Էրիկ. «Բոլորի հետ չես կարող ամուսնանալ, արտիստին պետք է սիրել իր երգերի համար»

2017-ը երգիչ Էրիկի համար բուռն աշխատանքային էր` 2 նոր տեսահոլովակ, նոր երգեր, համերգային շրջագայություններ, պրոդյուսերի և ժյուրիի փորձ XFactor նախագծում։ Tert.am Life–ը նրա հետ զրուցել է առաջիկա տարվա անելիքների մասին։ Երգիչը խոստանում է, որ 2018–ին ևս մի շարք նորություններ կներկայացնի իր լսարանին։

2018–ն Էրիկը սկսել է Իրանում կայացած համերգային ծրագրով, ասում է` այս տարի նախատեսում է տարբեր համերգներով ներկայանալ նաև Երևանում և մարզերում։ Երգչի երևանյան մեծ մենահամերգից 2 տարի է անցել, երգիչն արդեն մտածում է  հաջորդ մենահամերգի մասին, սակայն նախ պետք է ծրագիրը կազմի։ Էրիկը նշեց, որ Սիմֆոնիկ նվագախմբի հետ ունեցած մենահամերգին կհաջորդի ավելի թեթև ու դրայվով մենահամերգ, որին ևս շատ լուրջ կնախապատրաստվի։

Առաջիկայում Էրիկը նոր տեսահոլովակ կնկարահանի, ինչպես ինքը նշեց, ուրախ, պարային, հետաքրքիր երգի հիման վրա։ Այս անգամ երգն ինքը չի հեղինակել։ Թե ինչ երգ է սպասվում, նա փակագծեր չբացեց, փոխարենը հայտնեց, որ տեսահոլովակը կնկարահանվի փետրվարի վերջին կամ մարտի սկզբին։

«Վերջին տեսահոլովակս` «Իմ աշխարհ եկ»–ը նոր եմ թողարկել։ Թող մի քիչ ժամանակ անցնի։ Ես այն արտիստներից եմ, որ պատրաստի տեսահոլովակ եմ ունեցել, սակայն չեմ թողարկել, որովհետև չեմ սիրում տարին 6 տեսահոլովակով «խեղդել» լսարանին և «ստիպել» անընդհատ ինձ լսել»,– նկատեց նա։

Էրիկը նշեց, որ վերջերս անընդհատ ստեղծագործական պրոցեսի մեջ է։ Նոր երգեր է գրում, «Իմ աշխարհ եկ» հիթ դարձած երգի ոճով նոր երգ էլ ունի, սակայն այն լսարանին կներկայացնի ավելի ուշ. «Նախորդ տարի իմ երգացանկում գերակշռեցին ռոմանսային երգերը, այս տարի որոշել եմ ավելի ակտիվ երգեր ներկայացնել»։

Ինչ վերաբերում է հարցին, թե երբ է պատրաստվում կոտրել երկրպագուների սրտերը` Էրիկն իրեն բնորոշ պատասխան տվեց. «Չեմ կարծում, որ ես այն արտիստներից եմ, ով, ունենալով իր անձնական կյանքը, պետք է կոտրի իր հանդիսատեսի  սիրտը։ Ես բազմիցս շեշտել եմ և միշտ աշխատել եմ լինել այն արտիստը, որին պետք է սիրեն իր երգերի և գործունեության համար։ Արտիստին պետք է սիրել իր երգերի համար, պարզ է, որ բոլորի հետ չես կարող ամուսնանալ:) Շատ եմ ցավում բոլոր ժամանակների այն արտիստների համար, որոնք, գտնելով անձնական կյանքը, կորցրել են հանդիսատես։ Ուրեմն` մի բան սխալ են արել։ Ես աշխատում եմ այնպես անել, որ ինձ սիրեն իմ երգերի համար»։ Երգիչը նշեց, որ սերը շատ գեղեցիկ երևույթ է, հատկապես, երբ մարդիկ սիրո արդյունքում ունենում են ընտանիք, երեխաներ։ Ի վերջո, մարդիկ   սիրո արդյունքում են ծնվում։

Այս օրերին շոու բիզնեսում ամենաքննարկվող թեմաներից է «Դեպի Եվրատեսիլը»։ Էրիկն ասաց, որ իրեն միշտ հետաքրքրել է «Եվրատեսիլ» երգի մրցույթը, արտիստի համար կարևոր է մրցույթին մասնակցելու պրոցեսը։ Ինչ վերաբերում է հարցին, թե ում է այս տարի տեսնում «Եվրատեսիլում» Էրիկը զգուշավոր պատասխան տվեց` պահելով գործընկերային հարաբերությունների էթիկան։

«Միշտ սիրել եմ այդ մրցույթը, ինձ համար այն միշտ հետաքրքիր է եղել: Կարծում եմ՝ ցանկացած արտիստի համար այնտեղ գտնվելը մեծ տոն է, անկախ նրանից, թե որ հորիզոնականը կզբաղեցնի: Ինձ համար ավելի շատ պրոցեսն է հետաքրքիր, քան բուն ելույթը, որը 3 րոպե է տևում։ Գիտեմ, որ իմ գործընկերներից շատերը մասնակցում են։ Բոլորին հաջողություն եմ մաղթում։ Իմ կոլեգաների կողքին նաև XFactor–ի իմ մասնակիցներից շատերն են։ Իրենց համար էլ եմ շատ ուրախ։ Բոլորն իմ ընկերներն են, իմ մասնակիցները, որևէ մեկին առանձնացնել չեմ կարող։ Արտիստների մասին խոսել չեմ ուզում, սա երգի մրցույթ է։ Չկա կոնկրետ երգ, որն ինձ համար ֆավորիտ է։ Թող հաղթի լավագույնը, ոչ թե կոնկրետ զանգվածի համար, այլ այն, որը լավագույնս կներկայացնի Հայաստանը»,– ասաց նա։