Անահիտ Մութաֆյանը` անձնական խնդիրների պատճառով հիվանդանոցում հայտնվելու մասին

12:48 • 29.11.17

Շոուբիզնես

Դերասանուհի Անահիտ Մութաֆյանը հայտնվել է հիվանդանոցում։ Tert.am Life–ի հետ զրույցում Անահիտն ասաց, որ նյարդային խնդիրների պատճառով է հայտնվել հիվանդանոցում։

«Անձնական խնդիրների հետ կապված նյարդային լարված վիճակում էի։ Երեկ երեկոյան ամեն ինչ ավելի սրվեց՝ ոտքերս, ձեռքերս բռնվեցին, շտապ օգնությամբ տարան հիվանդանոց։ Բժիշկներն ինձ հանեցին սուր վիճակից։ Այսօր երեկոյան արդեն տուն կգնամ»,– ասաց նա։

Դերասանուհուց հետաքրքրվեցինք, թե ինչն է իրեն բերել այս վիճակին։ «Այն, ինչ կապված է սրտիս, զգացմունքներիս հետ, շատ ծանր եմ տանում։ Ես անդառնալի համարում էի միայն մահը, սակայն էլի բաներ կան, որ անդառնալի են։ Եթե ամեն ինչ վերջանում է, ուրեմն վերջանում է, թրերով, սրերով ոչինչ հետ չես բերի»,– նկատեց նա։

Նյարդային լարված վիճակում պակաս կարևոր չէ հոգեբանական օգնությունը։ Անահիտը նշեց, որ այս փուլում իր կողքին են մայրն ու երիտասարդ դերասանուհի Անուշկա Մարգարյանը, ում հետ իրենք նկարահանվել են «Առաջնորդները» հեռուստասերիալում։

«Ես ունեցել եմ հոգեբանի դիմելու պրակտիկա, սակայն հասկացել եմ, որ ինձ համար լավագույն հոգեբանն ինքս եմ։ Ինձանից լավ ոչ ոք չի կարող ինձ համոզել, որ ինձ հետ ամեն ինչ լավ կլինի։ Այս իրավիճակում շատ շնորհակալ եմ մայրիկիս ու ընկերուհուս` Անուշկային։ Նրանք լավագույն հոգեբաններն են և ինձ օգնում են ամեն կերպ դուրս գալ այս իրավիճակից»,– ասաց դերասանուհին ու հավելեց, որ սթրեսը հաղթահարելու համար փորձում է ուրախ ժամանակ անցկացնել։

«Շատ հաճախ դիմում եմ պարերին, երգերին, փորձում եմ ինձ անջատել ամեն ինչից։ Չեմ փակվում տանը և սկսում մտածել։ Չեմ ընդունում այն փաստը,որ սթրեսը կարելի է հանել խմիչքի միջոցով։ Միայն պարել, շարժվել ու որևէ հանրօգուտ գործով զբաղվելով կարելի է հաղթահարել ամեն ինչ»,– եզրափակեց Անահիտը։