Գոռ Կիրակոսյանը Հայաստանում նոր կատակերգություն կնկարահանի

«Դեմք շոու»–ի տղաներն այս օրերին Երևանում էին։ Երկու շաբաթով հայրենիք ժամանած տղաներն այսօր արդեն մեկնել են ԱՄՆ, սակայն մինչև այդ ռեժիսոր Գոռ Կիրակոսյանը  Tert.am Life–ին պատմել է այցի նպատակի ու առաջիկա ծրագրերի մասին։

«Մեծ պատմություն փոքր քաղաքում», «Կորած մոլորվածը Հայաստանում», «Քայլ ձիով» և այլ ֆիլմերի ռեժիսորը պատրաստվում է Երևանում նոր կատակերգություն նկարահանել։ Այս փուլում նա և ընկերները ժամանել էին Հայաստան` նախապատրաստական աշխատանքների համար։

Նա հայտնեց, որ ֆիլմում ընդգրկված կլինեն «Դեմք շոու»–ի անդամները։ Թե հայաստանաբնակ դերասաններից ովքեր ներգրավված կլինեն ֆիլմում, դեռևս հստակ չէ։

Տղաները կրկին Հայաստան կգան ապրիլին` արդեն բուն նկարահանումներն անելու նպատակով։

«Ֆիլմի նկարահանումները կկայանան Երևանում։ Մոտավոր գիտենք` ինչ ենք անելու, հավանաբար, հուլիսին արդեն կավարտենք այստեղի աշխատանքներն ու կվերադառնանք ԱՄՆ»,– ասաց Գոռը։ Ռեժիսորն առայժմ չգիտի` որքան կտևի հետարտադրական փուլը և երբ կլինի ֆիլմի պրեմիերան` 2018–ի աշնա՞նը, թե՞ 2019–ի գարնանը։

Գոռը նշեց, որ սցենարն արդեն պատրաստ է։ Ըստ նրա` հատուկ շեշտադրումներ չեն արել` հայաստանաբնակ հանդիսատեսին հետաքրքիր լինելու համար։ «Ծնվում է լավ գաղափար, որը փորձում ես իրականացնել։ Երբեք չես իմանա, որ ֆիլմը լավը կլինի կամ վատը։ Դա խաղատուն գնալու պես բան է։ Ամեն դեպքում, ֆիլմը պետք է համապատասխանի կոնկրետ տեղին և ժամանակին։ Փորձել եմ այնպես անել, որ հումորը հասկանալի լինի բոլորին, ոչ թե միայն հայաստանցիներին»,– ասաց նա։

Ռեժիսորը նկատեց, որ Հայաստանում ամենաբարդ գործը հովանավոր գտնելն է, փորձում են համագործակցել ընկերությունների հետ, որոնք կհամապատասխանեն իրենց սցենարին և գովազդը չի խանգարի ֆիլմին։

Հայկական կինոարտադրությանը Գոռը մասամբ է հետևում։ Դիտարկմանը, որ Հայաստանում ֆիլմերի քանակն աճել է, թեև նույնը չի կարելի ասել նաև որակի մասին, Գոռն արձագանքեց,, որ խնդիրը պայմանավորված է նրանով, որ ֆիլմերով զբաղվում են ոչ մասնագետները։

Այս օրերին, տղաները եղել են նաև հարևան Վրաստանում։ Գոռից տեղեկացանք, որ այժմ մեկ այլ նախագիծ իրականացնելու ուղղությամբ էլ են աշխատում։ Պատրաստվում են նկարահանել հայկական առաջին հեքիաթ ֆիլմը` երեխաների համար։ «Դա իրականացնելու համար նախապատրաստական մեծ աշխատանքներ են պահանջվում։ Վրաստանում հետաքրքիր ամրոցներ, հին գյուղեր կան, գնացել էինք հասկանալու` կարո՞ղ ենք այնտեղ նկարահանումներ անել։ Այդ նախագծով կզբաղվենք  կատակերգությունը նկարահանելուց հետո»,– ասաց նա։

Գործնական հանդիպումներին զուգահեռ տղաները կարողացել են հանդիպել ընկերներին. «Փորձեցինք մեր կարոտն առնել մեր ընկերներից։ Հանդիպեցինք Վաչեին, Արամ MP3–ին, Ռաֆայել Երանոսյանին, «Վիտամինից» Տիգրանին, ով ևս այս օրերին եկել էր  Երևան»։

Անդրադառնալով գործունեությանն  ԱՄՆ–ում` Գոռը հայտնեց, որ վերջին 4 տարվա ընթացքում ավելի են ակտիվացրել «Դեմք շոու»–ն։ «Իմ խումբը մեծացել է, փորձում եմ այն ավելի ուժեղացնել։ Քիչ–քիչ ավելի լավ արդյունքներ ենք տեսնում։ Հեռուստատեսային ծրագիր չենք անում, որովհետև ոչ մի անգամ չենք կարողացել լավ պայմանագիր ունենալ։ Այն, ինչ մենք ենք ցանկացել անել, իրենց համար թանկ է եղել։ Դրա համար սկսեցինք սոցցանցերով անել մեր աշխատանքը։ Ավելի շատ բեմական համերգներ ենք ունենում Լոս Անջելեսում և հրավերներ ենք ստանում տարբեր նահանգներից»,– ասաց Գոռը։ Հարցին` որքանո՞վ է շահավետ նախագիծը, Գոռը պատասխանեց. «Այնքանով, որ վերջին մի քանի տարին ես միայն դրանով եմ զբաղվում և ապրում»։

«Դեմք շոու»–ի ներկայացնումները երևանյան հանդիսատեսին մատուցել տղաները չեն շտապում։ Ըստ Գոռի` նախագծի հումորներն առավել հասկանալի ու սրտամոտ են ամերիկահայերին, սակայն հնարավորության դեպքում կփորձեն ինչ–որ բան անել նաև Երևանի հանդիսատեսի համար։