«Ռեինկարնացիայի» ակումբային համերգն ու «Աշխարհումս իմն դուն իս» երգի վերջին կատարումը

«Սերն է պակասել, բայց սերը չի կորել». Վալենտինի օրը «Ռեինկարնացիան» նշեց երկրպագուների հետ` նրանց օրը ողողելով ռեգգի ռիթմերով։ Tert.am Life–ը ներկայացնում է համերգի հետաքրքիր պահերը։

Հանդիսատեսի առաջին շարքերում նստած էր խմբի մենակատար Ռոլանդ Գասպարյանի կինը` Գայանե Հովհաննիսյանը, ով նրա առաջին երկրպագուն է: Սիրո տոնի առթիվ կազմակերպված համերգի առաջին մասը ներառում էր խմբի մեղեդային երգերը, երկրորդ մասն ավելի ռիթմիկ էր և հանդիսատեսին ստիպեց պարել։

Թեև «Ռեինկարնացիայի» համերգները, սովորաբար, ավելի ակտիվ են անցնում, քան երեկ էր և նստած մարդիկ, գրեթե, չեն մնում, Ռոլանդն ասաց, որ դրանից իրեն եկող էներգիան չի նվազում։ «Այդ խնդիրը կա, երբ համերգը նոր է սկսվում։ Ընթացքում մարդկանց` նստած լինելուց չեմ սրտնեղում։ Հասկանում եմ, որ կան մարդիկ, ովքեր իրենց նույնքան լավ են զգում նստած, որքան պարելիս։ Սա պայմանավորված չէ նրանով, որ մարդը չի ուզում պարել, մարդու հոգին է պարում»,– նկատեց երգիչը։

Խմբի ամենասիրված երգերից մեկը` «Աշխարհումս իմն դուն իս» երգը ներկայացնելիս Ռոլանդը նկատեց, որ երգի հետ կապված արձագանքներն այնքան բազմաբնույթ են, որ որոշել են այլևս չկատարել այն։ «Ամեն համերգին որոշում ենք, որ վերջին անգամ ենք կատարում այս երգը, բայց հաջորդ անգամ էլի երգում ենք։ Տղաներին համոզենք ու այսօր վերջին անգամ էլ ներկայացնենք այն»,– ասաց նա։ Լսարանը երգը ընդունեց մեծ ոգևորությամբ ու բացականչություններով։

Վերջին շրջանում խումբն ավելի պասիվ է Հայաստանում համերգների առումով։ Ռոլանդն ասաց, որ դա պայմանավորված է արտերկրում համերգների քանակի աճով։ «Ավելի շատ համերգներով հանդես ենք գալիս ԱՄՆ-ում, Եվրոպայում։ Բացի այդ, այժմ ավելի շատ զբաղված ենք մեր նոր ալբոմի ձայնագրմամբ և «Ռեինկարնացիա» հիմնադրամի գործերով, որի շրջանակում տարբեր դպրոցներ ենք գնում»,– ասաց Ռոլանդը։

Խմբի նոր ալբոմը բաղկացած կլինի 2 ձայնասկավառակից։ Առաջինը կներառի հայկական երգերի cover տարբերակները, երկրորդում կլինեն «Ռեինկարնացիայի» հեղինակային ստեղծագործությունները. «Այն կներառի մեր հեղինակային երգերը, որոնք բացարձակապես կապ չունեն այսօրվա հիթային երգերի հետ»։

Հայկական երգերի մշակումը խմբի կողմից սիրված շարք է։ Ռոլանդը հայտնեց, որ շուտով կներկայացնեն մի շատ հին ու սիրված երգ, սակայն առայժմ չի բացահայտի, թե որ երգի մասին է խոսքը։ «Ռեինկարնացիան» նոր աշխատանքը կներկայացնի տեսահոլովակով։

Լուսանկարները` Շաքե Հովհաննիսյանի