«Ե՛վ մայրս, և՛ սկեսուրս, և՛ տալս օգնում են». Գոհար Գասպարյանն առաջին անգամ խոսում է որդու մասին

Tert.am Life-ն առաջինն է  հայտնել,իր ընթերցողներին, որ հաղորդավարուհի Գոհար Գասպարյանը մայրիկ է դարձել։ Գոհարն այս ընթացքում խուսափում էր հարցազրույց տալ փոքրիկի մասին, քանի որ նախընտրում է չխոսել անձնական կյանքին վերաբերող հարցերի մասին։ Մայրանալուց հետո հաղորդավարուհին այսօր առաջին անգամ ներկայացավ հանրությանը` «Մանկական Եվրատեսիլ 2017»–ի թեմայով մամուլի ասուլիսի ժամանակ։ Մրցույթին Հայաստանի մասնակից փոքրիկ Միշան Գոհարին բարի վերադարձ մաղթեց ծաղկեփնջով։

Լրագրողների հետ հանդիպումից հետո Tert.am Life-ն առանձնազրույց ունեցավ Գոհարի հետ, որի ժամանակ նորաթուխ մայրիկն առաջին անգամ խոսեց որդու մասին։

«Դեռ այնքան քիչ ժամանակ է անցել, որ զգացողություններս, իսկապես, շատ խառն են։ Երեխայի ծնունդն ինձ համար երկար սպասելի էր։ Երբ հասուն տարիքում ես մայր  դառնում, և՛ պատասխանատվությունն է մեծ, և՛ զգացողություններն են խառը. գիտես, որ ինչ–որ հրաշք է բնակվում ձեր տանը, սակայն լիարժեք չես գիտակցում` ինչ է կատարվում, քանի որ դեռ շատ փոքրիկ է։ Ընտանիքում բոլորս հուզված ենք։  Ճիշտն ասած, դեռ չենք հասկանում` ինչ է կատարվում մեզ հետ, սակայն հեքիաթ է»,– ասաց հաղորդավարուհին։

Նա և ամուսինը` «ԼեգալԼաբ» իրավաբանական գրասենյակի հիմնադիր բաժնետեր, «Ծիրանի» մշակութային հանգույցի ղեկավար Նարեկ Վան Աշուղաթոյանը ուշի ուշով հետևում են փոքրիկ Վանի ամեն դիմախաղին։ «Ամեն օր փորձում ենք ինչ–որ նորություն նկատել` ինչպես է արձագանքում  ձայնին, շարժումներին։ Դեմքի յուրաքանչյուր միմիկա հիացմունք ու հուզմունք է առաջացնում։ Կամաց–կամաց սկսում է ժպտալ։ Դեռ մեկումեջ ենք նկատում ժպիտը, որովհետև փոքրիկ է»,– նշեց Գոհարը։

Խոսելով 1 ամսական որդու նոր ձևավորվող բնավորության մասին` հաղորդավարուհին ասաց, որ արդեն ունի նշմարվող տեսակ, եթե մի բան իրեն դուր չի գալիս, հաստատ չի անի։ Փոքրիկ Վանը նաև շատ քիչ է լացում. ««Բողոքում» է այն ժամանակ, երբ կարիք ունի։ Շատ դիմացկուն է»։

Գոհարն ու ամուսինը դեռ չեն հրապարակում իրենց փոքրիկի լուսանկարը։ Ըստ մայրիկի` երեխան շատ նման է թե՛ իրեն, թե՛ ամուսնուն։ «Ով տեսնում է, ասում է, կարծես, իմ ու ամուսնուս հետաքրքրիր միքս լինի»,– նշեց նա։

Գոհարը մասնակի է վերադարձել աշխատանքի։ Որքան էլ նա սիրով ու նվիրվածությամբ է աշխատում, հիմա տանը կա մի էակ, որը թույլ չի տալիս երկար հեռանալ իրենից։ Այն ընթացքում, երբ մայրիկը մամուլի ասուլիսի էր, հայրիկը փոքրիկի հետ զբոսնում էր հարակից տարածքում ու սպասում Գոհարին։

«Դեռ լիարժեք չեմ վերադարձել աշխատանքի։ Պարզապես ներկա եմ լինում այնպիսի կարևոր առիթների, ինչպիսին  «Մանկական Եվրատեսիլի» մասին մամուլի ասուլիսն է։ Աշխատանքային ընթացքին փորձում եմ հետևել տանից, համակարգչով։ Դժվար է, կարող եմ ասել, գրեթե, անհնար է համատեղել, սակայն երբ կողքիդ կան սիրելի մարդիկ, նրանք շատ են օգնում։ Ե՛վ մայրս, և՛ սկեսուրս, և՛ տալս պատրաստակամ են օգնել ինձ։ Իրենք էլ աշխատող կանայք են ու շատ լավ հասկանում են, թե աշխատող մարդու համար, որքան կարևոր է մնալ «ֆորմայի» մեջ»,– ասաց նա։

Այնուամենայնիվ, հաղորդավարուհու վերադարձն աշխատանքի դեռ մասնակի է։ Նա ցանկանում է վայելել որդու հետ անցկացված յուրաքանչյուր վայրկյանը։ «Երբ ունես փոքրիկ երեխա, լիարժեք վերադարձի մասին դժվար է խոսել, սակայն առանձին նախագծեր անում եմ։ Ես հիմա էլ զբաղվում եմ «Մանկական Եվրատեսիլով», զբաղվելու եմ նաև մեծերի «Եվրատեսիլով»։ Ես ամբողջովին աշխատանքի մեջ եմ լինելու, պարզապես, զբաղվածությունս մի փոքր ընկել է ասիստենտիս` Անուշ Տեր–Ղուկասյանի ուսերին։  Այս պահին նա է պատասխանատուն և «Մանկական Եվրատեսիլի» շրջանակում Միշայի հետ մեկնելու է Վրաստան»,– եզրափակեց Գոհարը։