«Արտերկրից առաջարկներ ունեմ». Miss Globe 2017–ում 6-րդ տեղը գրաված Լիլիթ Մարտիրոսյանը նորություններ ունի

17:11 • 24.11.17

Շոուբիզնես

Ալբանիայի Տիրանա քաղաքում անցկացված «Miss Globe 2017» մրցույթին 6-րդ տեղը գրաված և «Miss Friendship» տիտղոսը ստացած գյումրեցի գեղեցկուհի Լիլիթ Մարտիրոսյանը բացի մոդելի կարիերան զարգացնելուց, մտադիր է նաև իր ուժերը փորձել երգարվեստում:

Կրթությամբ օտար լեզուների և մարքեթինգի մասնագետ Լիլիթը Tert.am Life-ի հետ զրույցում ասաց, որ մեկ տարի է` զբաղվում է դասական վոկալով, բայց նախկինում չի բարձրաձայնել այդ մասին: Հայ մոդելը Miss Globe 2017 մրցույթի «Տաղանդ» փուլի ժամանակ ներկայացել է «Սարերի հովին մեռնեմ» երգով և զարմացրել շատերին: Մրցույթի ավարտից հետո նա Տիրանայի լուսանկարչական դպրոցի տնօրեն Աուրեյլիո Լուլոյի կողմից մրցանակ է ստացել տեսահոլովակի տեսքով։

Տեսահոլովակի համար Լիլիթն ազգագրական երգ է ընտրել, որը կներկայացնի նոր գործիքավորմամբ: Երգի ձայնագրությունը կատարվել է Հայաստանում, իսկ տեսահոլովակի նկարահանումներն իրականացվել են Ալբանիայում։

«Մրցույթի հաջորդ օրն իսկ սկսեցինք նկարահանումները: Հիմա այնտեղ մասնագետներն աշխատում են տեսահոլովակի վրա, չգիտեմ՝ կհասցնե՞նք մինչև տարեվերջ ներկայացնել, թե՝ ոչ: Պրեմիերան լինելու է Եվրոպայում: Այն կհեռարձակվի իտալական, գերմանական և ալբանական հեռուստաալիքներով: Հայաստանյան պրեմիերայի հետ կապված այժմ բանակցություններ են տարվում»,– պատմեց նա։

Լիլիթի խոսքով` իր վոկալի ուսուցչի՝ Երազիկ Հարությունյանի հորդորով պատրաստվում է երաժշտական կրթությունը շարունակել արտերկրում, սակայն սա չի նշանակում, որ հրաժարվելու է մոդելային գործունեությունից։

«Հիմա համացանցի միջոցով այդ ամենը կառավարելը շատ հեշտ է դարձել: Մոդելային գործունեությանս հետ կապված այս պահին գործնական առաջարկներ կան Միլանից, Բեյրութից, Ալբանիայից, որոնք քննարկվում են: Ուսմանս, ինչպես նաև աշխատանքի բերումով որոշ ժամանակով կբացակայեմ երկրից, բայց անպայման վերադառնալու եմ և այստեղ եմ շարունակելու գործունեություն ծավալել»,– վստահեցրեց նա։

Լիլիթը նշեց, որ 5 տարիների ընթացքում մի շարք հաջողություններ է ունեցել. 2015 թվականին մասնակցել է «Թոփ մոդել Հայաստան» մրցույթին և գրավել առաջին տեղը։ Նա մասնակցել է նաև «Թոփ մոդել Աշխարհ»-ին, որտեղից էլ, ըստ նրա, սկսվել է հաջողությունների շղթան՝ իրավունք է ստացել մասնակցելու Վիեննայում կայանալիք «Miss Earth» մրցույթին: 2016-ին Շրի Լանկայում մասնակցել է «Miss Intercontinental» մրցույթին, որտեղ արժանացել է «Լավագույն մաշկ և մազեր» մրցանակին, դրանից հետո իրավունք է ստացել մասնակցել «Miss Globe 2017» մրցույթին:

«Ինչպես միշտ, համագործակցել եմ «Համաշխարհային գեղեցկության և նորաձևության» լիգայի նախագահ Աշոտ Խաչատրյանի հետ: Երբ հրավերը ստացա, սկսեցինք դիզայներների հետ պատրաստվել մրցույթին: Երեկոյան զգեստի հեղինակը Նինա Սարգսյանցն է, ով զգեստը ստեղծել է Միլանում: Ազգային տարազը տրամադրվել է «Տերյան» մշակութային կենտրոնի կողմից: Դիզայները Լիլիթ Մելիքյանն է եղել: Աքսեսուարները ստեղծվել են Գայանե Մարտիրոսյանի կողմից»,- ասաց նա:

Գյումրեցի գեղեցկուհուն մայրիկն է հորդորել զբաղվել մոդելային բիզնեսով: Ընտանիքն աջակցել և վստահել է նրան: Նրա փոխանցմամբ` մոդելային գործունեության ընթացքում որևէ քննադատության չի արժանացել։ նա վստահ է, որ Հայաստանում այլևս չկան կարծրատիպեր` կապված մոդելի աշխատանքի հետ. «Լինելով տարբեր երկրներում՝ տեսնում եմ, որ հայերն ավելի մոտ են կանգնած արվեստին, և ցանկացած արվեստ գնահատում են»:

Լիլիթի սիրտն այժմ ազատ է: Ըստ նրա՝ իր կողակիցը պետք է լինի մեկը, ով կընդունի և կգնահատի իրեն այնպիսին, ինչպիսին կա: Լիլիթը չգիտի, ինչպես կարձագանքի, եթե մի օր ընտրության առաջ կանգնի՝ հանուն ընտանիքի հրաժարվել կարիերայից. «Չեմ կարող խոսել մի բանի մասին, որն այս պահին չունեմ։ Միգուցե այդ ժամանակ զգացողություններս այլ լինեն, և պատասխանս այլ լինի»: