Հայտնիները՝ Արթուր Գրիգորյանի գրքի շնորհանդեսին

Արթուր Գրիգորյանին ժամանակին կնքեցին հայկական շոու բիզնեսի կնքահայր մականվամբ։ Թեև Գրիգորիչը համաձայն չէ այս «կոչման» հետ, այն միանգամից լայն տարածում գտավ, քանի որ շատերին սրտամոտ թվաց, չէ՞ որ ժամանակին հենց Գրիգորիչն էր կանգնած հայկական շոու բիզնեսի ակունքներում։ Թեև այսօր շատերը Երգի թատրոնում չեն ու ծավալում են  այնպիսի գործունեություն, որն Արթուր Գրիգորյանի սրտով չէ, նրա հանդեպ յուրահատուկ ակնածանք կա։

Երեկ կայացավ Արթուր Գրիգորյանի «Երգեր» կոչվող գրքի շնորհանդեսը, որին չէին կարող ներկա չլինել հայկական շոու բիզնեսի հայտնի դեմքերը։ Երգի թատրոնում յուրահատուկ ջերմություն կա, երբ սաները հավաքվում են Գրիգորիչի մոտ։

Գիրքը ներառում է Գրիգորիչի երգերի նոտագրված տարբերակները, բաղկացած է 3 բաժնից` «Մանուկներին», «Հայրենիքիս» և ամենքին։ Tert.am Life–ի հետ խոսելով գրքի ստեղծման պատմության մասին` Գրիգորիչն ասաց, որ այն իր նախաձեռնությամբ չի ստեղծվել։ Նման գիրք ստեղծելու գաղափարը ծնվել է 1 տարի առաջ` երաժշտի հեղինակային երեկոյից հետո։

«Ես շատ ծանր եմ ինչ-որ բան անում ինձ համար։ Բոլորի համար կարող եմ անել, սակայն երբ հերթը հասնում է ինձ, շատ դժվար է։ Սա իմ առաջին գիրքն է, սակայն ոչ  վերջինը։ Գրքում ներառված է 40 երգ։ Ես ունեմ մոտ 400–ը»,– ասաց երգահանը։ Գիրքը ստեղծվել է ՀՀ առաջին տիկին Ռիտա Սարգսյանի աջակցությամբ, որը ևս ներկա էր շնորհանդեսին։

Գրիգորիչը դժվարացավ նշել հստակ սկզբունք, որով ընտրել է գրքում տեղ գտած երգերը, քանի որ ստեղծագործությունները երեխաների պես են. «Չկա հստակ սկզբունք, ուղղակի այդպես եմ զգացել։ Չի կարելի ասել` այս երգը շատ եմ սիրում, մյուսը` ոչ։ Քո մի երեխային չես կարող մյուսից ավելի սիրել։ Այլ հարց է, որ առաջին գրքում տեղ են գտել երգեր, որոնք մի քիչ ավելի շատ են հնչել ու ծանոթ են մարդկանց»։

Գրքում ընդգրկված են երգեր Արթուր Գրիգորյանի, Վահան Անդրեասյանի, Անիտա Հախվերդյանի, Ավետ Բարսեղյանի, Շուշան Պետրոսյանի, Գրիգոր Կյոկչյանի, Հակոբ Ռուբինյանի, Սուսաննա Մարտիրոսյանի, Էմմա Պետրոսյանի, Նարինե Հովհաննիսյանի, Համլետ Առաքելյանի, Մարիամ Մինասյանի, Տաթևիկ Հովհաննիսյանի, Սրբուհի Ստամբոլցյանի խոսքերով։

Դաշնամուրային փոխադրումներով երգերը կարող են օգտակար լինել  երաժշտական կրթական հաստատություններում,  նախակրթարաններում։ «Ուրախ եմ, որ այն, ինչ նախատեսված է մանուկների համար, արդեն կարող են երգել առանց աղավաղման, որովհետև իմ, անգամ, մանկական երգերը միանգամից այդքան էլ հեշտ չեն ընկալվում։ Այս դեպքում արդեն կան նոտաները»,– ասաց նա։

Երաժիշտը խոստովանում է, որ ունի բավականին շատ երգեր, որոնք այդպես էլ չեն հնչել` չափազանց անձնական ապրումների ծնունդ են։ «Շատ երգեր  չեմ էլ ցանկացել, որ հնչեն, որովհետև շատ ինտիմ են, շատ իմը։ Գուցե, տարօրինակ թվա, բայց այդպես է։ Չեմ ասի, թե  հոգնել եմ, բայց վերջերս չեմ սիրում, որ իմ հոգուն ծափահարում են։ Ես կարիք չունեմ շատ հնչելու, որպեսզի ինձ ծափահարեն, գնահատական տան»,– ասաց նա։

«Երգերի» շնորհանդեսն ազդարարվեց փոքրիկ համերգով, որի ժամանակ Արթուր Գրիգորյանն ու Ռուսլան Ելյազյանը կատարեցին «Կյանք ու կռիվ» երգը։ Ներկաները «Երգերը» ունեցան Գրիգորիչի մակագրությամբ։

Լուսանկարները՝ Շաքե Հովհաննիսյանի