«Հաճախ հարցնում են` ինչպես ես երթուղային նստում, ասում եմ` շատ սովորական». Վահե Զիրոյանը՝ նոր սերիալի և հայտնիության մասին

Ելենա Արշակյանի նոր հեռուստասերիալի` «Կարմիր բլուրի» մասին  Tert.am Life–ը պատմել է իր ընթերցողներին։ Հեռուստանովելը կմեկնարկի այսօր` ATV– երեկոյան եթերում։ Երևանի կամերային թատրոնի դերասան Վահե Զիրոյանը այստեղ մարմնավորում է գլխավոր հերոսներից մեկին` Ավետին։

Tert.am Life–ի հետ զրույցում նա պատմեց, որ իր կերպարն ընտանիքի փոքր եղբայրն է, ավագ եղբորը մարմնավորում է Սարգիս Գրիգորյանը. «Նա աշխատում է, իսկ ես ուսանող եմ, որը մի փոքր չարաճճի է»։

Վահեն պատմեց, որ հեռուստասերիալում խաղալու իր թեկնածությունն առաջարկել են ստեղծագործական թիմի անդամները` ռեժիսորը, օպերատորները, մարդիկ, ովքեր աշխատում են տեսախցիկի հակառակ կողմում։

«Շնորհակալ եմ բոլոր գործընկերներիս, քանի որ նրանք են ցանկացել, որ ես խաղամ այստեղ։ Շատ ուրախ եմ դրա համար։ Նրանք են առաջարկել իմ թեկնածությունը, ասացին, որ հանկարծ չհրաժարվեմ, ես էլ ասացի` եթե դուք վստահ եք, որ կերպարն իմն է, կկարողանամ դուրս գալ կերպարի տակից , ուրեմն իմն է։ Ինձ համար հետաքրքիր էր այս առաջարկը, քանի որ նորից աշխատելու եմ պրոֆեսիոնալ մարդկանց հետ»,– պատմեց դերասանը։ Ըստ նրա` նկարահանվելով «Կարմիր բլուրում»` ձեռք կբերի ավելի մեծ պրոֆեսիոնալիզմ։ Ավելի պինդ կլինի, թե՛ ֆիլմում, թե՛ բեմում։

Մոտ մեկ տարի է, ինչ Վահեն սկսել է ավելի շատ ներկայանալ հեռուստատեսային նախագծերում։ Նրա կարծիքով` դա հանդիսատեսի ցանկությունն է։ «Փառք Աստծո, թատրոնում ես ունեմ իմ հանդիսատեսը։ Շատ են եղել թեմաներ այն մասին, թե ինչու չեմ երևում էկրաններին, ես էլ իմ հարցազրույցներում ասել եմ, որ առիթ չի եղել։ Օրերից մի օր ինձ հրավիրեցին, հիմա ռեժիսորներն ինձ տեսնում են տարբեր կերպարներում, հրավիրում են»,– ասաց դերասանն ու հավելեց, որ հեռուստատեսային աշխատանքն իր համար հետաքրքիր է։

Հաճախ դերասանները սրտնեղում են, որ մասնագիտական բավարարվածություն միայն թատրոնում են ստանում։ Վահեն սիրում է նաև հեռուստատեսային աշխատանքը։ «Թատրոնն ուրիշ աշխարհ է։ Բեմում ուրիշ հաճույք ես ստանում, սակայն հեռուստատեսությունն էլ իր հաճույքն ունի»,– նկատեց նա։

Ինչ վերաբերում է հայտնիությանը` դերասանն ասաց, որ չի մտածում այդ մասին։ «Ես սովորական մարդ եմ։ Ես չեմ նկատում, որ հայտնի եմ դարձել։ Հաճախ ինձ հարցնում են` ինչպես ես երթուղային նստում, ասում եմ` շատ սովորական։ Ես ինչու չպիտի երթուղային նստեմ, ես ո՞վ եմ` սովորական մարդ։ Մարդը պետք է մնա այնպիսին, ինչպիսին  կա։ Երբեք չգիտես` ճանապարհդ քեզ ուր կհասցնի։ Աստված մի արասցե, բայց մի օր ընկնել էլ կա։ Ես փորձում եմ այդպես ապրել կյանքս»,– եզրափակեց նա։