Քրիստինա Եղոյան. «Ծնողներս ինձանից շատ հեռու են»

1 ամսվա ընթացքում 3 երգի պրեմիերա, որոնց արձագանքները ստիպեցին Քրիստինա Եղոյանին վերհիշել վաղեմի երազանքը` դառնալ երգչուհի։ Ucom ցանցում գործող «Արմինիա Պրեմիում» հեռուստաալիքի եթերում այսօր կավարտվի «Դեպի երազանք» 25 մասանոց հեռուստասերիալը, սակայն գլխավոր հերոսուհու` Նարեի դերակատար Քրիստինա Եղոյանի համար սա նոր սկիզբ է։ Tert.am Life–ը դերասանուհու հետ խոսել է իր համար էքսպերիմենտալ նախագծի մասին, որը նոր ճանապարհ սկսելու խթան դարձավ։

Ներկայանալով երգչուհու կերպարում` Քրիստինան ինքն էր կատարել բոլոր երգերը։ Դրա համար մոտ մեկ ամիս հաճախել էր վոկալի դասերի, թեև առաջին անգամ չէր երգում։ «Ժամանակին երգել  եմ ժողովրդական երգեր։ Երգչուհի դառնալու միտքն այս նախագծում չի առաջացել»,– ասաց նա։ Այնուամենայնիվ, եթե մինչև նախագծի եթեր հեռարձակվելը Քրիստինան ասում էր, որ ժամանակն ու հանդիսատեսը ցույց կտան, կշարունակի՞ ներկայանալ որպես երգչուհի, թե՞ ոչ, հիմա հստակ պատասխան ունի` ուզում է ներկայանալ երգի  ասպարեզում։

«Անչափ հաճելի էին արձագանքները, որովհետև երբ վերլուծում ենք դիտումների քանակն ու արձագանքները, հասկանում ենք, որ հեռուստադիտողն ինձ ընդունեց որպես երգչուհի։ Ինձ համար միշտ կարևոր է եղել լինել ոչ միայն ճանաչված, այլև սիրված։ Դրա համար եմ շատ կարևորում հանդիսատեսի կարծիքը։ Ես ստացել եմ հանդիսատեսի թույլտվությունը երգելու համար»,– ոգևորությամբ նշեց Քրիստինան, ով արդեն մտածում է նոր աշխատանքներ ներկայացնելու մասին։

«Այս երգերի շնորհիվ հասկացա, որ եթե ինչ–որ նոր աշխատանք ներկայացնեմ, ժողովուրդը կսիրի և կընդունի։ Թե ինչ ոճում հանդես կգամ, դեռ չգիտեմ։ Ինձ մի փոքր ժամանակ է պետք  դա հասկանալու համար։ Պիտի նաև հասկանամ, թե ժողովուրդն ինձնից ինչ է պահանջում ու կոնկրետ ինչ ոճում սիրեց։ Ժամանակին ժողովրդական երգեր եմ կատարել, հիմա ինձ ավելի շատ տեսնում եմ էստրադային ոճում։ Ավելի հավանական է, որ հաջորդ գործը լինի էստրադային ոճում։ Գուցե հետագայում հանդես գամ նաև ժողովրդական ոճում»,– ասաց Քրիստինան։

Ֆիլմը բավականին բարձր վարկանիշ ունի։ Դերասանուհին նշեց, որ «Դեպի երազանքն» իրեն հետաքրքիր է ոչ միայն որպես շահագրգիռ անձի, այլև հեռուստադիտողի։ Պարզվում է` իր հերոսուհու պես Քրիստինան էլ հարազատներից հեռու է Հայաստանում։ Նրա ընտանիքի անդամները` մայրը, հայրն ու քույրը ԱՄՆ-ում են։

Ըստ Քրիստինայի` սրտի իրական կարոտն իրեն շատ է օգնել նկարահանվելիս։ «Ծնողներս շատ հեռու են ինձանից, շատ եմ կարոտում։ Երևի թե, իմ անձնական զգացողություններն էլ նպաստեցին, որպեսզի ծնողների կարոտի տեսարանները ավելի լավ ստացվեն, քան այն դեպքում, եթե ծնողներս կողքիս լինեին։ Ֆիլմն ինձ համար հուզիչ է եղել։ Իհարկե, պիտի ունենաս տեխնիկա և՛ կարոտ խաղալու, և՛ լացելու, բայց երբ դրանք իրական զգացողություններ են լինում, շատ ավելի է դիպչում մարդկանց հոգուն»,– ասաց նա։

Ի դեպ, ֆիլմի ընթացքում խոսակցություններ տարածվեցին, որ Քրիստինան և գլխավոր հերոսի` Արմանի դերակատար Կարեն Ասլանյանը իրականում էլ սիրավեպ ունեն։ Հարցին` դա համոզիչ խաղալո՞ւ, թե՞ հանդիսատեսի սովորության արդյունք է, Քրիստինան պատասխանեց. «Հանդիսատեսն արդեն սովորել է միացնել հերոսներին, որոնք ֆիլմերում զույգի են մարմնավորում։ Դա նորմալ է»։