«Քանի դեռ քեզ սիրում են, պետք է գնահատես պահը». Քրիստինե Պեպելյանի համերգի հետաքրքիր ու տպավորիչ պահերը

Երգչուհի Քրիստինե Պեպելյանը տևական դադարից հետո Վալենտինի օրվա առթիվ մենահամերգ ունեցավ Երևանի ժամանցի կենտրոններից մեկում։ Քրիստինեի գործունեության հիմքում սերն է` ռոմանտիկ երգերը, այնպես որ, օրվա ընտրությունը պատահական չէր։ Երգչուհին ներկայացրեց իր լիրիկական ու ռոմանտիկ երգերը, հուզեց հանդիսատեսին ու ստիպեց երգել իր հետ։

Tert.am Life–ը ներկայացնում է համերգի հետաքրքիր պահերը։ Մեզ հետ զրույցում երգչուհին նկատեց, որ նախապատրաստվել էր ռոմանտիկ երեկոյի, բայց հանդիսատեսի տրամադրությունը ստիպել է վերանայել ծրագիրը։

«Հետաքրքրիր ստացվեց։ Ես պլանավորել էի, որ ամեն ինչ պետք է լինի շատ լիրիկական, ռոմանտիկ, սակայն իրավիճակը փոխվեց ու պարզվեց, որ մարդիկ պատրաստ են նաև պարելու։ Ես չէի մտածել, որ իրենք կհամաձայնեն  պարել Վալենտինի օրը, բայց արի ու տես, որ ամեն ինչ եղավ հակառակը։ Ստիպված եղա կրկնել մի քանի ռիթմիկ գործեր։ Շատ էմոցիոնալ օր ունեցա։ Շնորհակալ եմ, որ հանդիսատեսը վերադարձրեց ինձ այդ էմոցիաները, որովհետև ես իմ բոլոր էմոցիաները դատարկվելու աստիճան տվեցի իրենց։ Դահլիճում ներկա էին նաև իմ գործընկերները՝ Ավետ Բարսեղյանը կնոջ հետ, Նունե Եսայանն ու Ավո Խալաթյանը, Արամեն և Աննան։ Հաճելի էր իրենց տեսնել իմ կողքին»,– ասաց երգչուհին։

Անդրադառնալով օրվա ընտրությանը՝ Քրիստինեն նշեց, որ անկախ նրանից, թե ինչ քննարկումներ են ծավալվում Վալենտինը նշել-չնշելու հետ, ինքն ուրախ է, որ տոնը սիրո առթիվ է։

«Կարծում եմ` միայն այն, որ գաղափարը սիրո մասին է, պետք է նպաստի նշել օրը` անկախ նրանից, թե որտեղից է ծագել այն։ Սա ևս մի անգամ լավ էմոցիաներ ունենալու առիթ ու հնարավորություն է։ Ես կողմ եմ բոլոր այն երևույթներին, որտեղ սեր կա։ Ամեն ինչում սեր պետք է լինի` կլինի աշխատանք, ընկերություն, թե այլ բան, պետք է հիմքում սեր լինի. Հակառակ դեպքում նշանակում է՝ ինչ–որ բան սխալ է ստացվում։ Ես ամեն ինչ անում եմ սրտով։ Ուրախ եմ, որ հնարավորություն ունեմ սրտիս հետ գնալու։ Ուզում եմ մարդիկ սիրով ապրեն։ Կյանքը շատ կարճ է։ Պետք է շատ կարողանաս սիրել, տալ էմոցիաներդ, ազնիվ լինել։ Իմ երգերը հիմնականում սիրո մասին են։ Այն մարդիկ, ովքեր իրենց կյանքում սիրո պատմություններ ունեն, շատ դեպքերում դրանք խաչում են իմ երգերի հետ։ Ես ուրախ եմ, եթե ստացվում է»,- նշեց Քրիստինեն։

Դադարից հետո մենահամերգն առավել զգացմունքային էր և՛ երգչուհու, և՛ նրա երկրպագուների համար։ «Երեկոն, իսկապես, տպավորիչ էր ինձ համար։ Սա մեր պատմությունն է։ Հանդիսատեսի հետ ամեն հանդիպումը գնահատել է պետք, որովհետև ամեն ինչ ժամանակի հարց է` օրն անցնում է, ամեն ինչ` օրվա հետ։ Քանի դեռ քեզ սիրում են, կողքիդ են ու ուրախանում են քո ներկայությամբ, պետք է շատ բարձր գնահատես պահը։ Երբ դադարներից հետո մեծ ծրագրով դուրս ես գալիս բեմ, վայրկյաններ անց թվում  է՝ չի եղել այդ դադարը։ Տպավորություն է, որ վերջին հանդիպումը մի քանի օր առաջ էր։ Դա շատ հաճելի փաստ է։ Համերգի ամենատպավորիչ պահերից մեկը նոր երգիս պրեմիերան էր։ Արամ Ավագյանի երաժշտությամբ, Ավետ Բարսեղյանի խոսքերով «Սիրել, թե ատել» գործը շատ գեղեցիկ է։ Էլ չեմ խոսում այն մասին, որ «Մայրիկը» երգեց դահլիճը»,– ոգևորությամբ նշեց երգչուհին։

Քրիստինեն երկար ժամանակով չի կորչում լսարանի տեսադաշտից, սակայն ունենում է գործունեության ակտիվ ու պասիվ փուլեր։ Ասում է՝ թեև արտաքուստ կարող է պասիվ լինել, սակայն միշտ ստեղծագործական պրոցեսի մեջ է։

«Կուլիսային կյանքում միշտ ակտիվ եմ, իսկ հանրային դադարներն ինձ պետք են։ Չգիտեմ` մյուսներն ինչով են առաջնորդվում, բայց ես կարծում եմ, որ այսօր երգիչների, երաժշտության տարատեսակ ժանրերի մեծ ընտրության մեջ մարդկանց պետք է այդ դադարը։ Ինձ այդ էմոցիաները պետք են լիցքավորվելու, նորից մտածելու, նոր գաղափարների համար։ Դրանք անհրաժեշտ շրջաններ են, առանց որոնց չեմ կարող։ Ես աշխատանքից հանգստանալու կարիք շատ չեմ ունենում, որովհետև սա ինձ համար այն աշխատանքն է, որին ոչինչ չի կարող փոխարինել։ Ես երջանիկ եմ այս աշխատանքով։ Չես կարող ցանկանալ հանգստանալ մարդկանց սիրուց։ Ընդամենը կարող ես ֆիզիկապես հանգստի կարիք ունենալ»,– նկատեց նա։

Երգչուհու մեծ մենահամերգը Երևանում 2012–ին էր։ 6 տարի անց Քրիստինեն պատրաստ է նոր մենահամերգ ունենալ, որը նախատեսում է  2018–ին։ Մինչև այդ, պատրաստվում է  նկարահանել «Սիրել, թե ատել» երգի տեսահոլովակը։ Քրիստինեն հայտնեց, որ այժմ քննարկվում են տեսահոլովակի սյուժեի տարբերակները։

 Լուսանկարները` Շուշան Անտոնյանի