Չհրապարակված լուսանկարներ Դավիթ Աղաջանյանի և Աննա Դովլաթյանի նշանդրեքի օրիգինալ խնջույքից

Դերասան Դավիթ Աղաջանյանի ու երգչուհի Աննա Դովլաթյանի անակնկալ նշանադրությունը կայացել էր Վարդավառին, սակայն արարողությանը ներկա չէին զույգի ընտանիքի բոլոր անդամները։ Օգոստոսի 27–ին կայացել է զույգի պաշտոնական նշանադրությունը, որին ներկա են եղել միայն ընտանիքի անդամները։ Զույգի նշանադրության ֆոտոշարքն արդեն պատրաստ է։  Նրանք այն առաջինը տրամադրել են Tert.am Life–ին։ 

Ընտանեկան հավաքույթի համար Դավիթն ու Աննան բացօթյա օրիգինալ խնջույք էին կազմակերպել։ Դավիթը նշեց, որ ամեն բան ինքն ու Աննան են կազմակերպել, դիզայնով ևս իրենք են զբաղվել։ Դավիթը վստահում է Աննայի ճաշակին, սակայն երգչուհին չի զլանում ամեն դետալ ընտրելիս հարցնել սիրելիի կարծիքը։ «Սկսած պլակատներից մինչև սեղանի վրայի լույսերը ես և Աննան  ենք պատրաստել։ Եթե իմ օգնության կարիքը լինում է, օգնում եմ, սակայն աշխատում եմ շատ չխառնվել, որովհետև վստահում եմ Աննային։ Ամեն դեպքում, նա միշտ հարցնում է իմ կարծիքը, ինչը կարևոր է»,– ասաց դերասանը։ Ի դեպ, նշանադրության զգեստը ևս Աննան է հեղինակել։

Դավիթը հայտնեց, որ հայկական ավանդույթներով նշանադրեք չեն արել։ «Ամեն ինչ արել ենք այնպես, ինչպես մենք էինք ուզում։ Մեր ընտանիքի անդամներից ոչ բոլորն էին ծանոթ միմյանց հետ։ Հենց այնտեղ ծանոթացան և տոնեցինք մեր նշանդրեքը։ Ամեն ինչ շատ լավ անցավ»,– ասաց նա։

Աննայի մատանին Դավիթն ընտրել էր առանց նրա կարծիքը հարցնելու, քանի որ մատանին ավելի վաղ էր տվել սիրելիին։ Ասում է`վստահ էր, որ այն դուր կգա Աննային. «Ինքը միշտ վստահել է իմ ճաշակին։ Ես էլ եմ վստահում իմ ճաշակին։ Այս անգամ էլ չէի սխալվել։ Աննան չափից շատ է հավանել մատանին»։

Հարսանիքի մասին զույգն առայժմ չի մտածում։ «Ամեն ինչ իր ժամանակն ունի։ Հիմա նշանադրության ժամանակն էր։ Կգա նաև հարսանիքի ժամանակը` գուցե 1 տարուց, գուցե` 2»,– ասաց դերասանը։

Նրա խոսքով` իրենց հարաբերություններում նշանադրությունից հետո ոչինչ չի փոխվել։ «Իրականում նշանադրությունը ոչինչ չի փոխել, ոչինչ չի ավելացել և չի  պակասել, քանի որ քո կողքին նույն մարդն է։ Գուցե, ամուսնությունից հետո ինչ–որ բան փոխվի կամ, նույնիսկ, ամուսնությունն էլ չփոխի, այլ երեխայի ծնունդը։ Նշանդրեքն ուղղակի ավանդույթ է, որին ավելի շատ կողմ են ծնողները։ Մենք էլ պահն օգտագործեցինք իրար ևս մի հաճելի պահ մատուցելու համար»,– նկատեց դերասանը։

Պաշտոնական նշանդրեքի ժամանակ Դավիթն ու Աննան միմյանց  հատուկ անակնկալներ չեմ մատուցել, թեև նվերները ևս անակնկալային են եղել։

«Միմյանց շատ լավ ու հիշարժան նվերներ ենք մատուցել, բայց չեմ ուզում բարձրաձայնել, թե ինչ։ Առհասարակ, նվերները չենք համաձայնեցնում, որպեսզի հետաքրքիր լինի»,– ասաց նա։

Զրույցի վերջում Դավիթը շնորհակալություն հայտնեց VIP wedding փրոդաքշընին, որը նկարահանել է նշանդրեքը և արել ֆոտոշարքը։