«Ձյան հեքիաթ». Ինգա և Անուշ Արշակյանները նոր նախագիծ ունեն

Մոտ 5 տարվա դադարից հետո Ինգա և Անուշ Արշակյանները նորից անդրադառնում են հայկական ազգային երաժշտությանն ու հանդիսատեսին ներկայացնում նոր նախագիծ՝ «Ձյան հեքիաթ» խորագրով։  Tert.am Life-ի հետ զրույցում Անուշ Արշակյանը պատմեց գաղափարի և կատարված աշխատանքի  մասին։

«Որոշեցինք գնալ հանդուգն քայլի՝ մեր երաժշտության մաքրամաքուր ու բյուրեղյա գոհարները սիմֆոնիկ մշակմամբ ներկայացնել հենց այնպես, ինչպես կան։ Այս խոշոր կտավի մասշտաբներով մեր երգերը երբևէ չեն ներկայացվել։ Սա շատ մեծ ռիսկ էր, քանի որ մենք մշակում ենք անում սիմֆոնիկ նվագախմբի համար, որտեղ ամեն գործիք ունի իր ուրույն մեղեդին։ Այդ տարբեր մեղեդիների համակցությունը բազմաձայնություն է կոչվում։ Կոմիտասը նշել է, որ թեպետ հայ ժողովրդական երաժշտությունը բազմաձայնություն չգիտե, բայց և հաճախ պատահում են դեպքեր, որոնք ցույց են տալիս կանոնավոր երկձայնի նշաններ։ Այսպիսով` 85 հոգանոց մեծ կազմով սիմֆոնիկ նվագախմբի համար մշակում անելը չափազանց մեծ ռիսկ էր ու կարծում եմ`հաջողված փորձ էր»,- նշեց երգչուհին ու հավելեց, որ նախագծում իրենց մասնակցությունն են ունեցել Հայաստանի Ազգային ֆիլհարմոնիկ նվագախումբը Էդուարդ Թոփչյանի ղեկավարությամբ և «Հովեր» երգչախումբը՝ Սոնա Հովհաննիսյանի ղեկավարությամբ։ Սիմֆոնիկ մշակումն արել է Անդրանիկ Բերբերյանը։

Անուշն ասաց, որ հայկական երաժշտությունը ինքնատիպ է, գեղագիտական բարձր արժեք ունի և չի զիջում համաշխարհային դասական երաժշտության լավագույն գործերին։

«Ձյան հեքիաթը» սպասվելիք աշխատանքի  մի մասն է միայն։ Երգչուհին վստահեցնում է, որ հնարավորության դեպքում անպայման կշարունակեն ընդլայնել այն։ «Ձյան հեքիաթը» երգ-եռատում է, որում առկա են ժողովրդական և հեղինակային ստեղծագործություններ։ Այն իր մեջ ներառում է Կարո Չալիկյանի «Երկանք», Լիլիթ Սիմոնյանի հեղինակային «Ձյուն ա դրել» և Կոմիտասի ազգագրական ժողովածուից «Սար-սար» ստեղծագործությունները։

«Բոլոր երգերը վերցված են մեր երաժշտական գանձարանից։ Իրականում ձայնադարանն այնքան մեծ է, որ նույնիսկ մի ամբողջ կյանքը բավական չէ բոլոր ստեղծագործություններին անդրադառնալու համար»,-նշեց Անուշը։

Երգչուհու խոսքով` այն երգերը, որոնք մշակվում են, ներկայացնելու են իսկական հայկական վոկալ  դպրոցը՝ իր բոլոր առանձնահատկություններով։ Երգչուհին մեջբերում արեց Կոմիտասի «Հոդվածներ և ուսումնասիրություններ» գրքից. «Ժողովրդի երգեցողությունն ունի ինքնուրույն դպրոց, ուր դաս են առնում ամենքը ամեն ժամանակ, երբ կարիք են զգում։ Գեղջուկի դպրոցը, ուսուցիչը և առարկան բնությունն է»։

Անուշն ընդգծեց, որ «Ձյան հեքիաթի» հիմնական նպատակն է պահպանել ու շարունակել ազգային երաժշտության ավանդույթները։ Երգչուհին ասաց նաև, որ այն աստվածային գործերը, որոնք մշակվել են և պետք է մշակվեն, մեծագույն հարգանքի դրսևորում են՝ այդ ձայնադարանը մեզ ժառանգած հանճարեղ մարդկանց հանդեպ։

«Այդ երգերի մեջ մեր կյանքն է, մեր կենցաղն ու մեր պատմությունը»,-եզրափակեց երգչուհին։

Լիլիթ Սաֆարյան