցում հայտնեց, որ երգչուհին ճանաչում է իրեն սպառնացող Գայանե Մանուկյանին, վերջինս ԱՄՆ–ում գործող Usarmenianews.com կայքի խմբագիրն է։

«Խնդիրը սկսվել է մոտ 2 տարի առաջ, երբ Գայանե Մանուկյանի լրատվական կայքում Ալլա Լևոնյանի մասին վարկաբեկող նյութ է հրապարակվել։ Նյութը հրապարակվել էր լրագրողի անվան տակ, սակայն լրագրողը հրապարակայնորեն ներողություն է խնդրել, հերքել նյութը և ասել, որ այդ ամենի հետևում կանգնած է Գայանե Մանուկյանը։ Այդ լրագրողը դուրս է եկել աշխատանքից։ Այդ պատմությունից հետո մինչև օրս Գայանե Մանուկյանը, անձնական հաշվեհարդար տեսնելու նպատակով, իր մերձավորների, կեղծ օգտատերերի միջոցով պարբերաբար զրպարտիչ նյութեր և մեկնաբանություններ է թողնում Ալլա Լևոնյանի մասին։ Նա սպառնալիքներով, սադրանքներով, ահաբեկելով անձնական նամակագրությամբ դիմում է Ալլա Լևոնյանին, սակայն Ալլա Լևոնյանը չի պատասխանում։ Նրանց հետ բոլոր բանակցությունները ես եմ վարում։ Նրա հետ ունեցել եմ հեռախոսազրույցներ, նամակագրություններ»,– ասաց Էմիլ Մարկոսյանը։

Իրավաբանը նշեց, որ վերջին ժամանակահատվածում նրանք պարբերաբար գործել են կազմակերպված խմբով. «Այդ ընթացքում եղել են սպառնալիքներ ինչպես կյանքի և առողջության, այնպես էլ գույքի դեմ։ Եղել են սեռական բնույթի հայհոյանքներ, վարկաբեկիչ հրապարակումներ։ Իր թիմակիցների` սպառնացող մարդկանց, մեջ կան այնպիսիք, որոնց իսկությունը բացահայտել ենք։ Վտանգավոր մարդիկ են։ Նրանց մեջ կա 4 անգամ դատապարտված մարդ։ Շատ հնարավոր է, որ սպառնալիքը վերածեն իրական գործողության»։

Վերջինիս խոսքով` 2 տարվա ընթացքում փորձել է բանակցել, որպեսզի հանգիստ թողնեն Ալլային, սակայն խնդիրը հասել է գագաթնակետին և որոշել են դիմել ոստիկանություն։ «Եղել են փուլեր, երբ հաշտություն է եղել, սակայն կեղծ հաշտություն է եղել։ 1-2 ամիս անց կեղծ էջերով սադրանքներ է կատարվել Ալլա Լևոնյանի հանդեպ։ Գայանե Մանուկյանը 2 բանի մեջ է մեղադրում Ալլա Լևոնյանին։ Նախ` անհեթեթ մեղադրում է որպես պալատական երգչուհի, երկրորդ մեղադրանքն այն է, որ Սասնա Ծռերի դեպքերի ժամանակ նա միացել է մտավորականների կազմակերպած ստորագրահավաքին, որով իշխանություններին կոչ են անում, որպեսզի ոստիկանության և խաղաղ ցուցարարների միջև արյունահեղություն, բախում չլինի։ Գայանե Մանկույանն իր երևակայության պատճառով Ալլա Լևոնյանին համարում է ազգի դավաճան»,– նշեց Էմիլ Մարկոսյանը։

Իրավաբանի խոսքով` մինչև 2 տարի առաջ եղած առաջին վարկաբեկիչ հրապարակումը Ալլա Լևոնյանի և Գայանե Մանուկյանի միջև որևէ խնդիր չի եղել։ Էմիլ Մարկոսյանը հայտնեց, որ իրենք պատրաստվում են մինչև վերջ պայքարել, որպեսզի մեղավորները պատժվեն. պահանջելու են ոչ միայն քրեական, այլև վարչական պատասխանատվության ենթարկել նրանց։ «Մարդ խելոքանում է, երբ իր արածների համար պատասխանատվության է ենթարկվում։ Ոստիկանությունը մեր գործի առաջին խնդիրն էր։ Մոտ օրերս մենք հայցադիմում կներկայացնենք դատարան ոչ միայն Գայանե Մանուկյանի, այլև իր կողմնակիցների, այդ ամենի մասնակիցների դեմ` գործարար անձի բարոյական արժանապատվությանը վիրավորելու համար»,– ասաց նա։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: