Լյուսի Հայրապետյան. «Կնոջ համար ամենակարևորը բալիկներ ունենալն ու ընտանեկան երջանկությունն է»

Մոդել, հաղորդավարուհի Լյուսի Հայրապետյանը կարծում է, որ կանանց ու աղջիկներին տրվող ուշադրությունը չպետք է սահմանափակվի միայն միամսյակով: Tert.am Life-ը Լյուսիի հետ զրուցել է տոնական միամսյակին իր ստացած լավագույն նվերի, մեր հասարակությունում կնոջ դերակատարման, հաջողակ և ինքնաբավ լինելու համար անհրաժեշտ պայմանների և այլ հարցերի շուրջ:

Լյուսին համոզված է, որ կնոջ նկատմամբ ուշադրությունը կարող է արտահայտվել նաև առանց նվերների, պարզապես, դրական վերաբերմունքով: «Ես գտնում եմ, որ անպայման չէ լինեն նվերներ, ամենօրյա ուշադրությունը, հաճոյախոսությունը, ուղղակի ժպիտը և կնոջը հոգսերից ազատելը տղամարդու մոտ պետք է լինի բնատուր։ Տղամարդն ամեն օր պետք է ուշադրությունը հատկացնի իր կողքի կնոջը»,-ասաց Լյուսին:

Այդուհանդերձ, մոդելից հետաքրքրվեցինք, թե ո՞րն է եղել տոնական միամսյակին իր ստացած լավագույն նվերը. «Ես մայրիկիս եմ նվիրել իր ցանկացած իրը, իսկ ինձ նվիրել են ճանապարհորդության ուղեգիր: Շուտով կմեկնեմ»,-ասաց նա, սակայն  չցանկացավ մանրամասնել, թե ով է նվերի հեղինակը և ուր է մեկնելու:

Լյուսին կարծում է, որ մեր հասարակության մեջ տղամարդիկ շարունակում են իշխող դերակատարում ունենալ, ի տարբերություն կանանց: Մոդելի կարծիքով` ճիշտ չէ հավասարության նշան դնելը երկու սեռերի միջև: «Անկեղծ ասած, ես կողմնակից չեմ, որ կանանց և տղամարդկանց իշխանությունը հավասարազոր լինի: Կարծում եմ և՛ ընտանիքում, և՛ պետական կառավարման համակարգում տղամարդը պետք  է ունենա գլխավոր դերակատարում:  Իհարկե, կան ոլորտներ, որոնց կանայք ավելի լավ են տիրապետում, բայց դրանք այդքան էլ շատ չեն»,-ասաց նա:

Մոդելը համոզված է, որ երջանիկ և ինքնաբավ լինելու համար պարտադիր չէ հաջողել միաժամանակ  և՛ աշխատանքում, և՛ անձնական կյանքում: Ամենակարևորը, ըստ Լյուսիի, անձնական երջանկություն ունենալն է: «Իհարկե լավ է, երբ կա և՛ աշխատանքային, և՛ անձնական` ընտանեկան հաջողություն, բայց, ըստ իս, կինը շատ քչով բավարարվող է՝ բնությունից այդպես է տրված նրան։ Կարծում եմ, եթե անձնական երջանկությունը լինում է, աշխատանքայինը կարող է չլինել: Կարևորն անձնական, ընտանեկան երջանկությունն ու, ամենակարևորը, բալիկներ ունենալն է: Երբ կինը ունենում է բալիկներ, նշանակում է` ինքն արդեն երջանիկ է»,-ասաց մոդելը:

Լյուսիի խոսքով` իր աշխատանքի բնույթն ու տեմպն անձնական կյանքին երբեք չեն խանգարել: «Շատ բուռն աշխատանքային ընթացքի մեջ եմ, բայց այդ ամենը ինձ չի խանգարում անձնական կյանքում, որովհետև եթե կողքիս լինում է տղամարդ, նա ընդունում և հարմարվում է այն գրաֆիկին, որը ես ունեմ։ Միշտ փոխզիջման ենք գալիս իրար հետ»,-ասաց նա:

Տարածված կարծիքը, որ մոդելային արտաքինով աղջիկները և, հատկապես, նրանք, ովքեր ընտրել են մոդելինգը` որպես մասնագիտություն,  առանձնապես չեն փայլում ինտելեկտուալ կարողություններով, Լյուսիի խոսքով,  տեղին չէ: Թեև նմանատիպ բազմաթիվ իրավիճակների է բախվել կյանքում:

«Ինձ հետ շատ հաճախ է լինում, երբ ասում են՝ վայ դուք մոդել եք, ինչ տարօրինակ է, որ մոդել եք ու խելացի: Մեր օրերում մյուս ասպարեզներում ավելի շատ մարդիկ կան, որ մոդելի չափ էլ գիտելիք չունեն, ընդամենը, ցույց են տալիս, թե խելացի են: Այնպես որ, եթե ընդհանրացնենք, թե մոդելները խելացի չեն լինում, շատ սխալ կլինի։ Քիչ առաջ  մասնակցում էինք «3/off» նախագծին ու ինձ թվում է՝ ապացուցեցինք լրիվ հակառակը»,-ասաց նա:

Մոդել-հաղորդավարուհին տևական ժամանակ հեռուստադիտողներին ողջունում էր «Երկիր Մեդիա հեռուստաընկերության առավոտյան ծրագրում,  այժմ հեռուստատեսային դադարի մեջ է, փոխարենը շարունակում է գործունեությունը ռադիոեթերում: Լյուսին նշեց, որ մոդելային ասպարեզն իր համար ավելի հոգեհարազատ է, որովհետև այնտեղ իրեն ավելի կայացած է համարում: «Մի քանի նոր առաջարկներ կան, բայց դեռ սպասում եմ, տեսնեմ մեր հեռուստաընկերությունում՝ «Երկիր Մեդիայում», ինչ է կատարվում: Ինչպես հասկանում եմ, ինչ–որ ծրագրեր ընթացքի մեջ են։ Ես ժամանակս զուր չեմ վատնում՝ խոսքի վարպետության դասերի եմ հաճախում, որպեսզի խոսքս ավելի հստակեցնեմ, մշակեմ»,- եզրափակեց Լյուսին:

Անահիտ Հակոբյան