Գեղեցկության ևս մի մրցույթ Հայաստանում. «Միսս Հայաստան 2012»–ի կազմկոմիտեի նախագահը բացում է փակագծերը

Ինչպես արդեն հայտնել ենք, մայիսին Գոհար Հարությունյանը երկրորդ անգամ կանցկացնի գեղեցկության մրցույթ, որն այս անգամ կունենա «Միսս Հայուհի» անվանումը։ 2012 թվականի Հայաստանում անցկացված «Միսս Հայաստան» մրցույթի կազմկոմիտեի նախագահ Մամիկոն Դանիելյանը ևս այս տարի պատրաստվում է գեղեցկության մրցույթ անցկացնել։ Թե ինչ անվանում կունենա մրցույթը, նա դեռ չգիտի, քանի որ իր խոսքով` գործում է  «Միսս Հայաստան-ազգային գործակալություն» հկ–ից անկախ։  Tert.am Life–ի հետ զրույցում նա ասաց, որ այս պահին չի համագործակցում Կարեն Արիստակեսյանի հետ։

Նա նախատեսում է մրցույթ անցկացնել գարնան վերջին, թեև ժամկետները հնարավոր է փոփոխվեն։ «Մենք ընտրելու ենք Հայաստանի գեղեցկուհուն։ Սա կլինի եթե ոչ ամենակարևորը, ապա ամենակարևոր մրցույթներից մեկը Հայաստանում, որովհետև այս մրցույթի շուրջ համախմբվել են ուժեր, որոնք առնչվում են գեղեցկության մրցույթների, մոդելային գործակալությունների  հետ։ Շատ պրոֆեսիոնալ թիմ է հավաքվել։ Արդեն կան աղջիկներ, որոնք գրանցվել են մեզ մոտ և սպասում են մրցույթ անցկացնելուն»,– ասաց նա։

2012–ին անցկացված մրցույթը բավականին շատ քննադատությունների արժանացավ, նախընտրական փուլն այնքան քննադատությունների տեղիք տվեց, որ շատերը չհետևեցին բուն մրցույթին։ Մամիկոն Դանիելյանը մրցույթի կազմկոմիտեի նախագահը եղել է հենց այդ տարի, սակայն որակումների հետ համաձայն չէ։

«Հայաստանում մրցույթ կազմակերպելը շատ բարդ է։ Այդ մրցույթը պրոֆեսիոնալ է եղել։ Հայտարարություն է տրվել, որ ՀՀ գրանցում, 170 սմ մոտ հասակ, 90/60/90 չափանիշներին մոտ կազմվածք ունեցող համապատասխան տարիքի աղջիկները կարող են դիմել գրասենյակ։ Սրանք միջազգային չափանիշներն են։ Մոտ 800 մարդ է դիմել։ Եթե աղջիկն այդ չափորոշիչներով գալիս է, դու կխախտես պայմանը, եթե չընդունես իրեն։ Աղմուկ բարձրացավ մի աղջկա ելույթի համար, որն իր բոյը շփոթել էր քաշի հետ։ Այդ աղջկա  հասակը, կազմվածքը մոտ էր չափանիշներին, եկել էր մասնակցելու։ Դիմագծերը թողնենք մի կողմ։ Գոյություն ունեն փուլեր, որոնք նրանք անցնում են կամ ոչ։ Գուցե, սխալ էր մանրամասն ցույց տալ, թե ինչ է կատարվել նախընտրական փուլերում, սակայն դա շոու է և հեռուստատեսությունը որոշել է ցույց տալ բոլոր փուլերը։ Ես չեմ ժխտում, որ մրցույթն ունեցել է իր թույլ կողմերը, որը մի շարք գործոններով է պայմանավորված եղել` ֆինանսական խնդիրներով և այլ հարցերով, սակայն անօրինական, անորակ որևէ բան չի եղել»,– ընդգծեց նա։

Ըստ Մամիկոն Դանիելյանի` 6 տարի անց իրենք նոր մրցույթ կանցկացնեն նախորդ փորձից դասեր քաղած, սակայն 2012–ին էլ բավականին լավ մասնակիցներ են ունեցել։ «Չեմ կարծում, որ 2012–ին այդքան վատ էր, ուղղակի մենք սիրում ենք ամեն ինչի մեջ նախ վատը տեսնել, հետո լավը։ Այնտեղ նորմալ աղջիկներ են մասնակցել։ Եղել են նաև մարդիկ, որոնց մասնակցությունն ավելի հումորային է դարձել։ 2012–ի բացասական կողմն այն էր, որ մրցույթն ավարտվեց ու շարունակություն չունեցավ։ Մասնակիցներն ապագա չեն ունեցել։ Մեր նպատակն է, որպեսզի մասնակիցների համար շարունակություն լինի, ունենան համագործակցություն միջազգային մոդելային կազմակերպությունների հետ, մասնակցություն միջազգային մրցույթներին»,– ասաց նա ու հավելեց, որ այժմ բանակցություններ են վարում այդ ուղղությամբ։ Բացի այդ, իրենք ցանկանում են մրցանակային մեծ ֆոնդ սահմանել` հնարավորության դեպքում մեքենայի կամ գումարի տեսքով։

Նրանից հետաքրքրվեցինք, թե խոսքը միջազգային որ մրցույթների մասին է։ Դիտարկմանը, որ այս պահին միջազգային մրցույթների հետ բանակցություններ է վարում նաև Գոհար Հարությունյանի գործակալությունը, ըստ էության, նրանք մրցակիցներ են դառնալու, Մամիկոն Դանիելյանը պատասխանեց. «Փորձում ենք բանակցել «Միսս Տիեզերքի»  հետ։ «Միսս աշխարհի» հետ դեռ ոչինչ չենք խոսել, որովհետև  Գոհարը համագործակցում է, Կարեն Արիստակեսյանը տեղեկացրեց, որ ինքն էլ է խոսում նրանց հետ։  Մենք փորձում ենք բանակցել այլ մրցույթների  հետ»։ Ըստ նրա` իրենք չեն ուզում լարված և մրցակցային դիրքում լինել մյուս մրցույթների հետ։

Հարցին, թե ինչու որոշեցին մրցույթ կազմակերպել հենց հիմա, երբ Գոհար Հարությունյանը սկսել է մրցույթ անել, Մամիկոն Դանիելյանը պատասխանեց, թե դա պատահական համընկնում էր, իրենք սա ծրագրել էին նաև նախորդ տարի, սակայն պահը հիմա է հասունացել։ Ավելի վաղ Կարեն Արիստակեսյանն էլ հայտարարել էր «Միսս Հայաստան» անցկացնելու մասին։ Եթե նրանք կյանքի կոչեն գաղափարները, ըստ էության, Հայաստանում մի տարվա ընթացքում կկազմակերպվի գեղեցկության 3 մրցույթ։ Մամիկոնից հետաքրքրվեցինք` որքանո՞վ է իրատեսական, որ Հայաստանում մոդելային արտաքինով այդքան մարդ կգտնվի։ Ի պատասխան` նա ասաց, որ դա նույնիսկ քիչ է։ «Աշխարհում մի քանի մրցույթներ են կազմակերպում, անգամ, մեր երկրի չափ բնակչություն ունեցող երկրներում»,– կարծում է նա։

Թե ովքեր կլինեն մրցույթի ժյուրիի կազմում, Մամիկոն Դանիելյանը դեռ  չգիտի։ «Հովանավորներ չեն լինելու ժյուրիի կազմում։ Նախորդ տարիների գեղեցկուհիներ կլինեն, թե ոչ, չգիտեմ։ 2012–ին եղել են։ Ես շատ կցանկանայի, որ «Միսս Հայաստանի» տարբեր տարիների  տիտղոսակիրներն առնչվեն մրցույթին։ Մենք պետք է ունենանք այնպիսի գեղեցկուհի, որը գեղեցկության սիմվոլ կլինի, Հայաստանը կներկայացնի արտերկրում և մենք հպարտ կլինենք, որ դուրս ենք տանում այդ  աղջկան»,– ասաց նա։

Հարցին` ներկայիս գեղեցկուհու տիտղոսակրի` Լիլի Սարգսյանի մասին ինչ կարծիք ունի, Մամիկոնը զերծ մնաց պատասխանել` նշելով, որ 2017–ին կայացած մրցույթին չի հետևել, քանի որ հրավեր չի ստացել, իսկ հեռուստատեսությամբ հետևելու ժամանակ չի ունեցել։ Լիլիին տեսել է, սակայն կարծիք հայտնել չի կարող, քանի որ չգիտի, թե ովքեր են նրա մրցակիցները։