Սարգիս և Մանո Գրիգորյանների աղջկա առաջին քայլերը և բեմելը դպրոցում

Նորից սեպտեմբեր է ու հազարավոր երեխաներ շտապում են դպրոց` նոր սպասումներով ու ակնկալիքներով։ Շատերն առաջին քայլերն են անում դպրոցում։ Դերասան–ամուսիններ Սարգիս և Մանո Գրիգորյանների ընտանիքում այսօր կրկնակի տոն է. 2017-2018 ուսումնական տարվա առաջին դասարանցիների շարքերում է կրտսեր դուստրը` Յանան, դե իսկ Էվային ուղեկցում են երկրորդ դասարան։ Tert.am Life–ը ներկա է եղել Յանայի առաջին քայլերին դպրոց։

Յանան արտասանեց դպրոցական միջոցառման ժամանակ։ Մայրիկը նկատեց, որ դուստրը դա արեց առանց ավելորդ հուզմունքի։ Հուզված չէին նաև Սարգիսն ու Մանոն։ «Հուզված չեմ, միայն հասկացա, թե ինչքան արագ են մեծանում երեխաները ու ինչպես պիտի գնահատենք ու վայելենք ամեն պահը, որովհետև Էվայի առաջին դասարանից մինչև Յանան կարծես մի ակնթարթ լիներ։ Կարծես, ամեն ինչ կրկնվեր, ուղղակի երեխաներն էին փոխվել։ Մի պահ ուզում ես ասել` կանգ առ ակնթարթ»,– նշեց Մանոն։

Յանան հաճախելու է Վարդգես Պետրոսյանի անվան թիվ 51 դպրոց, որտեղ սովորում են 2 քույրերը` Էվան ու Նարեն։ Յանան դպրոց էր եկել ուրախ տրամադրությամբ, անհամբեր սպասում էր, թե երբ է բացելու գրքերը։ Նույնիսկ նկարվել չէր ուզում, շարունակ խոսում էր գրքերի մասին։ Մանոն մեզ հետ զրույցում ասաց, որ Յանան շատ լավ է տրամադրված դպրոց գալուն, թեև չի պատկերացնում` ինչ է իրեն սպասվում։

«Ավելի շատ նոր պայուսակը, նոր գրքերը, նոր միջավայրն են իրեն գրավում, բացի այդ, քույրիկի հետ է։ Ժամանակի ընթացքում ավելի լիարժեք կպատկերացնի, թե ուր է եկել։ Ինձ շատ հետաքրքիր է, թե ինքն  ինչպես է սովորելու, որովհետև երբ Էվան դաս էր անում, իրեն ասում էինք, նստիր, դու էլ սովորիր, մյուս տարի դու էլ ես դպրոց գնալու, ասում էր, ինձ մոտ շատ հեշտ է ստացվելու, ես հաղթող եմ լինելու։ Քույրիկին տեսնելով` չէր ասում, ես էլ եմ ուզում գնալ դպրոց։ Իրենք զույգերի նման են, բայց բնավորությամբ շատ տարբեր են։ Յանան  շատ ավելի հավաք ու կենտրոնացած է, քան  Էվան։ Կարծես ինքը լինի մեծը»,– ժպիտով ասաց Մանոն, ապա հավելեց, որ առավոտյան Յանան արթնացել է  ու ասել` նենց լավ երազ եմ տեսել, տեսել էի, որ դպրոցում «երազանցիկ» եմ (ընդ որում` ոչ թե գերազանցիկ, այլ երազանցիկ)։

Սարգիսը միշտ նշում է, որ կինը երեխաներին ճիշտ տրամադրելու վարպետ է։ Մանոն էլ վստահ է, որ իրեն կհաջողվի Յանայի մեջ էլ սեր սերմանել ուսման հանդեպ։ Դրա համար նա իր բանաձևն ունի. «Ամեն ինչ կախված է մարդու հնարավորություններից և ծնողի` երեխային տրամադրելուց։ Պետք է կարողանաս սեր առաջացնել ուսման հանդեպ։ Չեմ ուզում, որ դպրոցն իրենց համար հոգս դառնա, դա պետք է հաճույք լինի»։

Մանոն ու աղջիկները մեկ ամիս է` երեխաների հետ պատրաստվում են սեպտեմբերի 1-ին։ Նոր պարագաներ գնելով մայրիկը հույս ունի խթանել աղջիկների հետաքրքրությանը դպրոցի հանդեպ։ «Սարգիսը լուռ հետևում էր ու ասում` ես չեմ հասկանում, ի՞նչ կա դպրոցին այսքան պատրաստվելու։ Դպրոցը սովորելու համար է։ Ասում էի` մենք աղջիկ ենք։ Երեխային պիտի ամեն կերպ տրամադրես, որ լավ ակնկալիքով գա դպրոց։ Իրենց պայուսակներից, գրիչներից սկսած ամեն ինչ  պատրաստել էինք։ Սկիզբը լավ ենք դրել։ Ես իրենց ասում էի` ձեզ համար գնում եմ այն, ինչ ուզում եք, որպեսզի հետո դուք  արդարացնեք իմ հույսերը։ Իրենք ինձ  խոստացել են, որ լավ են սովորելու և արժանի են լինելու այն ամենին, ինչ գնվել է իրենց համար»,– ասաց մայրիկը։

Դպրոցում աղջիկները համազգեստ են հագնելու։ Չնայած իր և դուստրերի թիթիզությանը` Մանոն սա շատ դրական է համարում։ Ասում է` թիթիզությունն իր տեղը պետք է ունենա, իսկ դպրոցում ամեն բան պետք է պատշաճ լինի։ Առհասարակ, Մանոն կարևորում է, որ իրենց ընտրած դպրոցում ամեն ինչ կարգուկանոնով է։

Սարգիսն ու Մանոն կկիսեն երեխաներին դպրոց տանել–բերելու պարտականությունը։ Ըստ Մանոյի` հաճախ երկուսով կտանեն երեխաներին, քանի որ արդեն կազմակերպել են գրաֆիկը, առավոտյան արթնանալու խնդիր էլ չունեն։

Լուսանկարները՝ Շուշան Անտոնյանի