Հաղորդավարուհի Աննա Գևորգյանը` ոճային կտրուկ փոփոխության, Դիանա Մալենկոյին նմանվելու և 21TV վերադառնալու մասին

«Ես Աննան եմ». շատերին հայտնի արտահայտությունը կրկին հնչում է 21TV–ի եթերից։ Տարիների դադարից հետո հաղորդավարուհի Աննա Գևորգյանը վերադարձել է 21TV և կրկին վարում է երաժշտական տասնյակ։ Աննան առաջինը Tert.am Life–ին է պատմել այս մասին։ Հաղորդավարուհու հետ խոսել ենք գործունեության նոր փուլի և ոճային կտրուկ փոփոխության և արտաքնապես Դիանա Մալենկոյին նմանվելու մասին։

Տարիներ առաջ Աննան նշում էր, որ արդեն իրեն տեսնում է լրատվական ձևաչափում, երաժշտական ձևաչափ վերադառնալ չի կարող։ Տարիներ հետո, սակայն, նա վերադարձավ հարազատ հեռուստաալիք` միևնույն ծրագրով։

«Վերջերս քանիցս հանդիպեցինք, զրույցներ ունեցանք նախկին գործընկերներիս հետ` հասկանալու, թե ինչ կարող ենք միասին անել։ Խոսեցինք ու հասկացանք, որ առայժմ կարող եմ երաժշտական տասնյակով վերադառնալ եթեր, եթե ընթացքում երկկողմանի ցանկություն լինի, կմտածենք նաև այլ նախագծի մասին։ «Դար 21»–ը հիմա փոխել է իր ձևաչափը։ Եթե այն ժամանակ դեռահասների համար էր, հիմա փորձում են մի քիչ փոխել թիրախը»,– ասաց հաղորդավարուհին, որը հետքայլ չի համարում տարիներ անց կրկին նույն նախագիծը վարելը։ «Ինձ առաջարկեցին նոր նախագծեր, սակայն չհամաձայնեցի, քանի որ աշխատանքը ծավալուն էր։ Այս դեպքում շաբաթական մեկ նկարահանում ունեմ, կարողանում եմ համատեղել»,– նշեց նա։

Հաղորդավարուհու խոսքով` վերջին շրջանում բուռն գործունեության մեջ է, տարբեր նախագծերում է ներկայանում։ Մի քանի օր առաջ նկարահանվել է Սոսո Պավլիաշվիլիի տեսահոլովակում։

Այսօր էլ կայացավ երգիչ Արման Աղաջանյանի նոր տեսահոլովակի պրեմիերան։ Ռուբեն Մխիթարյանի հեղինակային «Անձրևից հետո» երգի տեսահոլովակում ևս Աննան է նկարահանվել։ «Վերջերս զբոսաշրջիկների համար նախատեսված տեսանյութ էր նկարահանվում, որում մասնակցություն ունեինք նաև ես ու ամուսինս։ Ռեժիսորը Գրիգ Վահրամյանն էր։ Հենց այդ ժամանակ էր նկատել ինձ ու առաջարկեց նկարահանվել նաև Աղաջանի տեսահոլովակում»,– ասաց նա։

Ինչ վերաբերում է ոճային փոփոխությանը, որով նա ներկայացել է տեսահոլովակում, պարզվում է, ամեն ինչ հարթ չի ընթացել։ Աննան ոճային փոփոխություն սկսել է անել տարեսկզբից։ Պարբերաբար կտրելով մազերը` հիմա ունի շատ կարճ սանրվածք, իսկ գույնի մասին դժվար է ասել, քանի որ երբեք չես իմանա` հաջորդ պահին Աննան ինչ երանգի մազերով կներկայանա։) «Չի լինում, որ 2 շաբաթ մի սանրվածքով մնամ, անընդհատ թարմացնում եմ կտրվածքը, փոխում եմ երանգը։ Ես մոտ 10 օր եմ մուգ մազերով եղել։ Իրենք ինձ հենց այդ շրջանում էին տեսել և հավանել։ Երբ գնացի նկարահանման, արդեն շատ բաց երանգի մազերով էի։ Խնդրի առաջ կանգնեցինք։ Նույն պահին մազերս ներկեցինք գուաշով։ Քարացած սև մազերով նկարահանվեցի»,– պատմեց հաղորդավարուհին։

Նոր սանրվածքով Աննան բավականին նմանվել է դերասանուհի, հաղորդավարուհի Դիանա Մալենկոյին։ Թեև հաղորդավարուհին կարծում է, որ իր սանրվածքն ավելի շատ նման է մոդել Աննա Գրիգորյանի սանրվածքին, կերպարային նմանություն տեսնում է Դիանայի հետ։ «Տարիներ առաջ, երբ Մալենկոն եկավ «Դար 21», ես հեռուստաընկերության ոճաբանն ու դիմահարդարն էի։ Ես իր մեջ տեսա իմ մանկությունը։ Նա, գրեթե, 10 տարով փոքր է ինձանից, բայց մեր միջև շատ են զուգահեռներ տարել։ Ես չեմ կարծում, որ առանձնապես նման ենք իրար, թեև գուցե ընդհանրություններ կան,  երկուսս էլ կենդանակերպի նշանով ձկներ ենք, երևի թե, տեսակի նմանություն կա»,– ասաց նա։