«Կասկածելի երեկոն» այլևս չի լինի, «Լավ երեկոն» կշարունակվի. Գարիկը բացահայտումներ է անում

«Վիտամինցիների» թիմի 2 նախագծերը` «Լավ երեկոն» և «Կասկածելի երեկոն», հայկական հեռուստաեթերի ամենապահանջված ժամանցային նախագծերից են։ Գարիկը զբաղված է այս երկու նախագծերում` առաջինում լսարանին ներկայանում է Արամ MP3–ի, երկրորդում` Ռոբի` Ռոբերտ Մարտիրոսյանի հետ։ Շուտով կսկսվեն հեռուստաընկերությունների նոր եթերաշրջանները։ Հեռուստադիտողները «Լավ երեկոն» դիտելու հնարավորություն կունենան, «Կասկածելի երեկոն»` ոչ։ Tert.am Life–ի հետ զրույցում Գարիկը պատմել է առաջիկա անելիքների և «Կասկածելի երեկոն» փակելու որոշման մասին։

Գարիկը հայտնեց, որ «Լավ երեկոն» նոր եթերաշրջան միանշանակ ունենալու է։ Առաջին եթերաշրջանը մեծ արձագանքներ ստացավ և նույնիսկ գերազանցեց սպասելիքները։ Ստեղծագործական խմբի առջև դժվարին խնդիր կա. երկրորդ եթերաշրջանը չպետք է զիջի առաջինին։

«Միանշանակ նոր եթերաշրջանում լինելու են նորություններ, սակայն դա չի լինելու այլ հաղորդում։ Հեռուստադիտողը պետք է զգա, որ մենք ոչ միայն գնացել ենք արձակուրդ ու անջատվել, այլև հանգստացել ու մտածել ենք նոր բաներ։ Մենք ամբողջ էներգիայով, հավեսով ու էնտուզիազմով մտածում ենք` ինչ անել։ Մենք էլ ենք սպասում, թե ինչ ենք անելու նոր եթերաշրջանում»,– ասաց Գարիկը։

Հումորիստը նշեց, որ այժմ լիովին ընդգրկվել է հաղորդման սցենարական կազմում, քանի որ այդպես ավելի հեշտ է աշխատել։ Սցենարիստների խմբում այժմ ընդգրկված են նա, Ռոբերտ Մարտիրոսյանն ու Վան Գրիգորյանը։ Գարիկը նկատեց, որ շատ հաճախ իրենց է միանում նաև Արամը։

«Մենք սովոր ենք ելույթ ունենալ մեր սցենարով։ Այս անգամ էլ հասկացանք, որ եթե սցենարը մենք չենք գրում, մեզ համար խորթ է լինում այն, ինչ անում ենք։ Եթե նախորդ եթերաշրջանի հետ կապված ինչ–որ դիտողություններ ունեմ, ունեմ նաև ինքս իմ հանդեպ։ «Լավ երեկոն» շատ շտապելով ու միանգամից մտավ եթեր։ Մենք չհասցրեցինք անել այն ամենը, ինչ պատկերացնում էինք, սակայն մեր մտածածի 90 տոկոսը հասցրել ենք անել»,– ասաց Գարիկը։

Հաղորդման լրագրող Արուսիկ Տիգրանյանը միանգամից ինտեգրվեց թիմին ու սիրվեց լսարանի կողմից։ Գարիկը նրան համարում է իրենց ձեռքբերումներից։ «Արուսիկը կարճ ժամանակում դարձավ ոչ թե նախագծի աշխատող, այլ թիմի լիարժեք անդամ։ Դա իր աշխատասիրության ու տեսակի շնորհիվ էր։ Նա անկրկնելի տեսակ ունի` որպես աղջիկ հումորիստ։ 10 տարուց ավելի է մենք անընդհատ քասթինգների միջոցով փնտրել ենք այս տեսակի մարդ, սակայն Զառայից հետո չենք կարողացել համալրել մեր շարքերը իմպրովիզ հումոր ունեցող աղջկանով»,– նշեց նա։

Նախորդ եթերաշրջանի ամենատպավորիչ հաղորդումը Գարիկի համար եղել է գեներալ Սեյրան Սարոյանի մասնակցությամբ թողարկումը։ «Ամենատպավորիչն էր որովհետև... ամեն մեկն իր «որովհետև»–ը կարող է ասել։ Միայն այն, որ նա եկավ մեզ հյուր ու դարձավ հաղորդման մի մասնիկը, արդեն լավ էր։ Մենք ունեցել ենք հյուրեր, որոնք լուրջ ոլորտից եկել են և չեն կարողացել կոտրել այդ լրջությունը։ Գեներալի մասնակցությամբ հրաշալի հաղորդում եղավ։ Մենք նախատեսում էինք նաև խաղի հատված, սակայն դա պետք է լիներ հարցազրույցի հաշվին։ Մենք հասկացանք, որ զրույցից ավելի ոչինչ չարժե անել։ Բոլոր տեսակի էմոցիաները, որ պետք է  բալանսավորեինք խաղով և հարցազրույցով, միայն հարցազրույցով ստացանք»։

Գարիկի հետ զրուցեցինք նաև «Շանթ» հեռուստաընկերությամբ հեռարձակվող «Կասկածելի երեկո» նախագծի մասին, որն իրականացնում են Ռոբի` Ռոբերտ Մարտիրոսյանի հետ։ Հումորիստը հայտնեց, որ «Կասկածելի երեկոն» նոր եթերաշրջան չի ունենա. «Հյուրերը վերջացան... հիմա ամբողջ ուժերով կպած ենք «Լավ երեկոյին»»։

Դերասանից հետաքրքրվեցինք` արդյոք «Շանթի» հետ սպասվում է այլ համագործակցություն. «Միանշանակ։ Այդ ուղղությամբ էլ ենք աշխատում։ Ռոբի հետ իմպրովիզացիոն  նոր հաղորդման նպատակ կա։ Տեսնենք ինչպես  կստացվի»։

«Կասկածելի երեկոն» լի էր հետաքրքիր բացահայտումներով առաջին հերթին  Ռոբի և Գարիկի մասին։ Եթե հյուրերի մասին բացահայտումները մեկ–երկուսն էին, հաղորդավարներին այլ տեսանկյունից ճանաչելու համար հեռուստադիտողն ամբողջ 2 տարի ուներ։ Գարիկը նշեց, որ Ռոբի հետ աշխատելը շատ հետաքրքիր էր։

«Ռոբն ամենաառանձնահատուկ մարդն է, որին երբևէ կարող եք հանդիպել աշխարհում։ Իր նման բազա ունեցող մարդու հետ միշտ կարող ես շփվել։ Իր հետ հետաքրքիր է աշխատել, որովհետև նա լավ իմաստով այնքան հեռուստատեսային չէ, այնքան փակագծային չէ, այնքան չի ընկնում ձևերի հետևից, որ կարող է մոռանաս, որ դու եթերով ես դիտում իրեն։ Քեզ կարող է թվալ` ընկերներով հավաքվել եք ու ուղղակի հումոր եք անում։ Ինքն ամենաանկեղծ մարդկանցից է, որին կարող ես տեսնել եթերով։ Նա շատ յուրահատուկ մարդ է։ Իմպրովիզացիոն ժանրն ամենաբարդն է հումորիստների համար։ Մենք 10 տարուց ավելի բեմից են արել այդ հումորը, Ռոբը միշտ մեզ հետ է եղել, «Վիտամինի» սցենարիստներից է, սնել է «Վիտամինը» հումորներով ու այսօր ապացուցեց, որ ոչ միայն որպես սցենարիստ, այլև իմպրովիզատոր հրաշալի է, ոչ ոքի չի զիջում»,– նկատեց Գարիկը ու հավելեց, որ մեծ հաճույքով կրկին եթերում կլինի Ռոբի հետ։