Հայկոյի և Անահիտի ամանորյա նվերն իրենց որդուն և 2018–ը դիմավորելու տարբերակը

14:05 • 31.12.17

Շոուբիզնես

Հայկոն ու Անահիտ Սիմոնյանն Ամանորը կդիմավորեն Երևանի ռեստորանային համալիրներից մեկում, սակայն ոչ աշխատանքային մթնոլորտում։ Tert.am Life–ի հետ զրույցում Անահիտն ասաց, որ իրեն ազատել է ամանորյա ծանրաբեռնվածությունից, քանի որ հունվարի 2–ին մեկնելու է ԱՄՆ, որտեղ կբացվի իր ատելյեի մասնաճյուղը, իսկ հունվարի 3–ին Հայկոն է մեկնում Ռուսաստան։

«Այս տարի տանը Նոր տարի անելու ժամանակ չունեցանք։ Կեսգիշերին կգնանք ռեստորան։ Մեզ հետ կլինեն նաև իմ ու Հայկոյի մայրիկները, մեր ընկերները։ Հայկական լավ քեֆ ենք անելու։ Որոշեցինք այս տարի ընկերներով միասին նշել նոր տարին, որպեսզի ավելի հետաքրքիր լինի։ Կարծում եմ` երեխաների համար էլ այդպես ավելի լավ կլինի, քանի որ մեր և Գագա Ամատունու որդիները համադասարանցիներ են, իրենք էլ միասին կլինեն»,– ասաց նա։

Անահիտն այլևս չի հավատում Ամանորի կախարդանքին, սակայն ամեն ինչ անում է, որպեսզի որդին հավատա դրան։

«Ես դուրս եմ եկել Ամանորի հեքիաթին հավատալու տարիքից, սակայն երեխային հավատացնում ենք։ Հենց առաջին ձյունը գալիս է, միասին նամակ ենք գրում Ձմեռ պապուն, գցում ենք պատուհանից, որ նա բռնի այն։ Այս տարի մի օր ձյուն եկավ, հասցրեցինք նամակ գրել»,– պատմեց երգչուհին։

Արմանը Ձմեռ պապուց այսօր կստանա բաղձալի նվերը։ «Նա LEGO Marvel-ի բոլոր հերոսներին է ցանկացել ունենալ։ Բավականին ճոխ նվեր է ուզել»,– ժպիտով ասաց Անահիտը, ով երեկ ձեռք է բերել որդու նվերը։

Անահիտը մի փոքր տխուր է, քանի որ ԱՄՆ մեկնելու է առանց որդու և շատ է կարոտելու նրան, սակայն վստահ է, որ հաջորդ անգամ տղային էլ կտանի իր հետ։ «Ցավոք, երեխաս վիզա չունի։ Դժվար եմ տանում երեխայիս հետ բաժանումները։ Երեկոները սկսում եմ տխրել, որովհետև շատ եմ կարոտելու իրեն։ Թռիչքներից էլ սարսափելի վախենում եմ։ Պատրաստվում եմ քնաբեր խմել և քնել ամբողջ ճանապարհին»,– ասաց երգչուհին, ով հունվարի վերջին կվերադառնա Հայաստան։