«Հիմա ավելի շատ գումար եմ աշխատում, բայց ավելի դժվար է». Հակոբ Հակոբյանը` «Մամա ջան»–ի հաջողության և Արմենի հետ եկամուտը կիսելու մասին

Հակոբ Հակոբյանն ու Արմեն Հովհաննիսյանը վերջերս ներկայացրին իրենց «Մամա ջան» երգի տեսահոլովակը, որը բավականին մեծ արձագանք ստացավ։ Սա տղաների հերթական գործն էր, որն աշխատեց լսարանի հուզականության վրա, թեև, ըստ Հակոբի, մարդկանց հույզերի վրա ազդելու համար հատուկ շեշտադրում չեն անում։ Tert.am Life–ը զրուցել է երգչի հետ` նոր աշխատանքի, ֆինանսական կայունության հասնելու, կորպորատիվների համար սահմանված գնային քաղաքականության և շահույթը կիսելու մասին։

«Զրույցի ընթացքում հասկացա, որ իսկապես մեր, գրեթե, բոլոր երգերում հուզական գիծ կա, սակայն մենք դա միտումնավոր չենք անում, մեր երգերն ընտրում ենք ի սրտե։ Եթե երգը սիրում ենք, երգում ենք, եթե չէ, չէ։ Ժակլին Թադևոսյանի այս երգը միանգամից կպավ մեր սրտին։ Նա այս երգը գրել է տարիներ առաջ  իր մայրիկի մահվանից հետո»,– ասաց երգիչը։

Նրա խոսքով` իրենք այսպիսի տեսահոլովակ չեն նկարահանել, որպեսզի մարդիկ թողնեն իրենց կյանքն արտերկրում ու վերադառնան հայրենիք, պարզապես, ուզում են կոչ անել, որ  չմոռանան իրենց մայրիկներին այցելելու մասին։ Այնուամենայնիվ, Հակոբը պատմեց, որ սփյուռքահայ մի ընտանիքից նամակ են ստացել , որ տեսահոլովակը դիտելուց հետո որոշել են ամռանը վերադառնալ Հայաստան։

«Մամա ջան»–ի արձագանքները շատ են, սակայն դիտումների քանակը դեռ չի գերազանցել «Ախպերս ու ես» երգի կատարման դիտումներին։ Հակոբի կարծիքով` դա ժամանակի հարց է, քանի որ «Մամա ջան»–ի արձագանքները շատ ավելի մեծ են։ «Դեռ մի քանի օր է, ինչ պրեմիերա ենք արել, մոտ 100.000 դիտում ունենք։ «Ախպերներով»–ը մոտ 2 մլն 800 հազար դիտում է ունեցել Youtube–ում, Ֆեյսբուքում էլ մի քանի միլիոն դիտում ունի։ Գումարային` մոտ 6-7 մլն դիտում ունի։ Ժամանակ է պետք, որ «Մամա ջան»–ն էլ ավելի տարածվի»,– ասաց նա։

Հակոբն իրեն փորձել է թե՛ որպես դերասան, թե՛ որպես հաղորդավար, թե՛ որպես երգիչ, սակայն հենց որպես երգիչ ներկայանալուց հետո դրական արձագանքի արժանացավ։ «Հայտնիության աճ չեմ նկատում։ Ես սովոր եմ, որ ինձ բոլորը ճանաչում են։ Երբ ինչ–որ մեկին բարևում եմ, գիտեմ, որ անունով ճանաչում է ինձ։ Դա ինձ ոգևորում է։ Իհարկե, խոսքս ավելի շատ Երևանի մասին է, քանի որ ATV–ի հեռարձակումը ժամանակին այդքան մեծ չէր։ Երաժշտական կարիերաս նպաստեց, որ ինձ ճանաչեն նաև Սփյուռքում։ Փոփոխությունն արձագանքների մեջ է։ Դրական զանգեր, նամակներ ենք ստանում մեր աշխատանքի վերաբերյալ»,– ասաց երգիչն ու խոստովանեց, որ երաժշտական կարիերան նպաստել է նաև հոնորարների աճին։

Ըստ Հակոբի` բավականին շատ պատվերներ են ունենում կորպորատիվներին երգելու համար. ««Ախպերս ու ես» երգից հետո միանգամից սկսեցին հրավիրել կորպարատիվների։ Հիմա ավելի շատ փող եմ աշխատում, սակայն հիմա ավելի դժվար է։ Եթե նախկինում աշխատածս գումարը  ծախսում էի մեքենա, հագուստ գնելու համար, հիմա տնտեսում եմ, քանի որ պետք է գումար ներդնենք գործի մեջ»։

Խոսելով գնային քաղաքականության մասին`նա  ասաց, որ հոնորարի չափը պայմանավորված է մի շարք հանգամանքներով` սկսած նրանից, թե որտեղ են ելույթ ունենալու և որքան ժամանակ են ծախսելու տվյալ վայր հասնելու համար, վերջացրած նրանով, թե քանի երգ են կատարելու։

Երբ հարցը հասնում է ֆինանս կիսելուն, հաճախ ընկերությունը մղվում է երկրորդ պլան։ Մի անգամ չէ, որ հայտնի ու սիրված դուետներ բաժանվել են։ Որպես կանոն` նման բաժանումների պատճառը ֆինանսական անհամաձայնություններն են լինում։ Երգչից հետաքրքրվեցինք, թե ինչպես են ինքն ու Արմենը կիսում եկամուտը։

«Մեզ մոտ խնդիր չի առաջանում, որովհետև ֆիքսված տոկոս ենք ստանում։ Ես ինչ էլ անեմ, ավել տոկոս չեմ ստանալու։ Ունենք պրոդյուսեր` Անահիտ Սահակյանը, հենց նա էլ կիսում է մեր միջև ամեն ինչ։ Ես ու Արմենը հավասարաչափ գումար ենք ստանում, հավասար էլ աշխատում ենք։ Իրականում, մեզ մոտ ով ինչ կարողանում է անում է»,– ասաց նա։

Անդրադառնալով առաջիկա ծրագրերին` Հակոբն ասաց, որ սպասվում են նոր երգեր։ Մինչև տարեվերջ 3 նոր երգ կթողարկեն։ «Ուրախ, պարային, մի քիչ կոմերցիոն երգեր են, որոնք ևս մեր հոգուց, սրտից են բխում։ Հնարավոր է` հաջորդ տարի դրանց հիման վրա նկարահանենք փոքրիկ տեսահոլովակներ։ Բացի այդ, հաջորդ տարի նախատեսում ենք նվազագույնը 2 տեսահոլովակ ներկայացնել»,– եզրափակեց երգիչը։