«Մտավախությունս մեծ էր». Բեն Ավետիսյանն իրեն նոր ոլորտում կփորձի

Դերասան Բեն Ավետիսյանի գործունեության մեջ նոր էտապ է սկսվում։ Նա իրեն փորձելու է ուսուցչի դերում։ Դերասանը, ով այս փուլում նկարահանվում է «Երևի» հեռուստասերիալում, Tert.am Life–ի հետ զրույցում պատմել է ինչպես նոր աշխատանքի ու մտավախությունների, այնպես էլ նոր դերի ու տարբերվող կերպարի մասին։

Դասավանդելու որոշումը Բենին հեշտ չի տրվել։ Ասում է` դասավանդելու հնարավորություն վաղուց ուներ, սակայն հետաձգում էր դա մի շարք մտավախությունների պատճառով։ Երևանի ստուդիաներից մեկում Բենը դասավանդելու է դերասանի վարպետություն։

«Երկու տարուց ավելի է, այս թեման  կար, սակայն որոշում չէի կայացնում։ Մտավախությունս մեծ էր։ Հասկանում եմ, որ հնարավոր է ունենամ ուսանողներ, որոնք, գրեթե, իմ տարիքին են, սակայն ես չեմ փորձելու իրենց դարձնել դերասան, որովհետև ինքս դեռ ինձ կայացած դերասան չեմ համարում, ինքս էլ շատ բան ունեմ սովորելու, ուղղակի օգնել երեխաներին, ովքեր սիրում են արվեստը, ընդունվել Թատերական ինստիտուտ։ Ինչ–որ առումով սա կարելի է համարել նախապատրաստական կուրս։ Ես չեմ դասավանդելու զուտ դասավանդելու կամ համբավ ձեռք բերելու համար»,– շեշտեց Բենը։

Նոր աշխատանքին Բենը վերաբերում է մեծ պատասխանատվությամբ, միաժամանակ ասում է, որ խիստ է ընտրելու ուսանողներին։ Ուզում է իր խմբում ունենալ այնպիսի մարդիկ, ովքեր սիրում են այս ոլորտն ու հենց այնպես չեն ընտրել այս ճանապարհը. «Ամենակարևորը համարում եմ երեխաների մեջ  դեպի արվեստը սեր գտնելը։ Եթե մարդը չի սիրում մասնագիտությունը, որքան էլ իր ծնողը, բարեկամը խորհուրդ տա, ստիպի գնալ այս կամ այն խմբակին, ոչինչ չի ստացվի։ Սա ասում եմ իմ փորձից։ Ինքս Գյուղինստիտուտում (Հայաստանի ազգային ագրարային համալսարան) էի սովորում, բայց չէի սիրում մասնագիտությունս և փոխեցի այն։ Ես չեմ ընդունել այն մարդկանց հայտերը, որոնք ուղղակի ուզում են 2 ամիս զբաղվել»,– ասաց նա ու հավելեց, որ տարիքային խմբի սահմանափակումներ էլ ունի։ Իր խմբում կընդգրկի պատանիների, երիտասարդների, քանի որ փոքրիկներին դասավանդման իր տարբերակը քիչ բան կտա։

Բենն ընդգծեց, որ ինքը չի պատրաստվում դերասան դարձնել մարդկանց։ «Ես չեմ կարող ասել, թե դերասան եմ դարձնելու ուսանողներիս։ Դա սխալ մոտեցում կլինի իմ կողմից։ Ես երեխաների ծնողների հետ էլ եմ խոսելու, որ սա ուղղակի նախապատրաստական կուրս է։ 1 տարի ինչ–որ ստուդիայում սովորել, վկայագիր վերցնել ու ասել` ես դերասան եմ, ճիշտ չէ»,– նկատեց նա։

Անդրադառնալով այս շաբաթ մեկնարկած «Երևի» հեռուստասերիալում իր նոր դերին` նա ասաց, որ իր համար առաջնային է տարբերվող դերերով ներկայանալը։  «Կերպարս տարբերվում է իմ մյուս դերերից։ Դա շատ կարևոր էր ինձ համար, հակառակ դեպքում չէի մասնակցի այս նախագծին։ Կարծում եմ` եթե որպես դերասան չես կարողանալու նորովի ներկայանալ, նոր կերպար բացահայտել ժողովրդի համար, իմաստ չունի խաղալ նույն բանը։ Եթե առաջարկն ընդունում ես միայն սերիալում խաղալու համար, կնշանակի, որ դու վատ դերասան ես,– ասաց Բենն ու հավելեց, որ մարմնավորում է կայացած տղայի, որը նոր է զորացրվել բանակից։ –Եթե «Երանիում» կերպարս ինքն իրենով կայացած չէր, ինչ–որ առումով, իր ընտանիքի շնորհիվ էր կայացել, այստեղ հերոսս տան տղամարդն է , իր պատասխանատվության տակ են մայրն ու 3 քույրերը»։

Բենը կարևորում է, որ իր խաղընկերները դերասաններ են։ Նա վստահ է` Գրետա Մեջլումյանի, Ալեքսանդր Խաչատրյանի, Մաշա Արիստակեսյանի, Շուշաննա Թովմասյանի, Եվա Բաղդասարյանի հետ խաղալը փորձի փոխանակման լավ հնարավորություն է։ Ասում է` նոր խաղընկերների հետ էլ հեշտությամբ է աշխատում։ «Շատ կարևոր է, թե ով է խաղընկերդ։ Եթե տեսարանում միայն դու լավ խաղաս, խաղընկերդ վատը լինի, ոչինչ չի ստացվի, սա համատեղ աշխատանք է։ Նոր խաղընկերներիս հետ որքան հասցրել ենք նկարահանվել, ստացվել է, դա շատ է ուրախացնում ինձ։ Շատ գոհ եմ, որ իրենք են իմ խաղընկերները»,– նշեց նա ու հավելեց, որ ռեժիսոր Վահե Սայանի հետ աշխատանքն էլ լավ է ստացվում։

Բենի խոսքով` չի վախենում իր առջև ծառացած մասնագիտական  բարդություններից։ «Վահեն իմ առջև դնում է այնպիսի խնդիրներ, որոնց լուծումից միայն հաճույք եմ ստանում։ Որպես դերասան, ավելի եմ կոփվում, հայտնվում եմ այնպիսի իրավիճակներում, որոնցում դեռ չեմ եղել»,– նկատեց նա։

Հաճախ ավելի բարդ է լինում կերտել կերպարներ, որոնք ակնառու առանձնահատկություն չունեն, դերասանի առաջ խնդիր է ծառանում տարբերվել «սովորական» կերպարով։ Այս առումով Բենը կարևորում է մասնագիտական կրթությունը։ Ասում է`ամեն մարդ պիտի զբաղվի իր գործով։

«Եթե դերասանն ունի մասնագիտական «բագաժ», կարողանում է կերտել կերպարը։ Իհարկե, դու քեզնից ինչ–որ բան դնում ես կերպարի ստեղծման մեջ, սակայն կերպարի կերտմանը պետք է հասնես ոչ թե քո անձնական օրգանիկայով, այլ հասկանաս կերպարն ու իրեն ստեղծես որպես անհատականություն` իր ձայնով, միմիկաներով, առանձնահատկություններով։ Չկան մեծ և փոքր դերեր, կան փոքր դերասաններ։ Եթե կերպարը միատեսակ ես ստեղծում, ուրեմն դու փոքր դերասան ես»,– եզրափակեց նա։