Արտյոմ Հակոբյանը՝ երրորդ ամուսնության և երեխաների հետ հարաբերությունների մասին

Օրերս 3/Off  նախագծի հաղորդավար Արտյոմ Հակոբյանն ամուսնացել է երրորդ անգամ։ Արտյոմը չի սիրում խոսել անձնական կյանքի մասին, սակայն Tert.am Life-ի համար բացառություն է արել` պատմելով կնոջ, նորաստեղծ ընտանիքի և երեխաների հետ հարաբերությունների մասին։

Արտյոմի ընտրյալը մասնագիտությամբ խմբավար, դիրիժոր Էմմա Առաքելյանն է, ով աշխատում է  «Ձայնի պահպանման վոկալ-երգչախմբային դպրոցում» և Երևանի Առնո Բաբաջանյանի անվան պետական երաժշտամանկավարժական քոլեջում։

Զույգի ծանոթությունը կայացել է դեռևս երեք տարի առաջ։ «Պատահական հանդիպումը վերածվեց ջերմ զրույցի, ապա լուրջ հարաբերությունների,- ասաց հաղորդավարը ու անկեղծացավ, որ Էմման առաջին հերթին իրեն գրավել է հայացքով ու գեղեցկությամբ. -Դա այն է, ինչ առաջին հայացքից  գրավում է յուրաքանչյուր տղամարդու։ Հետո արդեն շփումը բերեց շատ ավելի խորացված հարաբերությունների»։     

Պարզվում է՝ Էմմային  ևս առաջին հանդիպմանը գրավել է հայացքը. «Ընդհանուր մի կայծ կար, համակրանք առաջացավ առաջին իսկ հանդիպմանը»։

Երեք տարի շփվելուց հետո նոյեմբերի 5-ին զույգը  պսակադրվեց Մարիամ Աստվածածին եկեղեցում։ «Հոգևորականի կողմից բացասական որևէ արձագանք չի եղել։ Եթե տեղյակ եք, նույնիսկ եկեղեցական օրենքը թույլ է տալիս մինչև երեք անգամ արարողություն կատարել, բայց դա ինձ մոտ երեք անգամ չի եղել»,- ասաց Արտյոմը՝ նկատի ունենալով, որ նախկինում ունեցած մի ամուսնությունը քաղաքացիական է եղել։

Նորապսակներն ամուսնությունից հետո երկու օրով մեկնել են Թբիլիսի, քանի որ Արտյոմն ընդամենը 2 օր ուներ մինչև հերթական նկարահանումները , մեկ այլ երկիր այսքան կարճ ժամանակով մեկնել չէին կարող։

Արտյոմը դժվարացավ հստակ պատասխանել՝ արդյոք գտել է ամենակարևոր բանը, որն այսքան ժամանակ  փնտրում էր կանանց մեջ։ «Այս երեք տարին փորձություն էր երկուսիս համար։ Հասկացանք, թե որքանով կարող է մեր միությունն ամուր լինել, համոզվելուց հետո գնացինք ամուսնության  քայլին։ Չեմ կարող հստակ հատկանիշներ ասել, ուղղակի գտա այն, ինչ մարդկային տեսանկյունից  փնտրում էի, այն, ինչ պետք է ինձ»,- ասաց հաղորդավարը։

Շոումենին խնդրեցինք նկարագրել Էմմային  5 բառով. «Ստիպում եք ինձ սահմանափակվել` փորձելով ընտրել բառեր, բոլոր այն մտքերից ու զգացմունքներից, որոնք ապրում ես մարդու հետ։ Կարևորը զգացողությունն է, որ նա կարող է դառնալ քո ամենահարազատ մարդը»։

Արտյոմ Հակոբյանն առաջին ամուսնությունից ունի երկու որդի, երկրորդ ամուսնությունից՝ մեկ դուստր։ Հաղորդավարն ուրախությամբ նշում է, որ երեխաներն իր անբաժանելի մասն են։ «Երեխաներս ապրում են նաև ինձ մոտ, միասին շատ ժամանակ ենք անցկացնում։ Նրանց բոլոր քայլերի, ապրած րոպեների մասին տեղյակ եմ։ Ավագ տղաս 16 տարեկան է, ջութակահար է, սովորում է Երևանի Չայկովսկու անվան միջնակարգ երաժշտական մասնագիտական դպրոցում։ Միջնեկ տղաս ֆուտբոլիստ է, իր թիմի գլխավոր դարպասապահն է, արդեն բավականին հաջողություններ է գրանցել։ Աղջիկս էլ այս տարի առաջին անգամ դպրոց գնաց»,– պատմեց նա։

Էմմայից էլ հետաքրքրվեցինք  Արտյոմի՝ երեխաներ ունենալու հանգամանքը չի՞ խանգարել իրենց։ Ի պատասխան` նա մեղմ ժպտաց և ասաց. «Երեխաները երբեք չեն կարող խանգարել։ Նրանք այն էակներն են, որոնք լցնում են կյանքդ ու ինչքան շատ են, կյանքդ ավելի գունավոր ու լուսավոր  է դառնում»։

Մանանա Հովակիմյան