«Ուզում եմ, որ Ղարաբաղում միշտ խաղաղություն լինի, ինձ էլ ոչինչ պետք չէ». 9-ամյա Միշայի երազանքն ու զոհողությունը հանուն «Եվրատեսիլի»

18:05 • 15.11.17

Շոուբիզնես

«Ես ուզում եմ, որ Ղարաբաղում միշտ խաղաղություն լինի, ինձ էլ ոչինչ պետք չէ». սա է «Մանկական Եվրատեսիլ 2017» երգի միջազգային մրցույթի հայաստանյան ներկայացուցչի՝ Միշայի երազանքը: Նոյեմբերի 19–ին Հայաստանի պատվիրակությունը 9-ամյա Միշայի հետ կմեկնի Վրաստան` մասնակցելու նոյեմբերի 26–ին կայանալիք մրցույթին։

«Մանկական Եվրատեսիլ 2017» երգի միջազգային մրցույթին նվիրված ասուլիսի բանախոսներն էին «Եվրատեսիլ»-ի հայաստանյան պատվիրակության ղեկավար Գոհար Գասպարյանը, Հայաստանը ներկայացնող Միշան (Միքայել Գրիգորյան) և նրա պրոդյուսեր Լիրա Քոչարյանը:

Միշան հաղթական է տրամադրված։ Լիրա Քոչարյանը, որը եղել է նաև «Մանկական Եվրատեսիլը» հաղթած Վլադիմիր Արզումանյանի պրոդյուսերը, նշեց, որ Միշան, լինելով Արցախից, իր բարության և խաղաղության բումերանգն է նետում աշխարհին` հուսալով, որ այն նույն բարությամբ և հաղթանակով կվերադառնա իրեն:

Այս տարի «Մանկական Եվրատեսիլը» տեղի է ունենալու Վրաստանի մայրաքաղաք Թբիլիսիում: Գոհարը պատմեց վրացիների կողմից ձևավորված կատակի մասին, երբ «Եվրատեսիլը» տեղի ունեցավ Հայաստանում, հաղթեց Վրաստանի ներկայացուցիչը, այս տարի Վրաստանում է տեղի ունենալու, ուրեմն` բումերանգի օրենքից ելնելով՝ կանխատեսելի է Հայաստանի հաղթանակը:

Ասուլիսի ընթացքում Միշային խնդրեցին կատարել այն երկրի մասնակցի երգը, ում մրցակից է համարում: Միշան՝ որպես մրցակից նշեց 3 երկիր՝ Վրաստան, Բելառուս և Լեհաստան, ապա կատարեց Բելառուսի ներկայացուցչի երգից մի հատված:

Փոքրիկ երգչի բեմական հագուստի և շոուի հետ կապված բանախոսները չցանկացան փակագծեր բացել, բայց փաստեցին, որ բեմում շեշտը լինելու է Միշայի վրա, իսկ հագուստը շատ համեստ է լինելու։

Լիրա Քոչարյանը խոստացավ, որ չնայած պարզությանը` լինելու է շատ հետաքրքիր համար։ Հագուստն էլ, թեև պարզ է, կարելը հեշտ չի եղել, քանի որ շագանակագույնի ցանկալի երանգը գտնելը բարդ էր։ Միշայի հայրիկը բավականին շատ է փնտրել համապատասխան կտոր։ Հիմա փոքրիկն ունի հագուստի մի քանի տարբերակ, որոնցից էլ կընտրեն վերջնական տարբերակը։

Միշան բարձրաձայնեց, որ թբիլիսյան բեմում ցանկանում է ներկայանալ 7 կամ 12 համարի ներքո. 12 համարի ներքո ներկայանալը փոքրիկ երգչի համար խորհրդանշական կլինի, քանի որ ամիսներ առաջ «Արցախի ձայներ» նախագծից Էռնա Միրը հենց այդ համարի ներքո ելույթ ունեցավ ու առաջին տեղը զբաղեցրեց «Նոր ալիք» մրցույթում։ Փոքրիկը խոստովանեց, որ այս ելույթի համար ինքը զոհել է դպրոցի դասերը, սակայն դրանից չի սրտնեղում։

Պատասխանատու ելույթի ընթացքում Միշային կոգեշնչի Լիրա Քոչարյանի ներկայությունը, բացի այդ, փոքրիկ երգիչը ևս մի ուղեկից ունի։ Ձեռքը տանելով վզին՝ նա ցույց տվեց խաչը, ոգևորված նշելով, որ իր խաչն ու Աստված միշտ իր հետ են:

Այս տարի փոփոխություն կա մրցույթի քվեարկության կարգում։ Յուրաքանչյուր երկիր կարող է քվեարկել նաև իր մասնակցի օգտին։ Բացի այդ, քվեարկությունը կտևի ավելի երկար. այն կմեկնարկի նոյեմբերի 24-ից www.junhioreurovision.tv կայքում, քվեարկությունը կավարտվի նոյեմբերի 26-ին՝ մրցույթի օրը՝ անմիջապես շոուից առաջ և կվերաբացվի մրցույթի բոլոր 16 ելույթներից հետո և կտևի 15 րոպե: Ըստ քվեարկության նոր կարգի՝ այս տարի մասնակից երկիրն օնլայն քվեարկության միջոցով կարող է քվեարկել նաև իր պատվիրակի օգտին:

«Քվեարկությունից հետո դրան միանալու է պրոֆեսիոնալ ժյուրիի քվեարկությունը, ամեն երկրում լինելու է ժյուրի, ի դեպ, այս տարի ժյուրիի կազմում լինելու են նաև երեխաներ», - ասաց Գոհար Գասպարյանը:

Հիշեցնենք, որ այս տարի Հայաստանը կներկայանա «Բումերանգ» երգով: Երգի երաժշտության հեղինակը Վահրամ Պետրոսյանն է, խոսքերի հեղինակներն են Ավետ Բարսեղյանը, Դավիթ Ծերունյանը, Արթուր Աղեկյանը, գործիքավորումը՝ Karen Sevak Production-ի: