Միքայել Շարաֆյանի նշանադրությունն ու հայտնի հյուրերը

ՀԽՍՀ վաստակավոր արտիստ Լևոն Շարաֆյանի կրտսեր որդին՝ դիզայներ, զգեստների նկարիչ Միքայել Շարաֆյանը, որը «Հարսնացուն Վեգասից» ֆիլմում ներկայացել է որպես դերասան,  օրերս նշանվել է։ Արարողության առաջին լուսանկարներն ու մանրամասները Միքայելը վստահել է Tert.am Life–ին։

31–ամյա դիզայների ընտրյալը 21–ամյա Նարեն է։ Զույգը ծանոթացել է Ֆեյսբուք սոցիալական ցանցի միջոցով։

«Նարեն ինձ ընկերության առաջարկ էր ուղարկել։  Մենք շփվում էինք, մտերմացանք, սակայն սկզբում ոչ մի լուրջ բան չկար։ Հետո հասկացանք, որ իրար շատ նման ենք, լավ հասկանում ենք։ Նարեն իմ ոլորտից չէ, ինչը շատ լավ է։ Ինձ նաև դա ձգեց։ Մենք տարբեր ասպարեզներից ենք, միաժամանակ, շատ նմանություններ ունենք։ Նարեն բիզնես–մենեջմենթ է սովորում, բայց շատ է գնահատում արվեստը։ Ինձ համար դա, իսկապես, կարևոր է»,– պատմեց Միքայելը, ով սիրելիին ամուսնության առաջարկություն է արել այս տարվա հունիսին, երբ Երևանում էր։

Դիզայները նկատեց, որ իր հետ հեշտ չէ, սակայն Նարեին հաջողվում է շրջանցել բարդությունները։ Անդրադառնալով իր բարդ կողմերին` դիզայներն ասաց, որ դժվար է 2 խոսքով նկարագրել, սակայն գործունեությունն էլ իր ազդեցությունն է ունեցել բարդության վրա։ Միքայելի համար շատ կարևոր է եղել, թե Նարեն իրեն ինչպես կդրսևորի իր միջավայրում, սիրելին «փորձությունը» պատվով է հաղթահարել։ «Իմ գործունեության  բերումով շատ եմ լինում տարբեր  միջոցառումների։ Իմ նախկին ընկերուհիները չեն դիմացել դրան։ Նարեն գնահատում է դա։ Թեստի նման եղավ, տարբեր միջոցառումների գնացինք միասին, տեսա, թե ինչպես իրեն դրսևորեց։ Հարաբերությունների մեջ շատ կարևոր են մանրունքները։ Երբ մանրունքները գեղեցիկ են, հարաբերութուններն էլ են  գեղեցիկ ստացվում։ Նախկինում միշտ աչքերս փակում էի մանրունքների վրա, ասում էի` պետք է կոմպրոմիսի գնալ, բայց ես արդեն 31 տարեկան եմ և հասկանում եմ, որ կոմպրոմիս պետք չէ։ Պետք է իրար հասկանալ 100 տոկոսով։ Ինձ համար շատ կարևոր է, որ մենք ընկերներ լինենք»,– ընդգծեց Միքայելը։

Միքայելը նշեց, որ ընտանիքի անդամներն էլ են շատ սիրում Նարեին. «Նա շատ անմիջական աղջիկ է, նման է մեզ, դրա համար շատ հեշտ ստացվեց շփումը»։

Նարեն Երևանից է։ Շուտով կմեկնի Հունաստան սովորելու, այնուհետև կտեղափոխվի ԱՄՆ, որտեղ էլ 2018 թվականի օգոստոսին կկայանա զույգի ամուսնությունը։ «Իմ ընտանիքն ու շրջապատը Լոս Անջելեսում են։ Ավելի հեշտ կլինի այնտեղ կազմակերպել ամեն ինչ։ Իհարկե, այստեղ էլ ունեմ բարեկամներ, սակայն մեծ մասն ԱՄՆ–ում են բնակվում»,– ասաց Միքայելը։ Վերջինս հոկտեմբերի 10–ին կմեկնի ԱՄՆ։

Ինչ վերաբերում է հարաբերությունների վրա տարածության ազդեցությանը`  դիզայներն ասաց, որ հիմա կարոտը հաղթահարելն ավելի հեշտ է, քանի որ գոյություն ունեն սոցիալական ցանցեր, տեսազանգեր, որոնք հեշտացնում են շփումը։