Ինչպես է նկարահանվել Ռազմիկ Ամյանի նոր տեսահոլովակը Բուլղարիայում

Երգիչ Ռազմիկ Ամյանն այսօր իր երկրպագուներին ներկայացրեց նոր տեսահոլովակ` հեղինակային` «Իմ աշխարհն ես» երգի հիման վրա։ Նորությունն անակնկալ էր երկրպագուների համար. երգիչը քչախոս է, ապագա ծրագրերի մասին, գրեթե, չի պատմում, միանգամից նորությունն է ներկայացնում։ Տեսահոլովակի նկարահանման մանրամասները երգչի պրոդյուսեր Արմին Մովսիսյանը վստահել է Tert.am Life–ին։

Տեսահոլովակը նկարահանել են Բուլղարիայի 3 քաղաքում։ Այն սյուժետային գիծ չունի, ներկայացնում է, թե ինչպես է Ռազմիկի մոտ ծնվում նոր երգը։ Մտահղացումը եղել է Արմին Մովսիսյանինը, այնուհետև թիմին է միացել ռեժիսոր Կարեն Ամյանն ու իրականացրել գաղափարը։

«Որոշեցինք տեսահոլովակը նկարահանել Բուլղարիայում, քանի որ շատ գեղեցիկ տեղեր կային։ Երգը շատ գեղեցիկ է, չցանկացանք, որ սյուժեն խանգարող հանգամանք լինի։ Երգին շատ բան պետք չէր, ամառային տրամադրություն բավական էր»,– ասաց Արմինը։

Կարենն էլ նկատեց, որ երգն այնքան գեղեցիկ էր, որ իրենց մնում է միայն նկարահանել գեղեցիկ տեսարաններ. «Չէինք ցանկանում ունենալ ընդգծված հերոս և հերոսուհի։ Աղջիկն այս դեպքում ներկայանում է որպես մուսա։ Առաջնային խնդիր էր, որ ունենայինք  ջուր, արև և Ռազմիկ Ամյան։ Գաղափարն այն է, որ քայլելու ընթացքում Ռազմիկն իր մտքերի մեջ է և ծնվում է երգը»։

Հերոսուհու վրա հատուկ շեշտադրում չկա։ Կարևոր էր միայն, որ նա լինի պարուհի, քանի որ տեսահոլովակը ճկունություն էր պահանջում։ «Նկարահանման ժամանակ մի փոքր վախ կար, քանի որ ճոճանակի տեսարանում նա գետնից մոտ 5 մետր բարձրության վրա էր, սակայն ամեն ինչ բարեհաջող ավարտվեց»։ Ռազմիկը չի խառնվել հերոսուհու ընտրությանը։ Ռեժիսորը կարևորել է, որ աղջիկը բնական գեղեցկություն ունենա և պլաստիկ վիրահատություններ չունենա։

Կարենը կարևորեց, որ թե՛ Ռազմիկը, թե՛ Արմինը չեն սահմանափակում ռեժիսորին և լսում են նրա մասնագիտական կարծիքը։ Ռեժիսորը նկատեց, որ արտերկրում նկարահանումներ անելն ավելի բարդ է։ Իրենց համար լրացուցիչ բարդություն է եղել հանգստի սեզոնը։ «Ափերը լիքն էին։ Նկարահանումներն անում էինք առավոտյան  ժամը 5–ին և երեկոյան։ Այդպես 3 օր։ Երբ արևը շատ էր բարձրանում, արդեն հանդիսատես էր հավաքված լինում։) Օտարազգի մարդիկ նկարվում էին Ռազմիկի հետ, հարցնում էին` ինչպես կարող են գտնել նրա ստեղծագործությունները։ Նկարահանումների ընթացքում արդեն հասկացանք, որ երաժշտությունը շատ է դուր գալիս  մարդկանց, երաժշտությունը լեզու չունի»,– նշեց Կարենը։

Տեսահոլովակի թեմայի ընտրությունը` ստեղծագործական պրոցես, պատահական չէ։ Վերջին շրջանում Ռազմինը ներկայացնում է միայն հեղինակային երգեր։ Առաջիկայում է նա ներկայանալու է միայն հեղինակային երգերով։ Ըստ Արմինի` դա ինքնաբերաբար է ստացվել. «Նա գրեց երգեր, որոնք դուր եկան ժողովրդին։ Հասկացանք, որ կարող է ներկայացել իր երգերը։ Արդեն ստեղծվել է ձեռագիր, որը ճանաչելի է հանդիսատեսի կողմից։ Առաջիկայի համար էլ մի շարք նոր երգեր ունենք»։ Մինչև տարեվերջ Ռազմիկը կներկայացնի ևս մեկ երգ, սակայն առանց տեսահոլովակի։ «Բալիկ» կոչվող հեղինակային երգը Ռազմիկը նվիրել է բոլոր երեխաներին` իր երեխաների գլխավորությամբ։

Որպես հեղինակ–կատարող` Ռազմիկ Ամյանի ճանապարհի սկիզբը խոստումնալից էր։ Նրա «Չունի Աշխարհը քեզ նման», «Սիրեմ քեզ, լիանամ» և մյուս երգերը հիթեր դարձան։ Հիմնվելով առաջին արձագանքների վրա` Արմինը կանխատեսում է, որ այս երգն էլ կսիրվի հանդիսատեսի կողմից. «Մինչև պաշտոնական պրեմիերան երգն անհասկանալի ձևով տարածվել էր։ Մենք շատ դրական արձագանքներ էինք լսում։ Փառք Աստծո, երգը լավ արձագանքներով ունեցավ»։

Օգոստոսին Ռազմիկը մենահամերգ ունեցավ ԱՄՆ–ում, որի ժամանակ ևս հիմնականում ներկայացրել է իր հեղինակային երգերը։ Համերգի տոմսերը շատ արագ են սպառվել, ինչը ոգևորիչ էր նրա համար։ «Առաջին համերգի տոմսերը ժամանակից շուտ սպառվեցին, որոշեցինք երկրորդ համերգ էլ անել։ Այս անգամ ևս տոմսերը մեծ արագությամբ սպառվեցին։ Կազմակերպիչներն արդեն խոսում էին երրորդ համերգն անելու մասին, սակայն դա կմնա հաջորդ տարի, որովհետև այս տարի այլևս ժամանակ չունենք։ Շնորհակալ ենք հանդիսատեսին` ակտիվության և ջերմության  համար։ Երգչի համար շատ կարևոր է, երբ համերգի տոմսերն այսպիսի արագությամբ են վաճառվում»,– ասաց պրոդյուսերը, ապա հավելեց, որ այս ծրագիրն առաջին անգամ ներկայացրել է հայաստանաբնակ հանդիսատեսին` նախորդ տարի նոյեմբերի 17-ին` Ուսանողների միջազգային օրվա առթիվ կայացած մենահամերգով։