«Ես ու Հայկոն շատ բարդ ենք աշխատում իրար հետ». Անահիտ Սիմոնյանի բողոքն ամուսնուց և սպասվող նորությունը

Երգչուհի Անահիտ Սիմոնյանը, ով վերջին շրջանում հայտնի երգերի cover–ներ է ներկայացնում, ունի նաև իր երգերը, որոնք հանդիսատեսին ներկայացնելը փոքր–ինչ ուշանում է։ Tert.am Life–ի հետ զրույցում Անահիտը խոսել է աշխատանքային նորությունների և ամուսնու` Հայկոյի հետ սպասվող զուգերգի մասին։ երգչուհին մի քիչ էլ բողոքել է ամուսնուց։)

Օրերս Հայկոյի ակումբային մենահամերգի ժամանակ Անահիտն ու Հայկոն ներկայացան զուգերգով։ Երգը, սակայն իրենց համար գրված չէր։ Անահիտը ներկայանում էր Հռիփսիմե Հակոբյանի փոխարեն։

«Հայկոյի համերգից հետո շատ էր խոսվում այն մասին, թե ինչու մենք զուգերգ չունեցանք։ Իրականում, նման միտք կար, սակայն Հայկոն չէր հասցրել նոր երգ գրել։  Քանի որ Հռիփսիմեն քաղաքում չէր, այս համերգին որոշեցինք միասին կատարել իրենց զուգերգը։ Ես միայն այս անգամ եմ կատարել այդ երգը,– ասաց Անահիտն ու հավելեց, որ ամուսնու հետ կունենան իրենց զուգերգը,– Հստակ ժամկետ նշել չեմ կարող, բայց զուգերգ, անպայման, լինելու է։ Հայկոն ուզում է,որ շատ գեղեցիկ գործ լինի։ Դա կլինի մի երգ, միասին ներկայանալը շարունակական չի լինի»։

Անահիտից հետաքրքրվեցինք, թե ինչպես է ստացվում ամուսնու հետ գործնական շփումը։ Երգչուհին շատ անկեղծ գտնվեց. «Շատ դժվար։) Առհասարակ, մենք իրար հետ շատ բարդ ենք աշխատում։ Հայկոն խորհուրդներ է տալիս և այդ ընթացքում կարող է շատ պահանջկոտ լինել: Շատ կոնֆլիկտներ են առաջանում, թեև վերջում միշտ համբուրում ենք իրար։ Այս անգամ ամեն ինչ բարեհաջող անցավ:)»,– նշեց երգչուհին։

Վերջերս Անահիտը ներկայացրեց Միշա Մարվինի С ней երգի cover տարբերակը։ Առաջիկայում երգչուհին ևս մեկ cover կներկայացնի։ «Շատ եմ սիրում ռուսական երգերը։ Վերջերս շատ եմ սիրում փոփ, R&B, ռեփ։ Black Star–ի մեծ երկրպագու եմ։ Մեքենայիս մեջ շատ եմ լսում նրանց երգերը։ Երբ գնում եմ Նիկ Էգիբյանի մոտ, սկսում ենք խոսել, հետո երգել...  ես ինձ շատ ազատ եմ զգում նրա մոտ և կարողանում եմ արտահայտել զգացմունքներս երգի միջոցով։ Երգի cover–ը շատ հեշտ ու արագ է ստացվում. Նիկը նվագում է, ես երգում եմ և վերջ։ Դա իմ հաճույքի համար եմ անում»,– ասաց երգչուհին ու հավելեց, որ ունի նաև իր երգերը, սակայն դրանք պահանջում են լիարժեք գործիքավորում։ Դիտարկմանը, որ գործիքավորումն իրենց տանից է, Անահիտն արձագանքեց. «Ինչպես ասում են` կոշկակարը կոշիկ չունի։ Ինձ հերթ չի հասնում»։

Երգչուհուց հետաքրքրվեցինք, արդյոք կներկայանա ռեփ կամ R&B ոճերում` հաշվի առնելով, որ շատ է սիրում այդ ոճերը. «Ցավոք, այն, ինչ պատրաստվում եմ  հիմա ներկայացնել, այդ ոճում չէ, սակայն հետագայում կաշխատեմ ներկայացնել նաև այդպիսի երգեր։ Ես այդ ոճում ինձ ավելի ազատ եմ զգում, ես` ես եմ։ Այս պահին ունեմ տեսահոլովակ, որը մոնտաժված ու պատրաստ է, սակայն էլի պետք է մեղադրեմ Հայկոյին։ Տեսահոլովակս պատրաստ է, երգս` ոչ։ Հայկոն պետք է երգիս միքսն ավարտի, որպեսզի տեղադրենք տեսահոլովակի վրա և ներկայացնենք հանդիսատեսին։ Հուսով եմ` այս ամսվա վերջ կներկայացնեմ»,– ասաց Անահիտն ու հավելեց, որ խոսքը ազգությամբ հրեա՝ Իրադա Հաիթի գրած ռուսալեզու երգի մասին է, որը շատ հուզիչ ու մեղեդային է։

Առաջիկայում Անահիտը կրկին կմեկնի ԱՄՆ, որտեղ տարեսկզբին բացվեց իր խանութի մասնաճյուղը։ Անահիտը հայտնեց, որ մտադիր է ընդլայնել իր գործունությունն ԱՄՆ–ում։