Ֆաինա Հարությունյանը` դստեր ատամհատիկի և 1–ամյակի խնջույքի մասին

Դիզայներ Ֆաինա Հարությունյանը օգոստոսի 17–ին ընտանիքի անդամների և հարազատների հետ նշել է դստեր 1–ամյակն ու  ատամհատիկը։ Tert.am Life–ի հետ զրույցում դիզայները պատմեց, որ այս առիթով տանն է խնջույք կազմակերպել։

«Ինչ–որ հատուկ բան չենք արել։ Սովորական խնջույք էինք կազմակերպել. երգեր, պարեր և այլն։ Գեղեցիկ զարդարել էինք Նիկայի տորթի սեղանը։ Կարծում եմ` հասկանում էր, թե ինչ էր կատարվում։ Ուրախանում էր, ծափիկներ էր անում, նվերներ էր ստանում։ Ատամհատիկի արարողության ընթացքն իրեն շատ էր դուր եկել։ Հատկապես, երբ քաղցրավենիքը լցրեցին գլխին, շատ էր ուրախացել։ Իր համար շատ հետաքրքիր էր, իրեն շատ լավ էր զգում, քանի որ բոլորի ուշադրության կենտրոնում էր»,– ասաց Ֆաինան։

Վերջինիս խոսքով` Նիկան ատամհատիկին ընտրել է այն թուղթը, որի վրա գրված էր կինո, թատրոն և հեռուստատեսություն։ «Մենք հատուկ մասնագիտություններ չէինք գրել։ Միայն ոլորտներն էինք նշել։ Երբ մեծանա, ինքը կընտրի իր մասնագիտությունը։ Հնարավոր է` իր հայրիկի նման այդ ոլորտի մասնագետ դառնա»,– նշեց նա։

Ֆաինան կցանկանար, որ դուստրը հետագայում զարդերի դիզայներությամբ զբաղվի, բայց ասում է` դստերը չի պարտադրի իր ցանկությունը։  «Ինչպես ասում են` իմ ուզելը քիչ է։  Նա ընտրել է կինո, թատրոն, հեռուստաընկերություն ոլորտները։ Եթե հետագայում որոշի  այս ոլորտում ընտրել իր մասնագիտությունը, կցանկանայի ռեժիսոր դառնար։ Ամուսինս ընդհանրապես չէր ուզում, որ նա այդ ոլորտն ընտրի։ Երբ վերցրեց թուղթը, Արտյոմն ասաց` ինչու եք այդ ոլորտները գրել, հետո ծիծաղեց ու ասաց` պապայի աղջիկ է։ Մենք կողմ կլինենք աղջկաս ցանկացած ընտրությանը։ Երբ աշխատանքդ սիրով ես անում, երջանիկ ես լինում։ Ինձ համար կարևոր է, որ աղջիկս երջանիկ լինի։ Չեմ ուզում ընտրի այն ուղղությունը, որը ես եմ պատկերացնում։ Ինչ ուզում է թող ընտրի, կարևորը իր սրտով լինի»,– ավելացրեց դիզայները։

Ֆաինայի խոսքով` Նիկան, հայտնվելով իրենց կյանքում, ոչ թե ինչ–որ բան է փոխել, այլ լրացրել է ամեն բան։ «Ինձանից ինչ–որ բան չի պակասել։ Իմ աշխատանքը, կյանքի ռիթմը չեն փոխվել։ Ինձ մոտ ավելացել է երջանկությունը։  Այս մեկ տարվա ընթացքում շատերը տեսած կլինեն, որ աշխատանքի գնալիս նա միշտ ինձ հետ է։ Երբեք չեմ տրտնջացել կամ բողոքել, որ երեխայի հետ ինչ–որ բան չեմ հասցնում։ Ընդհակառակը, Նիկան նոր ուժ է ինձ հաղորդել։ Երբ առաջին անգամ գրկեցի իրեն, հասկացա, որ պետք է ավելի ուժեղ, պատասխանատու լինել, քանի որ մենք իրեն պետք ենք։ Նույն էլ ամուսնուս մոտ է։ Օր օրի ավելի է մեծանում պատասխանատվության զգացումը»,– ասաց նա։

Դիզայները նշեց, որ այնպես է դասավորում իր գրաֆիկը, որ ոչինչ չտուժի` ոչ ընտանիքը, ոչ երեխան, ոչ էլ աշխատանքը։  «Ես կարողանում եմ իմ օրն այնպես դասավորել, որ ամեն ինչ հասցնեմ։ Անգամ, եթե քիչ եմ քնում, չեմ բողոքում։ Նիկան ինձ երբեք նեղություն չի պատճառել։ Ես իր հետ ամեն գործ էլ կարողանում եմ հասցնել։ Իմ շրջապատում կան կանայք, որոնք դուրս են եկել աշխատանքից և միայն երեխայի խնամքով են զբաղվում։ Նրանք բողոքում են, որ շատ են հոգնում ամբողջ օրը երեխայի հետ, ուզում են դուրս գալ ու աշխատել։ Ինձ մոտ այդ խնդիրը չկա, քանի որ կարողանում եմ ամեն ինչ համատեղել»,– ավելացրեց Ֆաինան։

Դիզայներն  ասաց, որ դուստրը բնավորությամբ խելոք է։ «Նիկան շատ խելոք է, բայց հանգիստ երեխա չէ։ Շատ հասկացող է։ Երբ աշխատում եմ, ինձ չի անհանգստացնում։ Կարողանում է ինքն իրեն զբաղեցնել։ Ինչ–որ կապրիզներ չունի։ Մարդամոտ է և չի նեղվում անծանոթ մարդկանց հետ շփվելիս։ Ինքն ընդհանրապես շատ քիչ է լացում։ Ամեն ինչ հասկանում է, միայն խոսել չգիտի։ Մի քանի բառ է ասում` մամա, պապա, լույս, չէ և այլն։ Նրա առաջին բառը «մամա»–ն է եղել, բայց հիմա ավելի շատ «պապա» է ասում։ Հատկապես, առավոտյան, երբ արթնանում է, հայրիկին է կանչում ու խաղում են միասին»,– նշեց նա։

Ֆաինան ազատ օրերն ամբողջությամբ նվիրում է դստերը։ «Շաբաթ, կիրակի ես չեմ աշխատում։ Ամբողջ օրս իրեն եմ նվիրում։ Մենք գնում ենք տարբեր տեղեր և հետաքրքիր ժամանակ անցկացնում։ Իսկապես, շատ հաճելի է ապրել այս երջանկությունը։ Հղիության շրջանում նախապես ոչինչ չէի պլանավորում։ Երբեք չեմ մտածել, թե հետո ինչ պետք է անեմ։ Ամեն օր ես մի նոր բան եմ սովորում։ Չնայած ամուսինս համաձայն  չէ` հասկացել եմ, որ եթե կինը մեծ տարիքում է մայրանում, կարողանում է ավելի մեծ հաճույք ստանալ և չի նեղվում, որ ընկերուհիները հավաքվեցին, ինքը չգնաց։  Ի վերջո, 30–ն անց եմ, դրա համար ավելի կազմակերպված ու խելացի ձևով եմ տնօրինում օրս»,– ասաց նա։

Ֆաինայից հետաքրքրվեցինք` արդյոք չեն ցանկանում Նիկային քույր կամ եղբայր պարգևել։ «Ես, իհարկե, շատ եմ ուզում, բայց դա իմ որոշելիքը չէ։ Աստծո կամոք, մեզ մոտ էլ ամեն ինչ կստացվի և Նիկան կունենա քույր ու եղբայր»,– եզրափակեց նա։