«Շատ եմ ձգտում երեխաների հետ լինել». Սոնան` կողակցի և մայրանալու ցանկության մասին

Երգչուհի Սոնան այս օրերին Երևանում էր, թեև կարճ ժամանակով։ Երգչուհին այս ընթացքում հասցրեց ակումբային համերգ տալ, հանդիպել ընկերներին և նոր տեսահոլովակ ներկայացել։ Tert.am Life–ն օգտվել է առիթից ու զրուցել էր երգչուհու հետ։

1990-ականներին  լսարանի համար բացահայտված Սոնան այս տարիների ընթացքում արտաքնապես շատ է փոխվել։ Շատերը դժվարանում են հավատալ, որ նա նույն Սոնան է։ Երգչուհուց հետաքրքրվեցինք, թե արտաքին փոփոխություններին զուգահեռ ներքին ինչ փոփոխություններ է ապրել 21 տարվա ընթացքում։

«21 տարվա ընթացքում մարդիկ շատ են փոխվում։ Առաջին հերթին, երևի, իմաստնանում են։ Ես ավելի իմաստուն եմ դարձել, հարցերին ավելի լուրջ կարող եմ մոտենալ, ոչ թե մակերեսային։ Սակայն իմ մեջ գլոբալ փոփոխություններ չեն եղել։ Ազարտային, գժոտ Սոնան անկախ տարիքից, միևնույն է, կմնա։ Արտաքնապես բոլորս էլ փոխվում ենք, մեծանում ենք, ֆիզիկապես կարող է փոխվեմ, բայց հոգիս անձնագրիս հետ կապ չունի։ Ես 17 տարեկան եմ մնացել։ Ես դա զգում եմ, ինձ ճանաչող մարդիկ էլ ասում են` դու չես մեծանում, հոգիս ընդհանրապես չի մեծանում»,– նշեց երգչուհին։

Սոնայի խոսքով` բուռն խառնվածքն իրեն չի խանգարում կյանքում։ «Իմ գժությունը երբևէ չի խանգարել ինձ. կար շրջան, երբ չէի կարողանում լավ տիրապետել էմոցիաներս, բայց հիմա կարողանում եմ  վերահսկել զգացմունքներս։ Ես չեմ էլ փորձում փոխել  ինձ։ Ինձ ընդունում են այնպիսին, ինչպիսին կամ»,– նկատեց երգչուհին, ում համար ամենակարևորը բոլոր հարաբերություններում մարդ մնալն է։

Սոնան պարբերաբար  նորություններ է ներկայացնում իր լսարանին, սակայն այդ նորությունները մշտական բնույթ չեն կրում։ Երգչուհուց հետաքրքրվեցինք, թե ինչով է հագեցած իր առօրյան Մոսկվայում։

«Երաժշտությունն անընդհատ կա իմ կյանքում։ Ինձ համար երաժշտությունն է առաջին գործը և դեռ կմնա։ Շատ են ուզում, որ ես դասավանդեմ, բայց գործող երգչուհու համար դժվար է դասեր տալ։ Ես շատ խիստ դասատու եմ։ Կարծում եմ դեռ ժամանակ կա, որ սկսեմ դասավանդել։ Ես ունեմ շատ մեծ ընտանիք, զարմիկներս 8-ն են և չեն թողնի, որ ես ազատ մնամ։ Շատ եմ ձգտում երեխաների հետ լինել։ Իրենց պետք է ժամանակ տրամադրել, իսկ ես միշտ լիցքավորվում եմ երեխաների հետ շփումից և մաքրվում էներգետիկ առումով»,– ասաց Սոնան։

44–ամյա երգչուհուց հետաքրքրվեցինք, արդյոք չի ցանկանում ինքն էլ մայրանալ։ «Աստված ինչպես կամենա։ Չկա այնպիսի բան, որը ես չեմ ուզում»,– պատասխանեց Սոնան։

Թեև Սոնան շփվող և անկեղծ է, անձնական կյանքի մասին խոսել չի սիրում։ Այնուամենայնիվ, երգչուհին խոստովանեց, որ կողակից ունի։ «Դե ինչպես առանց դրա։ Իհարկե, սերը միշտ կա իմ մեջ ու միշտ կմնա,– ասաց նա, իսկ հարցին, թե ինչ փուլում են հարաբերութունները, պատասխանեց,– ես սիրահարված եմ ու կողակից ունեմ, իսկ հարաբերությունները ոչ մի փուլում չեն»։

Անդրադառնալով առաջիկա ծրագրերին` Սոնան ասաց, որ զուգերգ է սպասվում Ռուսաստանում հայտնի երիտասարդ երգիչներից մեկի հետ, սակայն առայժմ փակագծերը բացել չի կարող։