Լուսինե Թովմասյան. «Եթե նորից «Միսս Հայաստան» կազմակերպվի, շատ անլուրջ կլինի»

«Միսս Հայաստան» գործակալության նախագահ Կարեն Արիստակեսյանը հայտարարել է, որ  պատրաստվում է «Միսս Հայաստան» նոր մրցույթ անցկացնել: Ըստ նրա` 2012–ին կազմակերպված մրցույթն իր մակարդակով ավելի լավն էր, քան օրեր առաջ կազմակերպված «Միսս Արմենիան»։

Tert.am Life–ը հետաքրքրվել է, թե ինչ կարծիք ունի այս մասին «Միսս Հայաստան 2003», «Վիցե Միսս Եվրոպա 2006» Լուսինե Թովմասյանը, որը  հանդիսանում էր «Միսս Արմենիայի» ժյուրիի անդամ։

Չնայած Լուսինեն համաձայն չէր Լիլիի հաղթանակի հետ և նշում է, որ Լիլին իր համար լավագույն հնգյակում էր, սակայն ոչ «Միսս Արմենիա», ինքը որպես հաղթող տեսնում էր Արփինե Հարությունյանին, գեղեցկուհին կարծում է, որ երկրորդ «Միսս Հայաստանի» կարիք չկա։ Լուսինեն նկատեց, որ այսպիսի քննարկումները միայն վնասում են մրցույթի հեղինակությանը։ 

«Այնպես չէ, որ 2012-ի թվականին կազմակերպված «Միսս Հայաստանը» շատ լավն էր, սակայն չեմ էլ կարող ասել, որ այս տարի այն անցկացվեց առանց խնդիրների։ Իհարկե, կային խնդիրներ, սակայն տարվա ընթացքում պետք է լինի մեկ «Միսս Հայաստան»։ Այն, ինչ տիրում է  հենց հիմա, կարծում եմ, շատ վատ է և բացասական կանդրադառնան հեղինակության վրա։ Չգիտեմ, էլ ո՞վ կցանկանա  մասնակցել այս մրցույթին։ Եթե նորից «Միսս Հայաստան» կազմակերպվի, շատ անլուրջ կլինի։ Հետագան չեմ էլ ուզում պատկերացնել»,– ասաց Լուսինեն, ապա հավելեց, որ իր կարծիքով մրցույթը պետք է անցկացվեր այն ժամանակ, երբ լուծված կլինեին դատական բոլոր հարցերը։

«Ես հասկացել եմ, որ պետք է մինչև այդ լուծվեին դատական բոլոր հարցերը, հետո միայն կազմակերպվեր մրցույթը, որպեսզի էսպիսի խոսակցություններ չլինեին, աղջկանից  թագը չվերցնեին։ Այսպես ամեն ինչ շատ սխալ էր։ Շատ բացթողումներ եղան հապճեպ կազմակերպման արդյունքում»,– ասաց նա։

Ինչ վերաբերում է Արիստակեսյանի նշած չափորոշիչներին, որ աղջիկները պետք է լինեն 90/60/90 համաչափությամբ, հասակը պետք է լինի 1.70 և ավելի,  լողազգեստները պետք է  լինեն միատեսակ, զգեստները` միատեսակ և միատոն, կոշիկը` 7 սմ–ից ոչ ավելի, պլաստիկ վիրահատություններն էլ բացառվեն, Լուսինեն նշեց, որ «90/60/90 համաչափությամբ մրցույթ անցկացնել հնարավոր չի լինի, սակայն պլաստիկ վիրահատությունների բացակայության հետ  համաձայն է։ «Իհարկե, պլաստիկա պետք է չլինի, սակայն հիմա աղջիկների մեծ մասը վիրահատել են քիթն ու մեծացրել շուրթերը։ Այս դեպքում, պլաստիկան գոնե պետք է ակնառու չլինի»,– նկատեց Լուսինեն։