«Ես խոսում եմ «Եվրատեսիլում» հաղթելու մասին, «Դեպի Եվրատեսիլում» հաղթանակի համար կասկած չունեմ». Մհեր

EXCLUSIVE

Փետրվարի 19-ին, 22-ին և 25-ին կկայանա «Դեպի եվրատեսիլ» մրցույթը, որի ժամանակ հանդիսատեսն ու պրոֆեսիոնալ ժյուրին կընտրեն «Եվրատեսիլ 2018»–ին Հայաստանի պատվիրակին։ Երգիչ Մհերի անունը մրցույթի շրջանակում ամենաքննարկվողներից մեկն է։ Նախ` քննարկվում էր, որ նրան օժանդակում է ՀՀ Առաջին տիկին Ռիտա Սարգսյանը, այնուհետև, որ նրա երգը պլագիատ է։ Այս թեմաների շուրջ մինչև այս մեկնաբանություն էր տալիս միայն Մհերի պրոդյուսերը` Գեորգի Հարությունյանը։ Tert.am Life–ը զրուցել է անձամբ Մհերի հետ։

«Ակնկալիքս այն է, որ Հայաստանը հաղթանակով վերադառնա «Եվրատեսիլից» և մրցույթը բերի Հայաստան։ Կարծում եմ` իմ երգը հաղթական է։ Ես խոսում եմ Լիսաբոնում հաղթանակի համար։ Այստեղի հաղթանակի համար կասկած չունեմ։ Չեմ կարող ասել` ինչն է ինձ այդպիսի վստահություն տվել, դա ներքին զգացողություն է»,– ասաց նա։

Վերջին շրջանում շատ են խոսակցությունները, որ Մհերը կարող է հաղթել Առաջին տիկնոջ աջակցությամբ։ Անդրադառնալով հարցին` գուցե նրա հետ մտերմությո՞ւնն է իրեն այդպիսի վստահություն տվել, երգիչը պատասխանեց. «Ռիտա Ալեքսանդրովնան բացարձակ կապ չունի «Եվրատեսիլ» մրցույթի հետ։ Մրցույթով զբաղվում է Հանրայինը։ Հանրապետության Առաջին տիկինը չի զբաղվում «Եվրատեսիլ» մրցույթով, զբաղվում է տարբեր գործունեությամբ` բարեգործությամբ, օգնում եմ շատ մարդկանց։ Կարծում եմ` ազդեցություն լինել չի կարող։ Մենք ընդհանրապես չենք խոսել իմ մասնակցության մասին»,– ասաց երգիչը։

Խոսելով մրցակիցների մասին` Մհերն ասաց, որ չի ցանկանում որևէ կարծիք հայտնել, ամեն մեկն անում է իր գործն այնպես, ինչպես ինքն է ճիշտ համարում։ «Դա երաժշտի, արտիստի տեսակն է։ Ամեն մեկն ունի իր տեսակը, ներկայացման ձևը, երգի ոճը։ Դա նորմալ ստեղծագործական պրոցես է։ Հաղթելու է արդարությունը, լավ երգելը։ Չկան երգեր, որոնց ինձ համար լուրջ մրցակից եմ համարում։ Կան լավ երգեր, բայց ես չեմ համարում, որ դրանք մրցակից են»,– ասաց նա, իսկ հարցին` արդյոք իրեն մրցակցությունից դուրս է համարում, պատասխանեց. «Հարցն այդ չէ, ուղղակի ամեն երգիչ վստահ է իր երգի, ստեղծագործության վրա։ Ես ունեմ իմ կարծիքն ու երաժշտական հայացքները»։

Անդրադառնալով պրոդյուսերի` ավելի վաղ արված հայտարարությանը, թե մրցույթի մյուս մասնակիցները չեն կարող մրցել Մհերի հետ, երգիչն ասաց. «Ես կարող եմ ասել, որ այդ մրցույթի յուրաքանչյուր մասնակցի համար շատ լավ հնարավորություն է` ցույց տալ իր հնարավորությունները, քանի որ մասնակիցներից շատերը նոր քայլեր են անում երգարվեստում։ Սա հարթակ է, որպեսզի իրենք լավ ներկայանան, որոշակի ճանաչում ձեռք բերեն»։

Մհերը չի համարում, որ իր երգը կրկնօրինակում է Queen խմբի Who wants to live forever հանրահայտ երգը։ «Ասողների միջից որևէ մեկը չկա, որ երգել է այդ խմբի հետ, իսկ ես եղել եմ այն մարդը, որը 2004–ին կանգնել է նրանց հետ նույն բեմահարթակում, աշխատել է նրանց հետ։ Բացարձակ ոչ մի նմանություն չկա իմ և իրենց երգերի միջև։ Միգուցե, I want to live forever և Who wants to live forever  վերնագիրն է մարդկանց շեղում։ Իմ ստեղծագործական պրոցեսի արդյունքն է, որ ես այդպիսի երգ երգեի։ Ինչի մասին երգեի` ջրի՞, քամո՞ւ, չգիտեմ... սիրո՞։ Շատ կլիներ, հետաքրքիր չեն այս թեմաները արդեն»– ասաց նա։ Հարցին` նկատի ունի, որ Սևակ Խանաղյանի «Քամի» երգը հետաքրքիր չէ՞, նա արձագանքեց. «Ես դա չասացի, ես ուղղակի օրինակ բերեցի թերթիկների, ծաղիկների, բնության մասին։ Պետք է երգես այնպիսի երգ, որը հաստատ կկպնի եվրոպացի հանդիսատեսին»։

Ինչ վերաբերում է «Դեպի եվրատեսիլի» բեմում սպասվող շոուին, Մհերն ասաց, որ բացահայտումներ անել չի ուզում։ «Շոուն պետք է շարունակվի»,– նկատեց նա։