«Նռան հատիկ» սերիալի Նանեն իրականում Ալլայի դերակատարի աղջիկն է

«Նռան հատիկ» հեռուստասերիալում Ալլայի և Նանեի դերակատարները` Ռուզան Վիթ Մեսրոպյանը և Լիա Շուգարովան  իրականում մայր ու դուստր են։  Tert.am Life–ի հետ զրույցում Ռուզանը պատմել է, թե ինչպես դուստրը հայտնվեց հեռուստասերիալում և ինչպես են անցում նկարահանումները նրա հետ։

8-ամյա Լիան առաջին անգամ է ներկայանում սերիալում և աշխատում, գրեթե, ամենօրյա ռեժիմով, սակայն նկարահանվելու փորձ ունեցել է` խաղացել է  Էդգար Բաղդասարյանի «Երեք քույր» ֆիլմում։ Մայրը պատմեց, որ դստեր հայտնվելը «Նռան հատիկ» սերիալում պատահական է ստացվել։

«Երբ Դիանան ինձ հրավիրեց հանդիպման, բալիկիս հետ գնացի, որովհետև ամուսինս տանը չէր, մայրիկիս էլ հարմար չէր մնալ երեխայի մոտ։ Ես անգամ չգիտեի, որ այնտեղ երեխայի դեր կա։ Առաջին անգամ պետք է քննարկեինք ինձ առաջարկվող կերպարը։ Երբ Դիանան առաջին անգամ տեսավ երեխային, հարցրեց` հնարավո՞ր է աղջիկս ցանկանա նկարահանվել։ Ես աղջկաս հարցրեցի, քանի որ ինքը պիտի ասեր` համաձա՞յն է, թե՞ ոչ, ես իրավունք չունեմ իր փոխարեն որոշել։ Բնականաբար, իրեն հետաքրքիր էր, ես էլ համաձայնեցի։ Փորձեցին և տեսան` ինչ արագ ու ճկուն է իր մոտ ստացվում այդ ամենը, և նա ընտրվեց կերպարի համար»,– ասաց դերասանուհին ու հավելեց, որ ինքն ու աղջիկը շատ են կապվել թիմի անդամներին։

Ռուզանը նշեց, որ աղջկան սովորեցնում է պրոֆեսիոնալ լինել նկարահանման հրապարակում, չսրտնեղել ռեժիսորի, օպերատորի դիտողությունից, քանի որ դա արվում է լավ արդյունք ունենալու համար։  «Նա շատ լավ գիտի, որ մենք աշխատում ենք, բոլորն իրեն սիրում են ու եթե պահը պահանջում է խիստ խոսակցություն, դա կապ չունի իր անձի հետ։ Ինքս էլ զգացմունքային չեմ նման հարցերում։ Խմբում հավաքված են բարի, պրոֆեսիոնալ մարդիկ, կարծես մի լավ, ջերմ ընտանիք լինի։ Այնպես որ, դիտողություններից չեմ սրտնեղում»,– նշեց Ալլայի դերակատարը։

Դերասանուհու մոտ մայրական բնազդը գլուխ է բարձրացնում, երբ հարցը վերաբերում է դստեր` դասերը բաց թողնելուն, քիչ քնելուն։ «Մաման մեջս արթնանում է, երբ պետք է մի քիչ ուշ գնանք տուն, քիչ քնի կամ դասերը չհասցնի պատրաստել։ Մեր թիմի անդամները ըմբռնմամբ են մոտենում իմ պոռթկումներին։ Ինքս էլ հասկանում եմ, որ սա սերիալ է, որը նկարահանվում է Հայաստանում։  Սերիալի դեպքում պետք է ճկուն լինես և տեղավորվես ժամանակի մեջ»,– ասաց դերասանուհին։

Ռուզանը բավականին պահանջկոտ է ժամերը պահպանելու առումով։ Նա չի սիրում անտեղի սպասել։ «Ես խնդիր ունեմ ժամերի հետ կապված։ Ես շատ պունկտուալ եմ։ Անգամ, եթե ուզում եմ ուշանալ, չի ստացվում։  Դա բխում է իմ բնավորությունից և նրանից, որ ապրել ու աշխատել եմ Փարիզում։ Ես ինստիտուտն ավարտել եմ ու կյանք մտել` ֆրանսիացիների հետ աշխատելով։ Ինձ մոտ պրոֆեսիոնալ հարթակը ձևավորվել է Փարիզում, որտեղ ուշանալ չկար, ամեն ինչ իր դարակում էր, համակարգված։ Մեր թիմակիցները` սկսած Դիանայից, շատ մարդկային մոտեցան իմ պահանջներին։ Հայաստանում դու կարող ես պրոբլեմատիկ թվալ քո պահանջներով, սակայն ես տեսնում եմ, որ ինձ սիրում են, տեսնում են, որ նեգատիվ ոչ մի բան չկա իմ մեջ,– նշեց Ռուզանը ու հավելեց, որ հիմա յուրօրինակ դպրոց է անցնում` ընտելանում է  հայաստանյան աշխատելաոճին,–  փառք Աստծո, սիրող մարդկանց գրկում եմ անցնում այդ դպրոցը»։

Անդրադառնալով սերիալի և դերասանների հասցեին հնչող քննադատություններին, որոնք չեն շրջանցել նաև երեխաներին` դերասանուհին ասաց, որ երեխաներին քննադատել չի կարելի։ «Նրանց պետք է սիրել և շնորհակալ լինել։ Եթե երեխան հայտնվել է այդ դաշտում, իր հետ բերել է հրաշք։ Երկու երեխաներն էլ`Արենի դերակատար Վարդանն էլ, իմ աղջիկն էլ իրենց պահում են պրոֆեսիոնալ մակարդակով։  Ես չեմ գովում իմ աղջկան, սակայն պետք է ասեմ, որ նման քննադատությունն ինձ համար զավեշտալի է։  Բնական է, որ պետք է լինեն նաև բացասական կարծիքներ, որովհետև մարդիկ տարբեր են, բայց ես մեծ մասամբ միայն դրականն եմ լսում և՛ սերիալի, և՛ խաղընկերներիս մասին։ Հատկապես, հիացած են երեխաներով»,– նշեց նա։

Ինչ վերաբերում է իր և դստեր հարաբերություններին` Ռուզանը նշեց, որ աղջկա հետ շփվում է որպես մեծի, քանի որ նա բավականին հասուն է. «Մենք ընկերներ ենք այն օրվանից, երբ նա հայտնվել է իմ փորիկի մեջ։ Նա դեռ փոքր է, բայց շատ հասուն է և ունի ուժեղ բնավորություն։ Դա, երբեմն, բախումների է բերում։ Երբեմն, հասկանում եմ, որ գործ ունեմ անհատի հետ, և ես պետք է հաշվի նստեմ, իմ յուրաքանչյուր քայլից, խիստ խոսք ասելուց առաջ պետք է մտածեմ։  Հատկապես, երեխայի հետ պետք է վարվել այնպես, որ նա զգա` իրեն ոչ միայն սիրում են, այլև հարգում»։