«Հետհաշվարկ». Խորեն Լևոնյանը, Անի Երանյանը և Սոս Ջանիբեկյանը` Ելենա Արշակյանի նոր հոգեբանական թրիլլերում

Խորեն Լևոնյան, Անի Երանյան, Սոս Ջանիբեկյան. այս կազմով է նկարահանվում ռեժիսոր Ելենա Արշակյանի նոր «Հետհաշվարկ» 24 մասանոց հոգեբանական թրիլլերը, որը կլինի Ucom ցանցում գործող «Արմենիա Պրեմիում» հեռուստաալիքի եթերում։ Ելենա Արշակյանը Tert.am Life–ին է պատմել դրամայի առաջին մանրամասները և տրամադրել լուսանկարներ նկարահանման հրապարակից։

«Այս նախագիծը դուրս է իմ ու Անահիտ Մխիթարյանի աշխատանքային ոճից։ Մենք թաթախվել ենք մի բանի մեջ, որը երկուսիս համար էլ ուրիշ աշխարհ է։ Երկուսիս համար էլ ռիսկային է սկսել այսպիսի գործ, որովհետև էս տեսակ սցենարով դեռ չենք աշխատել»,– ասաց Ելենան ու հավելեց, որ ունեն դերասանական լավ կազմ։ Ֆիլմում նկարահանվում են նաև Սամվել Սարգսյանը, Գուժ Մանուկյանը, Վարդան Հովսեփյանը, Քրիստինա Կույումչյանը և այլք։

Ucom ընկերության գլխավոր տնօրեն Հայկ Եսայանն էլ, խոսելով նոր նախագծի մասին, ասաց. «Ուրախ ենք, որ հեռուստատեսային շուկան շարունակում է զարգանալ՝ Ucom ցանցի հեռուստադիտողներին հրամցնելով զանազան ու որակյալ հեռուստաարտադրանք: Հիշեցնեմ, որ այս հոգեբանական թրիլլերի յուրաքանչյուր նոր մաս Ucom-ի բաժանորդները կարող են մեկ օր շուտ դիտել Տեսավարձույթ բաժնում»:

Խորեն Լևոնյանի և Սոս Ջանիբեկյանի հետ Ելենան առաջին անգամ է աշխատում։ Ռեժիսորը խոստովանեց, որ մինչև նկարահանումների մեկնարկը երկկողմանի լարվածություն կար։ «Նախապատրաստական փուլում կար լարվածություն և՛ իմ, և՛ իրենց կողմից։ Դա պայմանավորված էր նրանով, որ չէինք աշխատել իրար հետ։ Երբ նկարահանման հրապարակում կա երկկողմանի վստահություն և ամեն մեկն իր գործով է զբաղվում, ամեն ինչ իր տեղն է ընկնում,– ասաց նա ու հավելեց, որ իր համար շատ կարևոր էր  Խորեն Լևոնյան–Անի  Երանյան–Սոս Ջանիբեկյան եռյակի համադրությունը։ –Նկարահանումները դեռ ընթացքի մեջ են, կվախենամ գնահատական տալ, բայց կարծում եմ, որպես խաղընկերներ, իրենք արդեն զգում են իրար։ Դերասաններն առաջին հերթին պետք է կարողանան որպես մարդ շփվել իրար հետ։ Կարծում եմ` արդեն ընկերացել են։ Երեքն էլ լավ են տրամադրված, ուզում են, որ լավ արդյունք լինի և ամեն ինչ անում են դրա համար»։

Ելենան նշեց, որ հեռուստադիտողները նորովի կտեսնեն Սոս Ջանիբեկյանին, քանի որ այսպիսի դեր նա դեռ չի խաղացել։ «Բավականին բարդ ու աշխատատար կերպար է։ Սոսի հետ շատ հեշտ է աշխատել։ Նա շատ հանգիստ մարդ է և շատ է աշխատում կերպարի վրա. պրպտում է, ուզում է հասկանալ` ինչու կերպարն այս քայլն արեց։ Դա շատ գովելի է։ Սոսը, իսկապես, բավականին բարդ դեր է խաղում»,– ասաց ռեժիսորը։

Թե ինչ կերպարով է ներկայանում Խորեն Լևոնյանը, Ելենան չբարձրաձայնեց։ Անդրադառնալով համագործակցությանը` նշեց, որ միշտ հեշտ է աշխատել իրենց գործի մասնագետների հետ։ «Ես շատ կուզեի, որ հայ դերասանների 1 տոկոսը Խորեն Լևոնյանի պես դերասան լիներ։ Երջանիկ կլինեի միշտ աշխատել այդ կարգի պատրաստակամ և իր գործին նվիրված մարդու հետ։ Խորեն Լևոնյանն այն մարդկանցից է, ով սիրում է իր մասնագիտությունը և ամեն ինչի պատրաստ է` լավ արդյունք ստանալու համար»,– ասաց նա։

Ինչ վերաբերում է Անի Երանյանին` Ելենան նրա հետ աշխատելու տարիների փորձ ունի, թեև իրենց համագործակցությունը տևական ժամանակ է` դադարել էր։ «Անիի հետ աշխատանքս կարոտել էի, որովհետև մոտ 4 տարի է` միասին չենք աշխատել։ Երկուսս էլ իրար կարոտել էինք նկարահանման հրապարակում։ Ես շատ լավ գիտեմ` Անի Երանյանի հնարավորությունները։ Հիմա փորձում ենք այնպես աշխատել, որ կարողանանք հանդիսատեսին հասցնել մեր ստեղծած կերպարի ներաշխարհը։ Անին բավականին բարդ բնավորությամբ աղջկա կերպար է կերտում, թեև նմանատիպ տեսարաններ նախկինում էլ ունեցել է»,– նշեց ռեժիսորը։

Ֆիլմի սյուժեն պատմել Ելենան չցանկացավ, միայն նշեց, որ այն ներելու ունակության մասին է։ Հերոսների ճակատագրերը զուգահեռ են զարգանում։

«Իմ ֆիլմում չկան բացասական ու դրական կերպարներ։ Երեքի կյանքում էլ ինչ–որ իրադարձություններ են տեղի ունեցել, որից հետո երեքն էլ պետք է կարողանան ներել։ Ես բացառում եմ, որ ֆիլմը խրատական բնույթ կրի, սակայն ես` իմ փորձից, սցենարիստ Անահիտ Մխիթարյանը` իր փորձից ելնելով ուզում ենք իմաստալից դարձնել ֆիլմը և մեր մեսիջն ունենալ դեպի մեր հեռուստադիտողը։ Մենք անդրադարձել ենք ներելու գաղափարին, որը կարևորագույն պայման է հեշտ ապրելու համար։ Ֆիլմը ներել կարողանալու մասին է»,– ասաց ռեժիսորը։

Թե հերոսների ճանապարհներն ինչպես են խաչվում, սիրային գծեր կա՞ն, թե ոչ, Ելենան բացահայտել չի ցանկանում։