«Որդիս ծնվեց տարեդարձիս օրը». Հրանտ Թոխատյանը նշում է 60–ամյակը

Դերասան Հրանտ Թոխատյանն այսօր նշում է 60-ամյակը։ Tert.am Life-ի հետ զրույցում նա ասաց, որ սովորաբար տարեդարձի օրը փախչում է աղմկոտ միջոցառումներից, փորձում է միայնակ լինել, սակայն այսօր փոքրիկ հավաքույթ կունենան ամենամտերիմ մարդկանց հետ։ Առայժմ նա չգիտի` ինչ–որ տեղ կգնան, թե տանը կհավաքվեն։

Հրանտ Թոխատյանն օրը սկսել է բարձր տրամադրությամբ, սակայն այն իր համար ազատ օր չէ, քանի որ վաղ առավոտից զբաղվում է ամենօրյա գործերով։ Այս տարվա առանձնահատուկ շնորհավորանքը դերասանը ստացել է թոռնիկից։ 2 ամյա փոքրիկը պապիկին շնորհավորել է ջերմ համբույրով։

Դերասանն իրենց տան միակ հոբելյարը չէ այսօր։ Նրա  ամենատպավորիչ տարեդարձը, թերևս, 1992–ին է եղել, երբ իր 34–ամյակի օրը լույս աշխարհ է եկել որդին` Հայկը։ Հրանտ Թոխատյանը նշեց, որ իր որդու և իր ծննդյան օրերի համընկնումը հաճելի պատահականություն էր։ «Դա աշխարհի ամենամեծ ու ամենալավ նվերն է եղել իմ տարեդարձին»,– ընդգծեց նա։

Կյանքի 60 տարիների ընթացքում դերասանը ունեցել է և՛ ձեռքբերումներ, և՛ բացթողումներ։ «Իմ կյանքի ամենամեծ ձեռքբերումներն իմ երեխաներն են, իմ ընկերներն ու աշխատանքս։ Բնականաբար, ունեցել եմ նաև բացթողումներ, սակայն դրանց մասին այսօր չէի ցանկանա խոսել»,– նշեց դերասանը, որը երբեք չի դադարում երազել։ Ասում է`առանց երազանքների չի կարելի ապրել։

«Բոլոր երազանքները պետք է իրականացնել, որպեսզի ծնվեն նորերը։ Հիմա ամենամեծ երազանքս կապված է Կանազի մշակույթի տանը մանկական թատերական դպրոց բացելու հետ»,– նշեց նա։ Իր երազանքն իրականացնելու ճանապարհին դերասանը շուտով կմեկնի ԱՄՆ։ 60-ամյակի առթիվ Հրանտ Թոխատյանն ընկերների` Հարութ Փամբուկչյանի, Սերժ  Թանկյանի, «Դեմք շոուի» և այլոց մասնակցությամբ ներկայացում կունենա ԱՄՆ–ում, իսկ հասույթը կուղղի Կանազի մշակույթի տան վերակառուցմանը։

«Ամերիկայի ընկերներս առաջարկեցին ներկայացում խաղալ, համաձայնեցի։ Չեմ թաքցնի, որ համաձայնեցի, որպեսզի գումար բերեմ այնտեղից  Կանազի մշակույթի տան կառուցման համար։  Բոլորը համաձայնեցին, որ դա լինի բարեգործական ներկայացում և ամբողջ գումարը ուղղվի Կանազի մշակույթի տանը։ Տարբեր տեղերում կանեմ  ներկայացումներ, համերգներ, իմ շուրջ կհավաքեմ ընկերներիս, և այդ գումարները կներդնեմ իմ գործի մեջ»,– նշեց պրն Թոխատյանը։

Ընթացիկ տարվա համար դերասանը շատ ծրագրեր ունի։ Նա հայտնեց, որ առաջիկայում հանդիսատեսի դատին կհանձնի 2 նոր ներկայացում և ֆիլմեր։