«Մաման ինձ համար կնոջ իդեալ է». Անահիտ Կիրակոսյանի կազմակերպած խնջույքն ու հուզիչ անակնկալը դստեր 16–ամյակին

Դերասանուհի Անահիտ Կիրակոսյանն ու ամուսինը` Արտակ Սարգսյանը, օրերս նշել են իրենց դստեր` Լաուրայի 16–ամյակը։  Tert.am Life–ը ֆիքսել է միջոցառման ամենահետաքրքիր ու հուզիչ պահերը և իր ընթերցողներին է ներկայացնում մանրամասները։

Մեզ հետ զրույցում Լաուրան պատմեց, որ խնջույքը կազմակերպել է Անահիտը։ «Սա իմ լավագույն տարեդարձն էր։ Միշտ ծնունդս նշել եմ հարազատներիս հետ` տանը, իսկ այս տարի ընկերներիս հետ եմ։ Ամեն ինչ մաման է կազմակերպել։ Օրեր առաջ նա ասաց՝ գրիր այն մարդկանց ցանկը, որոնց ուզում ես այդ օրը կողքիդ տեսնել և ասա քո սիրելի երկու գույնը։ Մնացած ամեն ինչ մաման վերցրել էր իր ուսերին, ինչի համար շատ շնորհակալ եմ։ Մինչև վերջնական ընտրությունը նա  ինձ հարցնում էր համաձա՞յն եմ, թե՞ ոչ, ասում էի` մամ, ես քեզ վստահում եմ»,– պատմեց նա։

Խնջույքը կազմակերպված էր սևի և ոսկեգույնի համադրությամբ։ «Սևն ինձ համար ամենաէլեգանտ գույնն  է, մաման ասաց ևս մի գույն ընտրենք, որպեսզի մռայլ չլինի, ընտրեցի ոսկեգույնը, որովհետև ոսկի շատ եմ սիրում։)»,– ավելացրեց Լաուրան։

Անահիտն անակնկալների մեծ վարպետ է և չէր կարող խնջույքից զատ որևէ անակնկալ չմատուցել Լաուրային։ Աղջկա անակնկալները սկսվել են կեսգիշերին։ «Կեսգիշերին մաման մեծ տեսանյութ էր պատրաստել արխիվային կադրերով, որից հետո դեռ ուշքի չեմ եկել։ Տեսանյութը նեղ անձնական էր, միայն կասեմ, որ ամեն ինչ կապված էր իմ մանկության հետ։ Իմանալով, որ ես Black Star–ի մեծ երկրպագու եմ, նաև  Black Star–ի անդամների մասնակցությամբ շնորհավորանքներ էր կցել, որոնք գտել էր տարբեր տեղերից։ Բացի այդ, ինձ շատ սպասված նվեր մատուցեց` վաղուց մուշտակ էի հավանել։ Նա դա չէր մոռացել, չնայած բավականին ժամանակ էր անցել և այսօր նվիրեց,– պատմեց Լաուրան ու հավելեց, որ այս ամենը նաև հայրիկի կողմից է։ –Մաման մտքերի գեներատորն է, վերջում հաշիվները փակում է պապան։) Այնպես որ, ամեն ինչ երկուսի կողմից էր»։

Անահիտն աղջկան անակնկալ մատուցեց նաև խնջույքի ժամանակ։ Նա կատարեց Վերա Բրեժնևայի Девочка моя երգը։ «Հիշիր, դու ինձ ունես, երբեք ոչնչից չվախենաս» խորհրդանշական խոսքերով երգը հուզեց Լաուրային, կրտսեր քրոջը` Անուլիկին և Արտակին։ Աղջիկները հուզմունքը զսպել չէին կարողանում, Արտակը դժվարությամբ էր թաքցնում էմոցիաները։

«Մաման ինձ համար կնոջ իդեալ է ամեն հարցով։ Ինչ–որ քայլ անելուց առաջ միշտ մտածում եմ` մաման ինչպե՞ս կվարվեր, արդյունքում ճիշտ քայլեր եմ անում։ Չեմ կարողանում իրենից գաղտնիք պահել` ամենաշատը` 2 օր, հետո գնում եմ ու ամեն ինչ պատմում։ Միշտ խորհրդակցում եմ նրա հետ, իմ կյանքում շատ կարևոր դեր ունեն իր խորհուրդները։  Իհարկե, որպես մամա, նաև խիստ է լինում, երբ տեսնում է, որ խորհուրդները չեն օգնում։ Դա շատ մեղմ խստություն է, որը ես գնահատում եմ։ Շատ հաճախ մաման չի մտածում  որպես ծնող, մտածում է` ինքն իմ տարիքում ինչպես է վարվել, ու  ընդառաջում է ինձ, ավելի նորողամիտ է լինում։ Մեր տարիքային տարբերությունը 12 տարի է և դա մեզ շատ է օգնում։ Ինքն իմ առաջին, ամենամոտ ընկերուհին է»,– նշեց Լաուրան։

Աղջիկը նկատեց, որ ինքն ու Անահիտը շատ զգացմունքային են և միշտ կարողանում են հուզել իրար։ Լաուրան ևս բուռն է արտահայտում իր զգացմունքները ու ժամանակ առ ժամանակ հուզիչ գրառումներ է անում Անահիտի մասին։ «Երկու էմոցիոնալ մարդկանց համար դժվար է ապրել իրար հետ։ Երկուսս էլ շատ զգացմունքային ենք։ Երբ ինչ–որ հուզիչ գրառում եմ անում, մաման կարող է գալ, ինձ գրկել ու հուզմունքից արտասվել։ Այնպես է հուզվում, ասում եմ` հաջորդ անգամ այսպես չեմ անելու:)»,– պատմեց նա։

Լուսանկարները` Շաքե Հովհաննիսյանի