Աշոտ Տեր–Մաթևոսյան. «Սոֆյան հարգանքի է արժանի»

«Միլիոնը թակարդում» 25 մասանոց նոր հեռուստասերիալը արդեն հասցրել է լայն քննարկումների առիթ դառնալ։ Սոֆյա Պողոսյանի, Աշոտ Տեր–Մաթևոսյանի և Հայկ Սարգսյանի մասնակցությամբ դետեկտիվ դրամայի ընթացքին հեռուստադիտողները հետևելու հնարավորություն կունենան սեպտեմբերի 4–ից` Ucom ցանցում գործող «Արմենիա Պրեմիում» հեռուստաալիքի եթերում։

Tert.am Life–ի հետ զրույցում Աշոտ Տեր–Մաթևոսյանը պատմեց, որ նախագիծը շատ հետաքրքիր է։ Ինքը համաձայնել է նկարահանվել այս հեռուստասերիալում առանց երկար մտածելու։ «Առաջարկը ստացա ռեժիսոր Հարութ Շատյանից, որի հետ շատ եմ աշխատել։ Հարութն իր գործին շատ պրոֆեսիոնալ և պատասխանատու է մոտենում։ Նրա գործոնն արդեն գրավական էր, որ շատ լավ բան է ստացվելու։ Կարելի է ասել, առանց մտածելու համաձայնեցի»,– ասաց դերասանը ու հավելեց, որ իրեն շատ է դուր եկել նաև սցենարը։  Ըստ Աշոտի` ֆիլմը անհրաժեշտ բոլոր բաղադրիչներն ունի լավը լինելու համար։

Աշոտը նկատեց, որ 25 մասանոց ֆիլմերն ավելի մոտ են գեղարվեստական ֆիլմին։ «Միլիոնը թակարդում» իրեն հետաքրքրել է նաև  որպես հեռուստադիտողի. «Փառք Աստծո, ես ընտրության հնարավորություն ունեմ, որպեսզի եթե լավ նախագիծ չլինի, չհամաձայնեմ մասնակցել։ Թեև լինում են դեպքեր, երբ նկարագրում են մի բան, որը հետո չեն կարողանում ստանալ։ Դա հարցի մյուս կողմն է։ Այս դեպքում վստահում եմ և հավատում, որ արդյունքը լավը կլինի, քանի որ գեղարվեստական առումով թիմի գլուխը ռեժիսորն է»։

Աշոտն ունեցել է բարդ նկարահանումներ, սակայն դրանց մասին խոսել ավելորդ է համարում` հաշվի առնելով, թե իրենից քանի անգամ ավելի բարդ նկարահանումներ է ունեցել Սոֆյան, երբ նկարահանվում էր ինքնասպանության տեսարանը։ «Եթե Սոֆայի չարչարանքների հետ համեմատեմ, ես նմանատիպ տեսարան չեմ ունեցել։ Իր տեսարանը շատ բարդ էր, մոտ 18 ժամ նկարահանել են։ Բառերով հնարավոր չէ բացատրել, թե Սոֆայի համար ինչքան բարդ էր` ցուրտ էր, գիշեր։ Երբ օրը փոխվում է, դերասանն էլ սկսում է հոգնել, սպառվում է։ Օրվա վերջում այդ ծանր տեսարանները նկարահանելը շատ բարդ է։ Իմ բարդ տեսարանները ոչինչ են դրա համեմատ, Սոֆայից հետո ինձ թույլ չեմ տալիս խոսել բարդության մասին»,– նշեց դերասանը։

Խոսելով ավելի վաղ տարածում գտած տեսանյութի մասին, որտեղ ինքն ու Սոֆյան համբուրվում են` Աշոտը նշեց, որ, սովորաբար, խուսափում է նմանատիպ տեսարաններից։ Այս դեպքում, սակայն, չի խուսափել, նախ, որովհետև խաղընկերուհին իր ընկերուհին է, երկրորդ` վստահում է ռեժիսորին։ «Այս դեպքում երկուսը մեկում էր։ Առհասարակ, խուսափում եմ, որովհետև այդ ամենը մեզ մոտ գեղեցիկ չի մատուցվում։ Գուցե, ինձանից նեղանան, բայց այդպես է։ Չգիտեմ` դա համբուրվողների՞, թե՞ նրանց նկարողների խնդիրն է։ Ես ռեժիսորի հետ էլ եմ խոսել այս թեմայով, ինքն էլ համաձայնեց։ Ասաց, որ աշխատում են այն ուղղությամբ, որ նման տեսարանները գեղեցիկ լինեն։ Այս դեպքում էլ վստահեցի Հարութին»,– ասաց նա։

Աշոտն այլևս չի խուսափում իր և Սոֆյա Պողոսյանի անձնական կապի մասին ծավալվող խոսակցություններից։ Ասում է` խոսակցություններ, այսպես, թե այնպես, լինելու են. «Ես չեմ սիրում, երբ իմ անձնական կյանքը քննարկում են, սակայն արդեն զգուշանալու ոչինչ չկա։ Կարծես թե, բոլորի համար ամեն ինչ պարզ է։ Անիմաստ է զգուշանալ»։

Անդրադառնալով սիրելիին որպես խաղընկերուհի` դերասանն ասաց, որ Սոֆյան շատ լավ խաղընկերուհի է։ «Մենք առաջին անգամ չենք նկարահանվում իրար հետ։ Սիրային զույգի նախկինում էլ ենք մարմնավորել։ Կարծում եմ` այդ տեսարաններից կարող է պարզ դառնալ, թե իրար համար ինչպիսի խաղընկերներ ենք։ Երբ «պաս» ես տալիս, դիմացինը պետք է կարողանա վերադարձնել դա։ Սոֆայի մոտ դա փայլուն է ստացվում։ Դժգոհելու ոչինչ չունեմ։ Բարդ, ծանր տեսարաններ նկարահանելիս,  երկարատև աշխատելիս ես կհասկանայի, եթե նա ասեր` էլ չեմ նկարահանվում, գնում եմ տուն, սակայն մինչև վերջ նկարահանվել է։ Ճիշտ է, մի քիչ տրտնջացել է, որովհետև աղջիկ է, հոգնում է, բայց պատվով է դուրս եկել այդ ամենի տակից։ Դա էլ է ինձ մոտ հարգանք առաջացրել, Սոֆյան հարգանքի է արժանի։ Լավ, դիմացկուն խաղընկեր է, կարևորը` սիրում է իր գործը»,– եզրափակեց դերասանը։