«Իմ մասնակիցներն ինձ շատ նման են». Արամեն` «Հայաստանի ձայնի» առաջին եթերում շատ քիչ մասնակցի ելույթից պտտվելու պատճառների և իր թիմի մասին

«Արմենիա TV»–ի եթերում մեկնարկել է «Հայաստանի ձայնը» նախագիծը, որն ամեն տարի դառնում է բուռն քննարկումների թեմա։ Այս անգամ «Կույր լսումների» փուլը քննարկվեց ժյուրիի խստապահանջության տեսանկյունից։ Քիչ էին մասնակիցները, որոնց դեպքում պտտվում էին ժյուրիի բոլոր անդամները։ Չնայած Արամեի կերպարը խիստ չէ, առաջին եթերից հետո նա ձեռք բերեց ամենախիստ ժյուրիի համբավը, քանի որ առաջին եթերի ընթացքում շատ քիչ մասնակիցներ են ստիպել Արամեին շրջվել։

Tert.am Life–ն Արամեի հետ զրուցել է այն մասին, թե ինչպես են անցել «Կույր լսումների» նկարահանումները, որքանով էին իր պատկերացումները համապատասխանում իրականությանը։ Արամեից հետաքրքրվել ենք նաև, թե ինչն իրեն չէր բավարարում մասնակիցների ելույթներում, որ այդքան քիչ պտտվեց։

«Ամեն անգամ մի բան էր պակասում։ Երբ դիտեցի եթերը, հասկացա, որ եթե կրկնեին մրցույթը, նույն կերպ կվարվեի։ Ես, գրեթե, չեմ փոշմանել իմ ընտրության համար։ Չեմ կարող ասել, որ ես խիստ եմ։ Դա առաջին եթերն էր. հետագա ընթացքը ցույց կտա, որ ես այդքան էլ խիստ չեմ։ Պարզապես ես շատ ուշադիր էի, որովհետև ինձ համար կարևոր է, որպեսզի այն աշխատանքը, որը սկսել եմ, լիարժեք անեմ։ Մենք հանդիպեցինք շատ ու շատ տաղանդավոր մարդկանց։ Բնականաբար, բոլոր լավ երգողները չէին կարող  հայտնվել նախագծում։ Ես բոլորին կարող էի ընտրել, սակայն կա ձևաչափ` քանակը սահմանափակ է, և ես փորձում էի մաքսիմալ զգույշ լինել։ Ես  պետք է մաքսիմալ հուզվեի, զգայի, որ ձայնի մեջ կա գեղեցկություն, ոչ թե միայն նոտաների շարան, որը նա երգում է։ Ինձ համար դա  շատ կարևոր է, որովհետև ես իրենց համար ընտրելու եմ երգեր, որոնք ոչ միայն պետք է կատարեն, այլև զգան, կարողանան լիարժեք փոխանցել հանդիսատեսին։ Վատ չէ, երբ վոկալիստը կարողանում է շատ լավ երգել, սակայն  ես միայն դա չեմ դիտարկել։ Կտեսնեք, որ իմ թիմի մասնակիցները տարբեր են և յուրաքանչյուրն իր մեջ գեղեցիկ մի բան ունի»,– ասաց Արամեն։

Խոսելով ակնկալիքների և իրականության բախման մասին` երգիչը նկատեց, որ, սովորաբար, պատկերացումները չեն համապատասխանում իրականությանը, սակայն ընթացքն իր համար շատ հետաքրքիր էր։ Արամեն նշեց, որ ինքն իր ընտրությունն արել է` առաջնորդվելով անձնական փորձով։

«Ես վստահել եմ միայն իմ ականջներին, իմ սրտին, որպեսզի ընտրեմ իմ մասնակիցներին։ Ես ձևավորել եմ ինձ շատ հոգեհարազատ թիմ։ Իմ թիմում, գրեթե, չկան մասնակիցներ, ում ես չկարողանամ հասկանալ, չիմանամ, թե մենք ինչ պետք է անենք։ Երբ հետևում եմ  իմ մասնակիցներին, հասկանում եմ, որ նրանք ինձ շատ նման են։ Ես չեմ խոսում երգելու մասին, խոսում եմ բնավորության գծերի, մարդկայինի մասին։ Փորձում եմ իրենց պատրաստել կարևոր մի փուլի, որն իրենց կտանի դեպի ճանաչում։ Տա Աստված, որ հանդիսատեսը սիրի նրանց այնպիսին, ինչպիսին կան։ Դա շատ կարևոր է»,– նկատեց երգիչը։

Արամեն ի սկզբանե ասել էր, որ ուշադրություն է դարձնելու հայալեզու կատարումներին։ Երգիչը նշեց, որ իր թիմում կան մարդիկ, որոնց ընտրել է հայալեզու կատարումներով, սակայն հայկական երգերի կատարումները չեն փայլել։

«Ես շատ ուշադիր էի այդ կատարումներին և նրանցից ընտրել եմ մասնակիցներ։ Ճիշտ է, իրենց կատարումները չեն եղել լիարժեք, սակայն նրանք ինձ հուզել են։ Ես լսել եմ այն, ինչ ինձ այդ պահին պետք է եղել և պտտվել եմ։ Ընթացքն ինձ լիովին դուր է գալիս։ Ես հանգիստ եմ  ու ազատ երգերի ընտրության հարցում, որովհետև ունեմ մասնակիցներ, ում կարող եմ խնդիրը տալ, որպեսզի նրանք կատարեն։ Թե ինչպես կկատարեն, իրենցից է կախված։ Ես նրանց պետք է օգնեմ, բայց իրենց փոխարեն բեմ չեմ բարձրանալու»,– եզրափակեց նա։