«Նման բան իմ կյանքում չէր եղել ու հուսով եմ՝ էլ չի լինի». Գարիկը` «Սուպեր մամա 2»–ում իր կերպարի և բարդությունների մասին

«Սուպեր մամա 2» ֆիլմն արդեն մեծ էկրաններին է։ Եթե 3 տարի առաջ «Սուպեր Մամա 1»–ի անոնսը դիտելիս մի պահ կանգ էիր առնում` հասկանալու` այս կինը Հայկո՞ն է, այս անգամ անոնսը դիտելիս «ստոպ» եղավ, երբ էկրանին հայտնվեց Գարիկը։ Ֆիլմի երկրորդ մասի գլխավոր շեշտադրումներից մեկը դերասանի կերպարանափոխությունն էր։

Գարիկին կնոջ կերպարով հեռուստադիտողները շատ են տեսել, սակայն այս անգամ պահանջվում էր բոլորովին այլ աշխատանք։ Առաջին հերթին աչք է զարնում պրոֆեսիոնալ դիմահարդարումը, որով նույնիսկ Գարիկն իրեն դժվարությամբ է ճանաչում, սակայն ֆիլմում շատ կարևոր է և դերասանական մեծ վարպետություն է պահանջում ձայնի փոփոխությունը, որտեղ էլ ի հայտ են եկել իրական բարդությունները։

Ի դեպ, Հայկ Մարությանը կատակում էր, որ սկսել էր խանդել Գարիկի կերտած հերոսուհուն։ Ցուցադրությունից հետո կարելի է փաստել, որ ի դեմս Գարիկի կերպարի` դերասանն իսկապես լուրջ «մրցակից» ուներ։ Ֆիլմի ցուցադրությունից հետո Tert.am Life–ի հետ զրույցում Գարիկն ասաց, որ երկրորդ անգամ էր դիտում այն, այս անգամ`իր հուզմունքային դաշտն ավելի հանգիստ էր։

«Քանի որ նախադիտում ենք ունեցել, լարվածությունն անցել է, ավելի սթափ էի դիտում։ Ամեն ինչ համեմատության մեջ է հասկանալի։ Համեմատելով «Սուպեր մամա 1»–ի հետ` ես կասեմ, որ սա կես քայլ առաջ էր` հուսով, որ հանդիսատեսը կտեսնի մեկ քայլ  առաջ»,– ասաց Գարիկը` զգուշանալով գնահատական տալ, քանի որ ֆիլմի իրական գնահատողը հանդիսատեսն է։

Գարիկից հետաքրքրվեցինք` արդյոք սա մեկ քայլ առաջ է համարում նաև իր կարիերայում` հաշվի առնելով, որ յուրաքանչյուր դերասանի համար կարևոր է նորովի ներկայանալ։ «Հայկն ասում է, որ աճել ենք և՛  բյուջեով, և՛ անձնակազմով։ Հուսով եմ` ես էլ, որպես ֆիլմի դերասան, ինչ–որ մի նոր բան սովորած կարողացա անել։ Որպես դերասան` ինձ համար նոր փորձություն էր, որը կարող էր չստացվել։ Եթե պարզվի, որ ստացվել է, այդ ժամանակ կդիտարկեմ, որ սա քայլ առաջ էր։ Գնահատողը հանդիսատեսն է։ Այս փորձն ինձ կյանքում պետք չէր, սա արել եմ` հուսով, որ ինչ–որ մեկին ժպիտ կպարգևեմ և ֆիլմը կհասնի իր նպատակին»,– ընդգծեց նա։

Գարիկի «չարչարանքները» ֆիլմում սկսվել են շպարից։) «Մինչև այս էլի էի խաղացել կանանց դերեր, բայց դա սահմանափակվում էր կեղծամով և զգեստով։ Այս դեպքում 7-8 ժամ, մեկ անգամ, նույնիսկ, 13 ժամ եղել եմ այդ շպարով, որն անընդհատ թարմացնում էին։ Եթե մինչ այս կերպարը մարմնավորելը ինձ մոտ հարց էր առաջանում շատ դիմահարդարում անող աղջիկների հետ կապված, հիմա առհասարակ չեմ հասկանում, թե ինչպես կարելի է ապրել այդ  դիմահարդարմամբ։ Նման բան իմ կյանքում չէր եղել ու հուսով եմ՝ էլ չի լինի»,– ժպիտով նշեց դերասանը։

Թեև նա այդ շպարով եղել է ամռան տապին, դերասանի համար իրական բարդությունները սկսվել են ձայնի փոփոխության ժամանակ։ «Խնդիրներ ունեի կերպարի ձայնը կերտելու հետ, խռպոտությունը հաղթահարել  չէի կարողանում, բայց պարզվեց, որ մեթոդ կա նման ձայն ստանալու: Դասընթացներ անցա»,– ասաց նա։

Գարիկի համար կերպարի նախատիպ է դարձել իրենց գրասենյակի աշխատակցուհիներից մեկը։ Նա պատմում է, որ ռեժիսորի հետ կերպարը քննարկելիս երկխոսություն է սկսել մի աղջկա հետ, հենց այդ պահին ֆիքսել նրա ժեստերն ու ընդօրինակել կերպարի համար։ 

Ֆիլմից հետո շտկումներ անել դերասանը չէր ցանկանա, քանի որ սահմանը նուրբ էր։ «Շտկելը ենթադրում է անել ավելին։ Կարծում եմ` եթե ինչ–որ բան ավելին անեի, չափը կանցնեի։ Ռեժիսորների հուշումով գտել էի կերպարի ճիշտ սահմանը։ Դերը պարտադրում էր սանձարձակ, մի քիչ զզվելի լինել։ Կարծում եմ` սա վերջին խազն էր։ Ավելին, երևի գռեհիկ կնայվեր»,– եզրափակեց դերասանը։