Մանոյի բիզնեսը, Յանայի նոր հաղորդումն ու Էվայի «խանդը»

Սարգիս Գրիգորյանի կինը, 2 աղջիկների` Էվայի և Յանայի մայրիկը լինելու պարտականություններից զատ Մանոն ունի իր առօրյան ու զբաղմունքները։ Ամեն հարցում ամուսնուն օգնելուց բացի Մանոն ինքնամոռաց զբաղվում է իր առաջին մասնագիտությամբ` պարով։  Tert.am Life–ը հետաքրքիր զրույց է ունեցել պարուհու հետ, որը բաժանել ենք 2 մասի` «Մանոյի աշխարհը» և «Աղջիկներն ու մրցակցությունը»։

Մանոյի աշխարհը

«Ես ֆանատիզմի աստիճան սիրում եմ այն աշխատանքը, որով զբաղվում եմ։ Իմ ամբողջ էներգիան ներդնում եմ այդ գործի մեջ։ Ինձ շատ են առաջարկում նկարահանվել սերիալներում, սակայն ափսոսում եմ ժամանակս։ Պարի դահլիճում ես ինձ զգում եմ ինչպես ձուկը ջրում։ Ավելի ռեալիզացված եմ։ Իմ երկրորդ մասնագիտության` դերասանական խաղի պակասն էլ չեմ զգում։ Գործս շատ դրական է։ Հարսանեկան պարեր եմ բեմադրում։ Այնքա՜ն հաճելի ու լավ էմոցիաներ ես ունենում, երբ մարդու համար կարևոր այդ օրը կարողանում ես հեքիաթային դարձնել։ Վերջերս նոր պար բեմադրեցի, որից մեծ հաճույք ստացա։ Երկար ժամանակ նոր բան չէի արել, ինչը շատ կարևոր է յուրաքանչյուր արվեստագետի համար։ Հարսանեկան պարերի բեմադրությունը չի ենթադրում անընդհատ նորություն, սակայն հաճելի է, երբ ինչ–որ մեկը քեզանից նորություն է ուզում։ Հետաքրքիր միտք ծնվեց, որը դրական արձագանքի արժանացավ։ Դա ինձ շատ ոգևորեց»,– աշխատանքի մասին եռանդով պատմեց Մանոն։

 

@___d1ana___ @sirushoofficial @kristina_kasaboghlyan @janul_avagyan @mash.tad

Публикация от Mano (@mano_dancer_wedding_dance) Ноя 20 2017 в 8:16 PST

Բիզնես տեսանկյունից էլ Մանոյի աշխատանքը շահավետ է, սակայն նա նշում է, որ գումարի համար չի զբաղվում պարով։ «Հարսիկների պակաս չունեմ, սակայն դա գումարի համար չեմ անում։ Այդպիսի խոսք կա` դու աշխատիր, փողը քո հետևից կգա։ Ես չեմ գնում փողի հետևից, դա ուղղակի իմ աշխատանքի արդյունքն է»։

Թե ինչու տեսահոլովակներ չի թողարկում որպես պարուհի, Մանոն անսպասելի պատասխան տվեց. «Չեմ սիրում ուշադրության կենտրոնում լինել»։ Նկատառմանը, որ ինքը, կարծես, երբեք չի  խուսափել հանրային ուշադրությունից, պարուհին պատասխանեց. «Ես սիրում եմ լուսանկարվել, և դա անում եմ իմ հաճույքի համար։ Ես անընդհատ չեմ երևում նրա համար, որ ինձ չմոռանան, ուղղակի զբաղվում եմ նրանով, ինչ սիրում եմ»։

Աղջիկներն ու մրցակցությունը

Պարուհի մայրիկը չէր կարող աղջիկներին պարի չտանել։ Նա չի ուզում, որ Էվան ու Յանան պարուհիներ դառնան, սակայն մայրիկի պատիվը գետնով չտալ և լավ պարել պարտավոր են։) «Ես չգիտեմ` իրենք ինչ մասնագիտություն կընտրեն, սակայն կարևոր է, որ պարել իմանան թե՛ իրենց կառուցվածքի, թե՛ առողջության համար։ Յանան շատ է սիրում պարել։ Էվան էլ է սիրում, սակայն ծուլանում է»,– ասաց մայրիկը։

Աղջիկների բազմազբաղ առօրյայի մի մաս են դարձել նաև երգի դասերը։ Էվան ու Յանան սկսել են հաճախել «Արևներ» խումբ։ «Իրենք այնքան տարբեր են։ Յանան բնատուր շնորհ ունի, սակայն ալարկոտ է։ Էվան ավելի աշխատասեր է։ Չգիտեմ` հետագայում ով ինչպես կզարգացնի այդ ջիղն իր մեջ։ Յանան համառ է ու սիրում է առաջինը լինել, Էվան էլ շատ պարտաճանաչ է»,– ասաց նա։ Մայրիկից հետաքրքրվեցինք` արդյոք աղջիկների միջև չկա մրցակցություն։ Ինչպես և կարելի էր ենթադրել մրցակցություն կա։ Էվայի մոտ խանդի դրսևորում կա, սակայն դա նախանձ չի դառնում` մայրիկի ջանքերի շնորհիվ։ «Յանայի` «Դեպի վայրէջք» սերիալում նկարահանվելն ավելի նպաստեց դրան։ Դրսում Յանային ավելի շատ են ճանաչում, Էվան, բնականաբար, զգում է դա։ Ես շատ եմ խոսում իր հետ, որ դա նախանձի չվերածվի։ Իրեն էլ եմ առաջարկել նկարահանվել։ Ինքը գիտի, որ ինքն է  հրաժարվել, չնկարահանվելը եղել է իր ընտրությունը, բայց, երբեմն, բզբզում է։ Յանային ասում է` կամաց երգիր, որ իմ ձայնը լսվի»,– ծիծաղելով պատմեց Մանոն։

Ծնողները Յանայի անունով ինստագրամյան ու ֆեյսբուքյան էջ են բացել, որը բավականին ակտիվ են պահում, սակայն վերջերս էջը կոտրել են։ Մանոն նշեց, որ դրանից շատ են վրդովվել։ Դիտարկմանը, որ տպավորություն է, որ իրենք փորձում են այնպես անել, որ Յանան չկորի հանրության տեսադաշտից, Մանոն արձագանքեց, որ իրականում այդպես է, քանի որ նոր ծրագրեր ունեն. «Մենք փորձում ենք պահել Յանայի ակտիվությունը, որովհետև մանկական նոր ծրագիր ենք անում, կոչվում է  Sweet home Yana։ Ինտերնետային հաղորդում է լինելու»։

Հարցին` արդյոք փորձում են Յանային մանկուց ռեալիթի շոուի աստղ  դարձնել, Մանոն պատասխանեց. «Ինքը շատ է սիրում այդ ամենը, ամեն օր ասում է` կարոտում եմ նկարահանումները։ Յանային շատ հեշտ է տրվում այդ ամենը։ Հաղորդման շրջանակում Յանան հետաքրքիր արկածների մեջ է ընկնում, որը նաև դաստիարակչական բնույթ է ունենալու։ Սցենարով հիմնականում Սարգիսն է զբաղվում։ Նկարահանումներն արդեն արել ենք, մոնտաժային փուլում ենք»։