Աննա և Արմեն Էլբակյաններն առաջին անգամ խոսում են Էդգարի մասին. ինչպես է անցել Էդգար Էլբակյանի ձայնասկավառակի շնորհանդեսը

Էդգար Էլբակյան կրտսերին, իբրև ստեղծագործողի, հասարակությունը ճանաչեց ամիսներ առաջ, երբ մանկության ընկերոջ` դերասան Ստեփան Ղամբարյանի նախաձեռնությամբ, ծնունդ առան Էդգարի երգերը։ Այսօր արդեն լույս է տեսել Էդգարի` «Ընկերոջս» խորագրով ձայնասկավառակը, որի շնորհանդեսին ներկա էին ինչպես Էդգարի դասընկերներն ու հարազատները, այնպես էլ ՀՀ Մշակույթի նախարար Արմեն Ամիրյանը, հայտնի մարդիկ, ովքեր կատարել են Էդգարի երգերը։

Tert.am Life–ը ներկա է եղել ալբոմի շնորհանդեսին։ Իրեն նվիրված երեկոյին Էդգարը ներկա էր իր երգերով, որոնք ապրեցին իրենից երկար` կյանք տալով նաև իրեն, ուժ տալով հարազատներին։ 18 տարեկանում կյանքից հեռացած Էդգարի մասին խոսելիս ընկերներն ու հարազատները չէին մոռանում նաև մյուս ընկերոջը` Արեգին։ Մանկության ընկերներ Էդգարն ու Արեգը խեղդվել են` փորձելով փրկել մեկը մյուսին։ Նրանց երրորդ ընկերը` Ստեփան Ղամբարյանը, որ 17 տարի առաջ մենակ մնաց, այսօր կյանք է տվել Էդգարի թողած ժառանգությանը։

Էդգարի ընկերասիրության մասին բոլորը միանշանակ են խոսում, այնպես որ, «Ընկերոջս» խորագիրը պատահական չի  ընտրվել։ Քրոջ` Լիլիի խոսքով` խորագիրը, կարծես, հենց ինքը ընտրած լիներ։

Ծնողների համար ամենաբարդն էր խոսել իրենց որդու մասին` ասելիքը չափազանց շատ է, բայց  զգացմունքները խեղդում են։ Ավելի վաղ Tert.am Life–ը ներկայացրել էր քրոջ`Լիլի Էլբակյանի հարցազրույցը Էդգարի մասին, սակայն Աննա և Արմեն Էլբակյանները նշել էին, որ թեման չափազանց նուրբ է, խոսել ի վիճակի չեն։ Շնորհանդեսին ծնողները խոսեցին Էդգարի գործերի, նրա մանկության մասին։

«Երբ էդգարը 12-13 տարեկան երեխա էր, մեր թատրոնը գտնվում էր Գրողների միության շենքում։ Ուզեինք, թե ոչ, անընդհատ գործ ունեինք գրողների, բանաստեղծների, գրականագետների հետ։ Էդգարն իր տետրակը ձեռքին ծառից ծառ էր թռչում, խաղում էր  ներկայացումներում։ Մի օր գրողներից մեկը հարցրեց` ձեռքիդ ի՞նչ է, խնդրեց կարդալ, Էդգարն ասաց` ձեռագիրս ընթեռնելի չէ, բայց եթե կարող եք, կարդացեք։ Տետրը վերցրեց, մի անկյունում նստեց, կարդաց, հետո ասաց` կտա՞ս, տանեմ տուն, մյուսներն էլ կարդամ։ Էդգարը համաձայնեց։ Հաջորդ օրը ներկայացում ունեինք, որտեղ Էդգարն էլ էր խաղում։ Մեկ էլ այդ գրողը եկավ, ասաց, որ ցույց է տվել տղերքին, իրենց ամսագրի խմբագրությանը, ուզում են բանաստեղծությունները տպագրել։ Էդգարը ձեռքիցս քաշեց մի կողմ, ասաց` պապ, ասա, թող չտպեն։ Զարմացա, չեմ կարծում, 14 տարեկան երեխային ասես, որ իր բանաստեղծությունները ուզում են տպել, ուրախությունից երկինք չթռչի։ Հարցրի` ինչո՞ւ, ասաց` ես դեռ պատրաստ չեմ։ Սրանք այն  գործերն են, որոնք ինքը համարում էր, որ պատրաստ չէ հրատարակելու։ Ինչպես ասում են, մարդը որոշում է, Աստված կանխորոշում։ Այդպես ստացվեց... Այսօր բոլորիս համար երջանիկ օր է, որովհետև հիշում ենք մի մարդու, որի հետ ունեցել ենք անձնական հարաբերություններ»,– արցունքակալած աչքերը ակնոցի հետևում թաքցնելով` ասաց Արմեն Էլբակյանը։

Չնայած որդու մասին խոսելը շատ էմոցիոնալ էր` Աննա Էլբակյանը ևս մի դրվագ հիշեց որդու մանկությունից. «Էդգարն 8 ամսականից սկսել էր երգել, դեռ չէր քայլում։ Բոլորը զարմանում էին` ինչ ուժեղ ռիթմի զգացողություն ուներ։ Երբ փոքր էր, ուզում էր, որ իր համար հեքիաթի փոխարեն Շեքսպիր կարդայինք: Ուրիշ ծնողներ ինձ ասում էին՝ ինչու եք ծանրաբեռնում ձեր երեխային, բայց ես հասկանում էի... Չգիտեի, որ այսպես կլինի, բայց հասկանում էի, որ ուղղակի հեքիաթները, մանկական ներկայացումները նրա համար քիչ են, երևի, պետք է հասցներ»,- ասաց Աննա Էլբակյանն ու շնորհակալություն հայտնեց բոլոր երգիչներին` որդու երգերի հրաշալի կատարման համար։

Ալբոմում զետեղված է 2 սկավառակ, մեկում զետեղված են Էդգարի երգերը երգիչների, մյուսում հենց իր և մոր` Աննա Էլբակյանի կատարմամբ։ Պրն Էլբակյանը պատմեց, որ Էդգարի և տկն Աննայի կատարումները ձայնագրվել են իրենց խոհանոցում. «Երգում են խոհանոցում, Էդգարը լուցկիով ռիթմ էր տալիս, կիթառն էլ մի բան չէր, «մագնիտոֆոնն» էլ վաղուց Ամերիկայից բերած ճապոնական մի սարք էր։ Ձայնագրությունը մի որակի չէր, բայց դա է մնացել։ 18 երգ էր, որոնցից 14–ն է զետեղված սկավառակում»։

Էդգարի հայրն անդրադարձավ նաև Ստեփան Ղամբարյանի, իր որդու և Արեգի ընկերությանը։ Նա իր երախտագիտությունը հայտնեց Ստեփանին` այս նախաձեռնության համար, Արմեն Ամիրյանին` նախաձեռնությանն աջակցելու համար. «Փշի (Ստեփան Ղամբարյանի մականունն է) նախաձեռնությունը շատ կարևոր էր։ Հենց ասում եմ Փուշ, աչքիս առաջ հառնում են Արեգը, Փուշը, էդգարը` 3 փոքր տղաները, որոնք քարկտիկի նման վազում էին մեր բակում ու աչքներիս առաջ մեծացան` ընկերության շատ գեղեցիկ մթնոլորտ ստեղծելով թե՛ դպրոցում, թե՛ բակում։ Շնորհակալ եմ քեզնից Փուշ` Ստեփան Ղամբարյան։  Ինձ համար դեռ Փուշ ես, բայց այսօր արդեն կայացել ես որպես Ստեփան Ղամբարյան, դերասան և մարդ։ Եկեք քեֆ անենք ու խմենք Էդգարի, Արեգի, Փշի ընկերության, բոլորի ընկերության կենացը»։

Ստեփան Ղամբարյանն այս նախաձեռնության իրականացումը համարում է իր կյանքի կարևորագույն գործը։ «Սա իմ 20 տարիների ամենամեծ աշխատանքն է։ Եթե համարեմ, որ ինչ–որ բան արել եմ իմ կյանքում, սա էր։ Այս աշխատանքի շնորհիվ ես ինձ ավելի լավ եմ զգում»,– ասաց նա։ Դիտարկմանը, որ իր նախաձեռնության շնորհիվ հասարակությունը ճանաչեց և սիրեց Էդգար Էլբակյանին` որպես երգահանի, բանաստեղծի, նա արձագանքեց, որ իր համար դա ամեն ինչ արժեր. «Սա ապրելու, կյանքը շարունակելու ստիմուլ էր»։

Ձայնասկավառակում կան երգեր, որոնք կատարում են Մարտա Կիրակոսյանը, Հայկ Պետրոսյանը, Մաշա Մնջոյանը, Գրիգոր Կյոկչյանը, Արսեն Սաֆարյանը։ Կան նաև երգեր, որոնք «Երգ երգոցում» ներկայացրել են այլ կատարողներ, սակայն ձայնագրվել են այլ երգիչների կատարմամբ։

Ստեփանն ասաց, որ բոլոր երգիչները սիրով են մասնակցել նախաձեռնությանը, պարզապես, եղել են մարդիկ, ովքեր երկրում չէին ձայնագրության փուլում։ Այսպիսով` նախաձեռնությանը միացել են Ֆելիքս Խաչատրյանը, ով կատարում է նոր երգ, «Էմփիռեյ» խմբի նախկին մենակատար Սարգիս Մանուկյանը, որը երգել է Խորեն Լևոնյանի կատարած «Կարոտ» երգը, Նարինե Դովլաթյանը երգել է Էմմա Պետրոսյանի երգը, իսկ Նարինեի երգը կատարել է Ռադիկ Գաբրիելյանը, Անի Ամիրյանը երգում է Արսեն Գրիգորյանի կատարած երգը։

Երգերի գործիքավորումն արել է Արման Էլբերտը։

Լուսանկարները՝ Հրանտ Մարինոսյանի